ސަރުކާރު މިދަނީ ނިމެން، ކުންފުނިތައް އޮތީ މަސައްކަތްތެރިންނަށް ދަރާފައި: އާދަމް ޝަރީފް

ސަރުކާރު ނިމެން ކުޑަތަންވެފައިވާއިރު، އެތައް ބަޔަކު ލައްވާ މަސައްކަތްކުރުމަށްފަހު ސަރުކާރު ކުންފުނިތަކުން ލާރި ނުދީއޮތް މައްސަލައިގެ ކަންބޮޑުވުން މަސައްކަތްތެރިން ފާޅުކުރަމުންދާ ކަމަށް މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު ވިދާޅުވެއްޖެ އެވެ.

އާދަމް ޝަރީފް މިފަދައިން ވިދާޅުވެފައި ވަނީ ސަރުކާރުގެ ފަރާތުން ހުށައަޅުއްވާފައިވާ އިންޑަސްޓްރިއަލް ރިލޭޝަންސް ބިލަށް މަޖިލީހުގައި ބަހުސްކުރައްވަމުން ނެވެ.

އާދަމް ޝަރީފު ވިދާޅުވީ މި ސަރުކާރުން މަސައްކަތްތެރިންނަށް ކުރިމަތިކުރުވި އެކި ފިއްތުންތަކާއެކު އެމީހުން ތިބީ ގޮސް ހުސްވެ، ވަރަށް ބޮޑަށް ބިކަވެފައި ކަމަށެވެ.

ފެނަކައިން މިސާލު ނަންގަވަމުން އާދަމް ޝަރީފް ވިދާޅުވީ ފެނަކައިން އެކަނި މަސައްކަތްތެރިންނަށް (ކުދި ވިޔަފާރިތަކަށް) 2 ބިލިއަނަށްވުރެ ގިނަ ފައިސާ ދައްކަން އޮތް އިރު އެ ފައިސާތައް ނުދިނުމުގެ ސަބަބުން މަސައްކަތްތެރިންނަށް އިތުރު މަސައްކަތްތައް ނުކުރެވޭ ހާލަތަށް ގޮސްފައިވާކަމަށެވެ.

"ޕޭމަންޓު ނުލިބުމުގެ މައްސަލަ، މި މައްސަލަ އިންތިހާއަށް މި މައްސަލަ އޮތް އިރު ބޮޑެތި ދަރަނިތައް ބޮލުގައި އަޅައިގެން ވިޔަފާރިކުރަން ފެށި ފަރާތްތަކަށް ސަރުކާރުގެ ކުންފުނިތަކުން ލިބެންޖެހޭ ފައިސާ ނުލިބުމުގެ މައްސަލައަކީ މި ސަރުކާރު އެންމެ ބޮޑަށް ބަދުނާމުވާ ސަބަބު"

މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު

އާދަމް ޝަރީފު ވިދާޅުވީ ސަރުކާރު ނިމެންދާއިރު، ކުންފުނިތަކުން ބޮޑެތި އަދަދުތަކުން މަސައްކަތްތެރިންނަށް ދަރާފައި އޮތުމަކީ މުސްތަގުބަލުގައި ބޮޑެތި ގޮންޖެހުންތަކެއް ކުރިމަތިވާނެ ކަމެއް ކަމަށެވެ.

އޭގެ އިތުރުން ކުންފުނިތަކުން ވިޔަފާރިވެރިންނަށް ބޮޑެތި އަދަދުތަކުން ދަރާފައި އޮތުމަކީ އަންނަން އޮތް ސަރުކާރަށް ވެސް ބޮޑު ބުރައެއް އުފުލަން ޖެހޭނެ ކަމެއްގެ ގޮތުގައި އާދަމް ޝަރީފް ސިފަކުރެއްވި އެވެ.