ސީދާ ތިން ސެޓުން ޓީއޯ ސްޕޯޓްސް ކުލަބު ބަލިކޮށް ކެލާ ކައުންސިލްގެ ޓީމު ސެމީގެ ޖާގައެއް ކަށަވަރުކޮށްފި

ކުލަބު ޖީއެސްގެ ފަރާތުން އިންތިޒާމްކޮށްގެން ހއ.ހޯރަފުށީގައި މިހާރު ކުރިއަށްދާ "2 ވަނަ ޖީއެސް ވޮލީބޯޅަ ޓޯނަމަންޓް" ގައި މިއަދު ހަވީރު ޓީއޯ ސްޕޯޓްސް ކުލަބާއި ކެލާ ކައުންސިލްގެ ޓީމު ވާދަކުރި މެޗު ފަސޭހަކަމާ އެކު ސީދާ ތިން ސެޓުން، ކާމިޔާބުކޮށް ކެލާ އިން މުބާރާތުގެ ސެމީ ފައިނަލުގެ ޖާގައެއް ކަށަވަރުކޮށްފިއެވެ.

މުބާރާތުގައި ކެލާ ކައުންސިލްގެ ޓީމު ކުޅުނު ފުރަތަަމަ މެޗުގައި ތިން ސެޓު އެއް ސެޓުން ޓީމު ޕާމް އަތުން ބަލި ނަމަވެސް ޖެހިގެންއައި މެޗުގައި އެޓީމު ވަނީ ވާދަވެރި ކުޅުމަކަށްފަހު ތިން ސެޓު ދެ ސެޓުން ޓީމު ހިޔާ އަތުން މޮޅުވެފައެވެ. އަދި ޓީއޯ ސްޕޯޓްސް ކުލަބު މުބާރާތުގައި ކުޅުނު ފުރަތަަމަ މެޗުގައި ޓީމު ޕާމް އަތުން އެޓީމު ބަލިވީ ސީދާ ތިން ސެޓުންނެވެ.

މިމެޗުގެ ފުރަތަަމަ ސެޓުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު ކެލާ ކައުންސިލްގެ ޓީމުން ކާމިޔާބުކުރީ 23-25 އިންނެވެ. އަދި ދެވަނަ ސެޓް ފަސޭހަކަމާއި އެކު 13-25 އިން ކާމިޔާބުކުރި އިރު، ތިންވަނަ ސެޓް އެޓީމުން ކާމިޔާބުކުރީ 22-25 އިންނެވެ. އަދި މިމެޗުގެ މޮޅު ކުޅުންތެރިޔަކަށް ހޮވުނީ ކެލާ ކައުންސިލް ޓީމުގެ މުއައްވަޒު އެވެ.

މުބާރާތުގައި މިރޭ ކުޅޭ މެޗުގައި ޓީމު ހިޔާ އާއި ޓީމު ޕާމް ވާދަކުރާ މެޗުން ޕާމް މޮޅުވެއްޖެނަމަ ލީގު ބުރުގެ އެއްވަަނަ ޓީމުގެ ގޮތުގައި މުބާރާތުގެ ފައިނަލުގެ ޖާގައެއް އެޓީމަށް ލިބިގެންދާނެއެވެ. ނަމަވެސް މިމެޗުން ޓީމު ހިޔާ މޮޅުވެއްޖެ ނަމަ ލީގު ބުރުގެ ފަހު މެޗުގައި މާދަމާރޭ ޓީއޯ ސްޕޯޓްސް ކުލަބާއި ދެކޮޅަށް ކުޅޭމެޗުން މޮޅުވެ މުބާރާތުގެ ސެމީ ފައިނަލުން ޖާގަ ހޯދުމުގެ ފުރުސަތު އެޓީމަށް ވެސް އެބައޮތެވެ.

މި މުބާރާތަކީ ހޯރަފުށީގައި ވޮލީބޯޅަ ދިރުވައި އާލާކުރުމުގެ އިތުރުން ރަށުގެ ޒުވާނުންގެ މެދުގައި އެކުވެރިކަމާއި އެއްބައިވަންތަކަން އާލާކުރުމުގެ މަގުސަދުގައި 2021 ވަނަ އަހަރު ހއ.ހޯރަފުށީގައި ހަރަކާތެރިވާ ކުލަބު ޖަމިއްޔާތަކާއި ސަރުކާރުގެ އޮފީސްތަކާއި، ސަރުކާރު ހިއްސާވާ ކުންފުނިތަކުގެ އިތުރުން އަމިއްލަ ކުންފުނިތަކާއި އަމިއްލަ ވިޔަފާރިތަކަށް ބައިވެރިވުމުގެ ފުރުސަތު ހުޅުވާލައިގެން ކުލަބު ޖީއެސް އިން ބާއްވަން ފެށި މުބާރާތެކެވެ.

ޗެންޕިއަން ޓީމަށް 25000 ރުފިޔާ އަދި ރަނައަޕް ޓީމަށް 10000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި މިއަހަރު ހަތަރު ޓީމު ބައިވެރިވެފައިވާއިރު، މި މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ހަތަރު ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއް މެޗު ކުޅެ އެންމެ ގިނަ ޕޮއިންޓް ހޯދާ ދެޓީމު ފައިނަލަށް ހޮވޭގޮތަށެވެ.