ރޯދަ މަހު ވިޔަފާރީގެ މަންފާ އިތުރު ކުރުމުގެ ބަދަލު އަތްފޯރާ އަގުތަކުގައި ތަކެތި ފޯރުކޮށްދިީ: ޚުތުބާ

ކުރިއަަށް އޮތް ރަމަޟާން މަހުގައި މީސްތަކުން އަތްފޯރާފަދަ އަގުތަކުގައި ތަކެތި ފޯރުކޮށްދީ، ރަމަޟާންމަހުގެ ދަރުމަޔާއި ޘަވާބު ހޯދުމަށް ގަދައަޅައި މަސައްކަތް ކުރުމަށް މިއަދުގެ ހުކުރު ޚުތުބާގައި ގޮވާލައިފިއެވެ.

"ރަމަޟާން މަހަށް ތައްޔާރުވުން" މި މައުޟޫއަށް ހާއްސަކޮށްގެން މިއަދު ދިން ހުތުބާގައި ބުނީ ރަމަޟާން މައްސަރާ ބައްދަލުކުރަންޖެހޭނީ އަހަރެމެންގެ ހަޔާތުގައި ކުރެވެމުންދާ ކުށްފާފަތަކާ ދުރުހެލިވެ، ހަޔާތް އާހަޔާތަކަށް ބަދަލުކޮށް އިސްލާހު ކުރުމާއެކު ކަމަށެވެ.

އަދި އީމާންކަމާއެކު الله ގެ ރަޟްރަތުގައި ދަރުމައާއި ސަވާބަށް އެދި ރަމަޟާން މަހު ރޯދަ ހިފައިފި މީހާގެ އިސްވެގޮސްދައިވާ ފާފަތައް ފުހެވިދާ ކަމަށް ރަސޫލާ (ޞޢވ) ހަދީޡްކުރައްވާފައިވާ ބަސްފުޅެއްގެ މާނައިގައިވާ ކަމަށް މިއަދުގެ ހުތުބާގައި ބުންޏެވެ.

މިއާއެކު ޚުތުބާގައި ވަނީ ރަމަޟާން މަހަކީ ވިޔަފާރީގެ ފައިދާއާއި މަންފާ އިތުރަށް ހޯދުމުގެ މަހަކަށް ހެދުމުގެ ބަދަލުގައި، މީސްތަކުން އަތްފޯރާފަދަ އަގުތަކުގައި ތަކެތި ފޯރުކޮށްދީ، އެ މައްސަރުގެ ދަރުމަޔާއި ޘަވާބު ހޯދުމަށް ގަދައަޅައި މަސައްކަތް ކުރާ މަހަކަށް ހެދުމަށް ވިޔަފާރިވެރިންނަށް ނަސޭހަތްތެރިވެފައެވެ.

އަދި މުވައްޒަފުންނަށް ފަސޭހަކޮށް، މި މަތިވެރި މައްސަރުގެ ފުރިހަމަ ޘަވާބާއި ދަރުމަ ލިބޭގޮތަށް، އަޅުކަމުގެ ކަންކަމަށް ފުށުނާރާނެހެން، މަސައްކަތުގެ މާހައުލު ބައްޓަންކުރުމަށް މުއައްސަސާތަކުގެ މަސްއޫލުވެރިންނަށްވެސް ވަނީ ނަސޭހަތްތެރިވެފައެވެ.

މީގެ އިތުރުން، ރަމަޟާންމަހުގެ ރޭތަކަކީ ހަމައެކަނި ކެއިން ބުއިމާއި، މަޖާކުރުމުގެ ރޭތަކަކަށް ނަހަދައި އެރޭތަކަކީ ދުންޔަވީ ގޮތުންނާއި އުޚްރަވީ ގޮތުން ފައިދާހުރި، ބޭނުންތެރި، ރޭތަކަކަށް ހެދުމަށް ޢަޒުމް ކަނޑައެޅުމަށ. ނަސޭހަތްތެރިވެފައެވެ.

"ޚާއްސަކޮށް، ފަހުދިހައިގެ ރޭތައް އިޙްޔާކޮށް ދިރުވުމުގެ މި މައްސަރާ ބައްދަލުކުރާށެވެ!" ޚުތުބާގައި ބުނެފައިވެއެވެ.