އަލް ޝިފާގައި ފޮރުވަން ޖެހޭ އެއްވެސް އެއްޗެއް ނޯންނާނެ: ފަލަސްޠީނުގެ ހެލްތް މިނިސްޓްރީ

އަލް ޝިފާ މެޑިކަލް ކޮމްޕްލެކްސްގައި ފޮރުވަން ޖެހޭ އެއްވެސް އެއްޗެއް ނޯންނާނެ ކަމަށް ފަލަސްޠީނުގެ ހެލްތް މިނިސްޓްރީގެ ތަރުޖަމާނު އަޝްރަފް އަލް ޤުދްރާ ވިދާޅުވެއްޖެއެވެ.

އަލްޖަޒީރާގައި އަޝްރަފްް އަށް ހަވާލާދީ ބުނެފައިވަނީ އަލް ޝިފާގެ އެތެެރޭގައި ތިބީ ޑޮކްޓަރުންނާއި ބަލިމީހުންނާއި ގެދޮރު ގެއްލިފައިތިބި ނިކަމެތިން ކަމަށެވެ.

“ފޮރުވަން ޖެހޭ ނުވަތަ ބިރުގަންނަން ޖެހޭ އެއްެވެސް ކަމެއް އަހަރެމެންގެ ނެތް” އަޝްރަފް ވިދާޅުވެފައިވެއެވެ.

އަޝްރަފް ވިދާޅުވެފައިވަނީ ޝިފާ މެޑިކަލް ކޮމްޕްލެކްސްގެ އެމަޖެންސީ ޑިޕާޓްމެންޓް އަށް އިޒްރާއިލް ސިފައިން ވަދެގަނެފައިވާ ކަމަށެވެ.

އަލް ޝިފާގެ މެޑިކަލް ސްޓާފުންނާއި ހަވާލާދީ އަލްޖަޒީރާގައި ބުނެފައިވަނީ އަލް ޝިފާގައި 650 ބަލިމީހުން އެބަތިބި ކަމަށާއި، 5000 އާއި 7000 އާއި ދެމެދަކަށް ގެދޮރު ގެއްލިފައިވާ މީހުން އަލް ޝިފާ ކޮމްޕްލެކްސް ގައި އެބަތިބިކަމަށެވެ.

ސައުންޑް އޮފް ޣައްޒާގައި ބުނެފައިވަނީ އިޒްރާއިލްގެ ސިފައިން އަލް ޝިފާގެ ޑޮކްޓަރުން ވަކިވަކިން ގެންގޮސް ސުވާލުކުރަމުންދާ ކަމަށެވެ. އަދި ލަފާކުރެވެނީ ޝިފާ ހުސްކުރުމަށް އެމީހުން މަސައްކަތް ކުރާކަމަށެވެ.

އަލްޝިފާ އަށް އިޒްރާއިލް ސިފައިން ދިން ވަރުގަދަ ހަމަލާއެއްގެ ސަބަބުން އެތަނުން އެތައް ބަޔަކު ޝަހީދުވެފައިވާ އިރު، ކަރަންޓު ނުލިބުމުގެ ސަބަބުން ޝިފާގެ އައިސީޔޫގައި ތިބި ބަލިމީހުންނާއި ނިކޫގައި ފަރުވާ ދެވެމުންދިޔަ އެތައް ކުއްޖަކު ވަނީ ޝަހީދުވެފައެވެ.

އިޒްރާއިލުން 7 އޮކްޓޫބަރުގައި ޣައްޒާއަށް ދޭން ފެށި ހަމަލާތަކުގެ ސަބަބުން މިހާތަނަށް 11،200 އަށް ވުރެ ގިނަ މީހުން ވަނީ ޝަހީދުވެފައެވެ.