ދަނގެތީ ޔޫސުންބެ ހޯދުމުގެ މަސައްކަތް އެމްއެންޑީއެފް ޑައިވަރުން ފަށައިފި!

އެކަނި މަހަށް ނިކުމެ އުޅުނިކޮށް އިއްޔެ ގެއްލުނު އދ.ދަނގެތީ، ނޫލައިޓް، އުމުރުން 68 އަހަރުގެ ޔޫސުފް އިބްރާހިމް (ޔޫސުންބެ) ހޯދުމުގެ މަސައްކަތް އެމްއެންޑީއެފްގެ ޑައިވަރުން ފަށައިފިއެވެ.

ދަނގެތިން "ވޮއިސް" އަށް މައުލޫމާތު ދިން ފަރާތެއް ބުނެފައިވާ ގޮތުގައި ޔޫސުންބެ އިއްޔެ މަހަށް ނުކުމެ އުޅުނު ދޯނި ފެނިފައިވަނީ ވެލިނަގަން ގޮސްއުޅުނު ބަޔަކަށެވެ. އަދި އެމީހުންނަށް ދޯނި ފެނުނު އިރު ދޯނީގައި އެއްވެސް މީހަކު ނެތް ކަމަށާ، އަދި ދޯންޏަށް އަރައި ބެލި ބެލުމުން އޭގައި ހުރިހާ އެއްޗެއް ހުރިކަމަށް ވެސް ބުންޏެވެ.

މީގެ އިތުރުން ޔޫސުންބެ ގެއްލެން މެދުވެރިވި ވަކި ސަބަބެއް ނޭނގުނު ނަމަވެސް، އޭނާ އަކީ ދޯނި ދުއްވަން ހުއްޓައިވެސް، ނިދި ޖެހިގެން މޫދަށް ވެއްޓި، ނޫނީ ދޯނި ފަރަށް އެރުން ފަދަ ކަންކަން މީގެ ކުރިންވެސް ދިމާވެފައިވާ މީހެއް ކަން އެރަށު މީހުން ފާހަގަކޮށްފައިވެއެވެ. އެހެންކަމުން ކަނޑަށް ވެއްޓެން މެދުވެރިވި ސަބަބަކީ ނިދުން ކަމުގައި ވުންވެސް އެކަށީގެންވާ ކަމަށް އެރަށު މީހުން މައުލޫމާތު ދެއެވެ.

އިއްޔެ ހެނދުނު ގާތްގަނޑަކަށް 11 ޖަހާކަން ހާއިރު، ޔޫސުންބެ ގެއްލިގެން ހޯދުމުގެ މަސައްކަތް އެރަށުގެ ރައްޔިތުންނާ ފުލުހުން ފަށާފައިވާއިރު، މިހާތަނަށްވެސް އޭނާ ފެނިފައެއް ނުވެއެވެ.

އެހެންކަމުން، މިއަދު ހެނދުނު 7:00 އިން ފެށިގެން އެމްއެންޑީއެފްގެ ޑައިވަރުންނާއި، ދަނގެތީގެ ޑައިވަރުންގެ އިތުރުން ފުލުހުންވެސް ފަށާފައިވާ ކަމަށް އެރަށު ކައުންސިލުން ވަނީ ބުނެފަ އެވެ. އަދި އެ ރަށުގެ ލޯންޗުތަކާއި ޑިންގީ ތަކުގައިވެސް ރައްޔިތުން ނުކުމެ އޭނާ ހޯދުމުގެ މަސައްކަތް ކުރުމަށް މިއަދުވެސް ނުކުމެފައިވާ ކަމަށް މައުލޫމާތު ލިބެއެވެ.

މި ހާދިސާއާއި ގުޅިގެން އެމްއެންޑީއެފްއިން ބުނީ، އެ ހާދިސާގެ ރިޕޯޓް އެމްއެންޑީއެފް ކޯސްޓްގާޑް މެރިޓައިމް ރެސްކިޔު ކޯޑިނޭޝަން ސެންޓަރަށް ލިބިފައިވަނީ އިއްޔެ 11:42 ހާއިރު ކަމަށާ، މިމީހާ ހޯދުމުގައި ކޯސްޓްގާޑުގެ ޑައިވަރުންނާއެކު އދ ދަނގެތީގެ ޑައިވަރުންނާއި ކައިރި ރިސޯޓްތަކުގެ ޑައިވަރުން ހަރަކާތްތެރިވަމުން ދާއިރު ކަނޑުމަގުން ހޯދުމުގެ މަސައްކަތުގައި ކޯސްޓްގާޑުގެ ފާސްޓް އިންޓަރސެޕްޓަރ ކްރާފްޓް ‘ ހަކުރާ’ އާއެކު ފުލުހުންނާއި ކައިރި ރިސޯޓްތަކާއި ދަނގެތީގެ ބައެއް އުޅަނދުތައް ހަރަކާތްތެރިވަމުންދާ ކަމަށެވެ. އަދި މީގެ އިތުރުން ވައިގެ މަގުން ޔޫސުންބެ ހޯދުމުގެ މަސައްކަތް ޑޯނިއަރ އެއަރކްރާފްޓް މެދުވެރިކޮށް މިއަދު ހެނދުނު ފަށާފައިވާ ކަމަށް އެމްއެންޑީއެފުން ބުނެއެވެ.

އެމްއެންޑީއެފް އިން އިތުރަށް ބުނީ، ދޯނިން މަހަށް ދިޔައިރު ޔޫސުންބެ ލައިގެން ހުރީ ރަތްކުލައިގެ ޓީޝާޓެއްކަމަށެވެ. އަދި އޭނާއާ ބެހޭ އެއްވެސް ޚަބަރެއް ވޭތޯ މި ސަރަހައްދުން ދަތުރުކުރައްވާ އުޅަނދު ފަހަރުންނާއި، އެހިސާބުގެ ރަށްތަކުން ބެލުމަށް އެދި އޭނާއާ ބެހޭ އެއްވެސް މަޢުލޫމާތެއް ލިބިއްޖެނަމަ ލަސްނުކުރައްވާ އެމްއެންޑީއެފް ކޯސްޓްގާޑްގެ ހިލޭ ގުޅޭ ނަންބަރު 191 ނުވަތަ 3395981 އަދި 3398898 ފޯނަށް ގުޅުއްވައި ދިނުމަށް އެމްއެންޑީއެފްއިން އެދެއެވެ. ނުވަތަ ފެކްސް ކުރައްވާނަމަ 3391665 ނަންބަރަށް ފެކްސް ކުރެއްވުމަށް އެދިފައިވެއެވެ.