ރަސްމީ ދަތުރުފުޅެއްގައި މިނިސްޓަރ ޝާހިދު ޖަޕާނަށް ވަޑައިގެންފި

ރަސްމީ ދަތުރުފުޅެއްގައި ފޮރިން މިނިސްޓަރ އަބްދުالله ޝާހިދު ޖަޕާން ގެ ޓޯކިޔޯއަށް ވަޑައިގަންނަވައިފިއެވެ.

މިކަމާއި ގުޅިގެން ފޮރިން މިނިސްޓްރީއިން ނެރުން ބަޔާނެއްގައި ބުނެފައިވަނީ މި ދަތުރުފުޅުގައި މި މަހު 14 އިން 16 އަށް ޓޯކިޔޯގައި ބޭއްވޭ 'މިއުނިކް ލީޑަރސް މީޓިންގ' ގައި މިނިސްޓަރ ބައިވެރިވެ ވަޑައިގަންނަވާނެ ކަމަށެވެ. އަދި ޖަޕާންގެ ފޮރިން މިނިސްޓްރ ހަޔަޝީ ޔޮޝިމަސާ ގެ އިތުރުން މިއުނިކް ލީޑާޒް މީޓިންގައި ބައިވެރިވެ ވަޑައިގަންނަވާ އެހެނިހެން ވަޒީރުންނާއި ވެސް ބައްދަލު ކުރައްވާނެ ކަމަށެވެ.

މިނިސްޓަރ ޝާހިދުގެ އަރިހުގައި ފޮރިން މިނިސްޓްރީގެ ސްޓޭޓް މިނިސްޓަރ އަހްމަދު ޚަލީލް، ޖޮއިންޓް ސެކެޓްރީ މަރިޔަމް މިދްފާ ނައީމް، ޑިރެކްޓަރ ހުސައިން ޖައްހާޒް، އަދި އެސިސްޓަންޓް ޑިރެކްޓަރ މުހައްމަދު ޝުޖާއު ވެސް ވަޑައިގެންނެވިއެވެ.

'މިއުނިކް ލީޑަރސް މީޓިންގ' އަކީ މިއުނިކް ސެކިއުރިޓީ ކޮންފަރެންސްގެ ފަރާތުން އިންތިޒާމް ކޮށް، 24 ގަޑިއިރުގެ އޮފް ދަ ރެކޯޑް ބައްދަލުވުމެއްގެ ގޮތުގައި ފަރުމާކޮށްގެން ދުނިޔޭގެ އެކި އެކި ކެޕިޓަލްތަކުގައި ބޭއްވޭ ބައްދަލުވުމެކެވެ.

މި ބައްދަލުވުމުގައި ސަރުކާރާއި ބައިނަލްއަގްވާމީ ޖަމިއްޔާތަކުގެ އިސްވެރިންނާއި، ވަޒީރުންނާއި، މަޖްލިސް މެމްބަރުންނާއި، މަދަނީ ޖަމިއްޔާތަކުގެ މަންދޫބުންނާއި، އިސް ސީއީއޯންނާއި، މަތީ ފެންވަރުގެ ޕްރައިވެޓް ސެކްޓާރގެ މަންދޫބުންގެ އިތުރުން ނަން މަޝްހޫރު ނޫސްވެރިން ބައިވެރިވެ ވަޑައިގަންނަވާނެއެވެ.

މިއާއިއެކު ބައްދަލުވުމުގައި މި ފަރާތްތަކާއިއެކު ބައިނަލްއަޤްވާމީ ސަލާމަތީ ސިޔާސަތާއި ސަރަޙައްދީ ސަލާމަތަށް ހުރި ގޮންޖެހުންތަކާއި ބެހޭގޮތުން މަޝްވަރާކޮށް ބަހުސްކުރެވިގެން ދާނެއެވެ.

ޖަޕާންގެ ސަރުކާރާއި ގުޅިގެން ކުރިއަށް ގެންދާ މިއުނިކް ލީޑަރސް މީޓިންގ ގައި ޗެތަމް ހައުސްގެ ގަވާއިދުގެ ދަށުން ވަކި މައުޟޫއަކަށް ފޯކަސްކޮށްގެން މަތީ ފެންވަރުގެ ރައުންޑްޓޭބަލްތައް ބޭއްވިގެން ދާނެއެވެ.