ބައު ދަގަނޑުގެ ވިޔަފާރިއަށް ހުޅުމާލެ އިން ބިން ކުއްޔަށް ދޫކުރަނީ

ބައު ދަގަނޑު ގަނެ ވިއްކާ ހަދާ ވިޔަފާރިއަށް ހުޅުމާލެއިން ބިން ކުއްޔަށް ދިނުމަށް ހައުސިންގް ޑިވަލޮޕްމެންޓް ކޯޕަރޭޝަނުން ނިންމައިފިއެވެ.

އެކޯޕަރޭޝަނުން ބުނެފައިވަނީ ހުޅުމާލޭގެ އެކި ސަރަހައްދު ތަކުގައި ގިނަ އަދަދެއްގެ މަޝްރޫއުތައް އެއްފަހަރާއި ކުރިޔަށް  ގެންދިޔުމާއި ގުޅިގެން ގިނަ އަދަދެއްގެ ބާދަގަނޑު ފަދަ ތަކެތި ގިނަވެ މިތަކެތި ވިއްކާ ވިޔަފާރި ކުރާ ފަރާތްތައް އާންމުވެފައިވާކަމަށެވެ.  މިގޮތުން، މިވިޔަފާރި ކުރަމުން ގެންދާ ބައެއް ފަރާތްތަކުން މަގާއި ދުވާރު ފަދަ ތަންތަން ނަހަމަ ގޮތުގައި ބޭނުން ކުރަމުން ގެންދާކަން އެކޯޕަރޭޝަނަށް ފާހަގަ ކުރެވިފައިވާ ކަމަށެވެ. އެހެންކަމުން، މިކަންކަމަށް ހައްލެއް ގެނައުމުގެ ގޮތުން އާންމުން ދިރިއުޅޭ ސަރަހައްދާއި ދުރުން މިފަދަ ވިޔަފާރި ކުރާ ފަރާތްތަކަށް ބިން ކުރުމުއްދަތަށް ދޫކުރުމަށް އެ ކޯޕަރޭޝަނުން ނިންމާފައިވާ ކަމަށެވެ.

މިގޮތަށް ބިން ދޫކުރުމުގެ އެއްމެ ބޮޑު މަޤުސަދަކީ  ދަގަނޑު ވަގަށް ނެގުން ގިނަވެ، ވަގަށް ނަގާފައިވާ ދަގަނޑު ވިއްކުން އާއްމުވެފައި ވުމާއި، ހުޅުމާލޭގެ އެކި ސަރަހައްދުތަކުން ކޭބަލް ފަދަ ތަކެތި ވަގަށް ނަގައި އޭގެ ވިޔަފާރި ކުރަމުން ދާތީ  އެކަންކަން ހުއްޓުވައި އުސޫލެއްގެ ތެރެއިން ބާދަގަނޑުގެ ވިޔަފާރި ކުރާ ފަރާތްތަކަށް  އެވިޔަފާރި ކުރުމުގެ ފުރުސަތު ފަހިކޮށްދިނުން ކަމަށެވެ.

މީގެ އިތުރުންވެސް މިގޮތަށް ބަހެއްޓިފައި ހުންނަ ދަގަނޑުތައް އަދި ވަޅުލެވިފައި ހުންނަ ކޭބަލްތައް ވަގަށް ނަގައި އޭގެ ވިޔަފާރި ކުރާ ފަރާތްތައް ދެނެގަތުމަކީ ވެސް މިގޮތަށް ބިން ދޫކުރުމުގެ އެއް ބޭނުން ކަމަށް ވެސް އެޗްޑީސީ އިން ބުނެފައިވެއެވެ.

އަދި 15 ފެބްރުއަރީ 2023 ވާ ބުދަ ދުވަހުން ފެށިގެން އިސްވެ ދެންނެވުނު ފަދައިން އާންމުންނަށް އުނދަގޫ ވާނެހެން މަގާއި ދުވާރު ބަންދު ކޮށްގެން ނަހަމަ ގޮތުގައި ބޭނުންކުރާ ފަރާތްތަކާއި މެދު އެކޯޕަރޭޝަނުން ފިޔަވަޅު އަޅުމަށް ނިންމާފައިވާ ކަމަށްވެސް އެކުންފުނިން ބުނެފައިވެއެވެ.

ބައު ދަގަނޑުގެ ވިޔަފާރި ކުރުމަށް ބިން ބޭނުން ވާ ފަރާތްތަކަކީ ވިޔަފާރި ހުއްދައާއި އެކްސްޕޯޓް ލައިސެންސް އޮތް ފަރާތެއް ކަމުގައިވާން ޖެހޭނެ ކަމަށާއި،  އަދި އެކޯޕަރޭޝަނަށް ދައްކަންޖެހި ނުދައްކާ އެއްވެސް ފައިސާއެއް އޮތް ފަރާތެއް ކަމުގައިވެގެންނުވާނެ ކަމަށް އެކޯޕަރޭޝަނުން ބުނެފައިވެއެވެ.