"ހެޔޮ ކަންކަމަށް އަމުރުކޮށް ނުބައި ކަންކަން ނަހީ ނުކުރާ ނަމަ، އެބައެއްގެ މައްޗަށް އުގޫބާތެއް ފޮނުއްވުން ގާތްވެގެންވޭ"

ހެޔޮ ކަންކަމަށް ޢަމުރުކޮށް ނުބައި ކަންކަން ނަހީ ނުކުރާ ނަމަ، އެބައެއްގެ މައްޗަށް، މާތް الله ގެ ހަޟުރަތުން ޢާއްމުވެގެންދާފަދަ އުގޫބާތެއް ފޮނުއްވުން ގާތްވެގެންވާ ކަމަށް އަހަރެމެންގެ ރަސޫލާ ޞައްލައްالله ޢަލައިހި ވަސައްލަމް ގެ ހަދީޘް ބަސްފުޅުން އެނގޭ ކަމަށް މިއަދުގެ ޚުތުބާގައި ބުނެފިއެވެ.

ހެޔޮ ކަންކަމަށް އަމުރު ކުރުމާއި ނުބައި ކަންކަން ނަހީ ކުރުމުފެ މައްޗަށް އަލި އަޅުވާލައި މިއަދު އިއްވި ޚުތުބާއި ބުނީ، މާތް الله އަށް ،އީމާންވުމާއި، ހެޔޮ ކަންކަމަށް އަމުރު ކުރުމާއި، މުންކަރާތްތައް މަނާ ކުރުމާއި، އެއްބަޔަކު އަނެއް ބަޔަކަށް ހެޔޮކަންތައްތަކުގައި އެހީތެރިވުމާއި، ނުބައި ކަންކަމުން މުޖުތަމަޢު ހިމާޔަތްކޮށް ރައްކާތެރި ކުރުމަށް މަސައްކަތް ކުރުމަކީ، އިސްލާމްދީނުގެ މައިގަނޑު އަސާސްތަކުގެ ތެރެއިން ހިމެނޭ ކަންކަން ކަމަށެވެ.

"ޢުމަރު ބުނު ޚައްޠާބު ރަޟިޔަالله އަންހު ވިދާޅުވިއެެވެ. "މިއުންމަތުގެ މީހެއްކަމުގައި ވުމަށް އެދޭމީހާ، ފަހެ އުންމަތުގެ މީހެއްކަމުގައި ވުމުގެ ޝަރުތު (އެބަހީ: ހެޔޮކަންތަކަށް އަމުރުކުރުމާއި މުންކަރާތްތައް މަނާ ކުރުމުގެ ޝަރުތު ފުރިހަމަ ކުރާހުށިކަމެވެ!"

ޚުތުބާ

މިއާއެކު ޚުތުބާގައި ބުނީ، ހެޔޮކަންތަކަށް އަމުރުކުރުމާއި، މުންކަރާތްތައް މަނާކުރުމުގެ ޒިންމާއަކީ، އިސްލާމީ އުންމަތުގެ ހުރިހާ ފަރުދުންގެ ބޮލުގައި މާތް الله އަޅުއްވާފައިވާ ޒިންމާއެއް ކަމަށެވެ. އަދި ކޮންމެ މީހަކުވެސް އެމީހެއްގެ ފެންވަރާއި ހައިސިއްޔަތުން އެޒިންމާ އަދާކުރަންޖެހޭނެ ކަމަށެވެ.

ހަމައެހެންމެ، އިސްލާމީ ވެރިކަމެއްގެ އެންމެ މުހިންމު ވާޖިބަކީވެސް މީސްތަކުންނަށް އިސްލާމްދިނުގައި އަންގާފައިވާ ކަންކަމަށް ބާރު އެޅުމާއި، ދީނީ ކަންކަމާއި ބެހޭ ޢިލްމު އާންމު ކުރުމާއި، އިސްލާމީ ޝިޢާރުތައް ނެގެހެއްޓުމާއި، މުޖުތަމަޢުގައި ހިނގާ ނޭއްގާނީ ކަންކަން މަނާ ކުރުން ކަމަށް ޚުތުބާގައި ފާހަގަކޮށްފައިވެއެވެ.

ޚުތުބާގައި އިތުރަށް ބުނީ، މުޖްތަމައެއް ތަހުޒީބުވާނީ އެ މުޖްތަމައެއްގައި ހުރި އެންމެހައި ނޭއްގާނީ ކަންކަން މަނާކުރެވި، ހެޔޮކަންތަކަށް އަމުރު ކުރެވިގެން ކަމަށެވެ. އަދި އެ މުޖްތަމައެއްގައި ހިނގާ މުންކަރާތްތައް މަނާ ނުކުރެވޭނެނަމަ އެބަޔަކު އެވަނީ، އެބައެއްގެ އަމިއްލަ އަތްތަކުން، ހަލާކުގެ ދޮރުތައް ހުޅުވާފައި ކަމަށްވެސް ހުތުބާގައި ބުނެފައިވެ އެވެ.

ރަސޫލާ ޞައްލައްالله ޢަލައިހި ވަސައްލަމް ހަދީޘް ކުރެއްވިއެވެ. އެ ފަރާތެއްގެ އަތްޕުޅުގައި ތިމަންކަލޭގެފާގެ ނަފްސުވާ، ފަރާތްޕުޅު ގަންދެއްވައި ވިދާޅުވަމެވެ. ހަމަކަށަވަރުން ތިޔަބައިމީހުން ހެޔޮކަންތަކަށް އަމުރު ކުރާހުށިކަމެވެ. އަދި ހަމަކަށަވަރުން މުންކަރާތްތައް މަނާ ކުރާހުށިކަމެވެ. ނޫން ނަމަ މާތް الله އެކަލާނގެ ޙަޟްރަތުން ތިޔަބައިމީހުންގެ މައްޗަށް އާންމުވެގެންދާފަދަ އުގޫބާތެއް ފޮނުއްވުން ގާތްވެގެންވާކަން ކަށަވަރެވެ. ދެން އެހިނދުގައި ތިޔަބައިމީހުން އެކަލާނގެ އަށް ދުއާ ކުރިކަމުގައި ވީ ނަމަވެސް ތިޔަބައިމީހުންގެ ދުއާ އިޖާބަ ނުކުރެއްވޭހުއްޓެވެ.

ޚުތުބާ

ހުތުބާގައި އިތުރަށް ބުނީ ހެޔޮކަންތަކަށް އަމުރުކޮށް ނުބައި ކަންތައް މަނާކުރުމުގެ މަސައްކަތަށް ބަޔަކު އަބަދުވެސް ނިކުމެ، އެކަމަށް ހުސްވެފައި ތިބުމަށް މާތް الله ވަނީ އަމުރުކުރައްވާފައިވާ ކަމަށެވެ. އަދި އެމީހުންނަކީ ކާމިޔާބުގެ އަހުލުވެރިން ކަމުގައި މާތް الله އަންގަވާފައިވާ ކަމަށްވެސް ބުނެފައިވެއެވެ.