އީރާނުގެ އިންޒާރާއެކު އިސްރާއީލްގެ ރައްޔިތުން ބިންގަރާސްތެރެއަށް ވަންނަން ފަށައިފި
ލިޔުންތެރިޔާ
އަބްދުﷲ ހުސައިން
އިސްރާއީލުން ދިން މިސައިލް ހަމަލާތަކަށް ރައްދު ދޭނޭކަމުގެ އިންޒާރާއެކު، އިސްރާއީލްގެ ރައްޔިތުން ބިންގަރާސްތަކަށް ވަންނަން ފަށައިފިއެވެ.
އަލްޖަޒީރާއިން ބުނެފައިވަނީ، އީރާނުން ރައްދު ހަމަލާތަކުގެ އިންޒާރާއެކު ތެލްއަވީވް ތައްޔާރީ ހާލަތަކަށް އައިސްފައިވާކަމަށެވެ. އެގޮތުން ތެލް އަވީވްގެ ތެރެއިން ސައިރަންގެ އަޑު އިވެމުންދާއިރު، ގިނަ އަދަދެއްގެ ރައްޔިތުން ބިންގަރާސްތަކަށް ވަންނަން ފަށާފައިވާކަމަށް އަލްޖަޒީރާއިން ވަނީ ރިޕޯޓްކޮށްފައެވެ.
އިސްރާއީލުން ދިން ހަމަލާތަކުގެ ރައްދެއްގެ ގޮތުން އީރާނުން މިއަދު ވަނީ ޤަތަރުގައި ހުރި އެމެރިކާގެ ބޭސްތަކަށް އަމާޒުކޮށް ރައްދު ހަމަލާތައް ފޮނުވާލާފައެވެ. ނަމަވެސް އިސްރާއީލަށް އަމާޒުކޮށް ހަމަލާތައް ފޮނުވާލިކަމެއް އަދި ބުނެފައެއް ނުވެއެވެ. މީގެ ތެރެއިން ފޮނުވާލި ބައެއް މިސެއިލްތައް ގޮއްވާލާފައިވާކަަމަށް ޤަތަރުގެ ޑިފެންސް މިނިސްޓްރީން ވަނީ ބުނެފައެވެ.
އީރާނުން ވަނީ އިސްރާއީލް އަދި އެމެރިކާއިން ދިން ހަމަލާތަކަކީ ބައިނަލްއަޤްވާމީ ޤާނޫނުތައް މުގުރާލުމަށްފަހު ދިން ހަމަލާއެއްކަމަށް ބުނެފައެވެ. އެގޮތުން ހަނގުރާމަވެރި ހަތިޔާރުތައް އުފެއްދުމުގެ ބޭނުމުގައި އެޤައުމުން ނިއުކްލިއާ ހަކަތަ ތަރައްޤީ ކުރަމުން ނުދާކަން އީރާނުން މިއަދުވެސް ވަނީ ތަކުރާރުކޮށް ބުނެފައެވެ.
އީރާނުން ބުނީ އެޤައުމަށް ހަމަލާދިން ކޮންމެ ތަނަކަށް ހަމާތައް ދޭނޭކަމަށާއި، އިސްރާއީލުގެ ހުރިހާ މުދަލަކާއި މަސްލަޙަތު ހިމެނޭ ސަރަހައްދުތަކަށް ހަމަލާދިނުމަކީ މިހާރު އެޤައުމަށް ލިބިފައިވާ ހައްޤެއްކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
