ފޯޅަވަހި މައްސަލައިގައި ޖޭޕީގެ ސްޓޭންޑަކީ ކަނޑު ވިއްކާލުމާއި ދެކޮޅަށް ތެދުވުން: އަލީ ހުސެއިން
ފޯޅަވަހި މައްސަލައިގައި ޖުމްހޫރީ ޕާޓީގެ ސްޓޭންޑަކީ ދިވެހިރާއްޖޭގެ ކަނޑުގެ ސަރަހައްދުން ބައެއް ދޫކޮށް ނުލެވޭނެ ކަމަށާއި، އެކަމާއި ދެކޮޅަށް ތެދުވެ ކުރަން ޖެހުނު ކޮންމެ މަސައްކަތެއް ކުރުން ކަމަށް ގުޅިގެން އެ މަސައްކަތް ކުރުމަށް އުފައްދާފައިވާ ކަނޑު ވިއްކާލުމާއި ދެކޮޅު އިއްތިހާދުން ބޭއްވި ޕްރެސް ކޮނަފަރެންސްގައި ޖޭޕީ ތަމްސީލު ކުރެއްވި މަޖިލީހުންގެ ކެންދޫ ދާއިރާގެ މެމްބަރު އަލީ ހުސެއިން ވިދާޅުވެއްޖެ އެވެ.
އަލީ ހުސެއިން މިފަދައިން ވިދާޅުވެފައިވަނީ ޖުމްހޫރީ ޕާޓީގެ ސްލޮޓެއްގައި ސަރުކާރުގެ ފިޝަރީސް މިނިސްޓަރުގެ މަޤާމުގައި ހުންނެވި ޑރ ހުސެއިން ރަޝީދު، ފޯޅަވަހި މައްސަލައިގައި ޖުމްހޫރީ ޕާޓީގެ ވަކި ސްޓޭންޑެއް ނެތްކަމަށް ވިދާޅުވެ އޮންލައިން ހޫކަމަށް ދެއްވި އިންޓަވިއުއަކާއި ގުޅިގެން ނޫސްވެރިއަކު ކުރި ސުވާލަށް ޖަވާބުދެއްވަމުން ނެވެ.
އަލީ ހުސެއިން ވިދާޅުވީ ފޯޅަވަހި މައްސަލައިގައި ޖުމްހޫރީ ޕާޓީގެ ސްޓޭންޑަކީ ކޮބައިކަން މިދިޔަ ސެޕްޓެމްބަރު މަހު ސާފުކޮށް އިއުލާނުކޮށްފައިވާ ކަމަށެވެ. ވަކި ބޭފުޅަކަށް އެކަން ސާފުވެވަޑައި ގުނަތުމަކީ ޖޭޕީގެ ސްޓޭން ސާފު ނުވާކަމަށް ބުނެވޭނެ ސަބަބެއް ނޫންކަމަށް އޭނާ ވިދާޅުވި އެވެ.
"ޖުމްހޫރީ ޕާޓީގެ ޕޮސިޝަން އެ އޮތީ ހާމަކުރައްވާފަ މިދިޔަ އަހަރު ސެޕްޓެމްބަރު މަހު ޖުމްހޫރީ ޕާޓީގެ ލީޑަރު. އެއީ ދިވެހި ރައްޔިތުންގެ ވެސް ޕޮސިޝަން. ދިވެހި ގައުމުން ކޮޑި އިންޗިއެއްގެ މިންވަރުވެސް ދޫކޮށްލަން ޤާސިމް އިބްރާހިމް ވެސް ޖުމްހޫރީ ޕާޓީ ވެސް އަދި އެއްވެސް ދިވެހި ރައްޔިތަކު ނޭދޭނެކަމަށް އެއީ ޕޮސިޝަން ވަރަށް ސާފުކޮށް ފެންނަން. ބަޔަކަށް ޕޮސިޝަން ނޭނގިގެން އޮޅިގެން އުޅުމަކީ އަދި މުޅިން އެހެން މައްސަލައެއް"
ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސެއިން
އަލީ ހުސެއިންގެ ވާހަކައިގައި ވަނީ ފޯޅަވަހި މައްސަލައިގައި ކަނޑު ވިއްކާލިމަށް ގުޅިފައިވާ ސިޔާސީ ޕާޓީތަކުން އެކުލަވާލާފައިވާ އިއްތިހާދުން ބުނަމުންދާ ސަބަބުތަކަށް ވެސް އަލިއަޅުވާލައްވާފަ އެވެ.
އެގޮތުން އޭނާ ވިދާޅުވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ހައިސިއްޔަތު ލިބިގެން ނުވާ ސިޓީފުޅެއް ރައްޔިތުންގެ މަޖިލީހަށް އެނގުމަކާއި ނުލާ ފޮނުވުމަކީ ތުހުމަތު ކުރެވޭ ސަބަބެއް ކަމަށެވެ.
އޭގެ އިތުރުން އެ މައްސަލައިގައި ދިވެހިރައްޔިތުންގެ ހައްގުގައި ކޯޓުގައި ދައްކަން ޖެހޭ މުހިންމު ވާހަކަތަކެއް ނުދައްކާ، ވަރަށް ބޮޑަށް މައްސަލަ ދޫކޮށްލުމަކީވެސް ތުހުމަތު ކުރެވޭ ކަމެއް ކަމަށެވެ.
އެ ތުހުމަތުތައް ތަހުގީގު ކުރެވެން ޖެހޭ ކަމަށާއި، އެ މައްސަލައިގައި ރައްޔިތުންގެ މަސްލަހަތު ހިމާޔަތްކުރުމަށް ކުރެވެން ހުރި ހުރިހާކަމެއް ޖުމްހޫރީ ޕާޓީން ކުރައްވަމުން ގެންދަވާނެކަމުގެ ޔަގީންކަން އަލީ ހުސެއިން ވަނީ ދެއްވާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
