ކަނޑުވިއްކާލުމާއި ދެކޮޅަށް ބާއްވާ ރެލީގައި ސިފައިންނާއި ފުލުހުން ބައިވެރިވާން ޖެހޭ: އާޒިމް

ކަނޑުވިއްކާލުމާއި ދެކޮޅަށް ގުޅިފައިވާ ފަރާތްތައް އިސް ނަގައިގެން އިންތިޒާމުކުރާ ބޮޑު ރެލީގައި ސިފައިންނާއި ފުލުހުން ބައިވެރިވުމަށް ރައްޔިތުންގެ މަޖިލީހުގެ މެދުހެންވޭރު ދާއިރާގެ މެމްބަރު އަލީ އާޒިމް ގޮވާލައްވައިފި އެވެ.

އާޒިމް މިފަދައިން ވިދާޅުވެފައިވަނީ ފޯޅަވަހި މައްސަލައިގައި ގުޅިގެން މަސައްކަތް ކުރުމަށް އުފައްދާފައިވާ ކަނޑު ވިއްކާލުމާއި ދެކޮޅު އިއްތިހާދުން ބޭއްވި ޕްރެސް ކޮންފަރެންސްގައި ވާހަކަދައްކަވަމުން ނެވެ.

އޭނާ ވިދާޅުވީ ދިވެހިރާއްޖޭގެ ކަނޑުގެ ސަރަހައްދުން ގެއްލިގެން ދިޔަ ބައި ހޯދުމަށް އެމްޑީޕީގެ ރައީސް މުޙައްމަދު ނަޝީދު އުފައްދަވާފައިވާ ފިކުރެއްގެ ދިރުން ގޮފިން ކުރެވެން އޮތް ހުރިހާ މަސައްކަތެއް ކުރާނެ ކަމަށެވެ.

އެ މަސައްކަތް ކުރުމުގެ ތެރެއިން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ އިތުބާރު ނެތްކަމުގެ މައްސަލަ ވައްދަން ޖެހޭ ހިސާބުން އެކަން ކުރުމަށްވެސް ފަސް ޖެހިވަޑައި ނުގަންނަވާނެ ކަމަށާއި، ކަނޑުގެ ސަރަހައްދުން ބައެއް ދޫކޮށްލުމަކީ ސަރުކާރަށް ކުރެވޭނެ ކަމަކަށް ނުވާތީ، ރައްޔިތުންގެ މަޖިލީސް މެމްބަރުން އެކަމުގައި އަދާކުރަން ޖެހޭ ޒިންމާތައް އަދާކުރައްވާނެކަމަށް އާޒިމް ވިދާޅުވި އެވެ.

ކަނޑު ވިއްކާލުމާއި ދެކޮޅު އިއްތިހާދުގެ އެންމެން ވެސް އިއްތިފާގުވާ ގޮތަށް އާޒިމް ވެސް ވިދާޅުވީ އެއީ ޤައުމީ ކަމެއް ކަމަށެވެ. ސިޔާސީ ގޮތުން ޚިޔާލު ފަތާތުވުންތައް އޮތް ކަމުގައި ވިޔަސް ސަރަހައްދާއި ގުޅޭ އެ މައްސަލައިއަކީ ޤައުމީ މަސްލަހަތު އިންތިހާއަށް ބޮޑު މައްސަލައަކަށް ވާތީ، އެކަމުގައި އެންމެން އެއްކޮށް މަސައްކަތް ކުރަން ޖެހޭކަމަށް އާޒިމް ވިދާޅުވި އެވެ. އަދި ވިދާޅުވީ ކަނޑު ވިއްކާލުމާއި ދެކޮޅަށް އެ އިއްތިހާދުން ބާއްވާ ބޮޑު ރެލީގައި ސިފައިންނާއި ފުލުހުން ވެސް ބައިވެރިވާން ޖެހޭކަމަށެވެ.

"އަޅުގަނޑު ދެކޭގޮތުގައި ދިވެހި ސިފައިން އެބަ ނިކުންނަން ޖެހޭ. އަޅުގަނޑުމެންނާ އެއްކޮށް އެ ރެލީގައި ބައިވެރިވާން ދިވެހި ސިފައިން ދިވެހި ފުލުހުން އެބަ އަންނަން ޖެހޭ، އެއީ މި ކަންކަން ހިމާޔަތް ކުރަން ތިބި ފަރާތްތައް ހުވާކޮށްގެން"

ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް

އާޒިމް ވިދާޅުވީ ކަނޑު ވިއްކާލުމަށް ޑީލެއް ހެދިކަމަށް ތުހުމަތުތަކެއް ކުރެވޭއިރު އެ މައްސަލަތައް ތަހުގީގު ކުރެވެން ޖެހޭ ކަމަށެވެ. އެ ޑީލުގެ ތެރެއިން މަންފާވީ ކޮން ބަޔަކަށްކަން އެނގޭނީ އެފަދަ ފުރިހަމަ ތަހުގީގެއް ކުރެވިގެން ކަމަށާއި، މިހާރަށް ބަލާއިރު، ޔަގީނުންވެސް ސަރަހައްދުން ބައެއް ދޫކޮށްލީ ގަސްދުގައި، އިހުމާލުންކަން ފެންނަން އޮތް ކަމަށެވެ.