ރައީސް ޔާމިނާއި ދެކޮޅަށް އަދީބާއި ޒިޔަތުގެ ހެކިބަސް ނަގަން އެއްވެސް ކޯޓަކަށް ނޭންގޭނެ: ޑރ ޖަމީލު

އެމްއެމްޕީއާރުސީގެ ޚިޔާނާތާއި ގުޅުވާ ޕީޕީއެމްގެ ރައީސް އަދި އެ ޕާޓީގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ މައްޗަށް އުފުއްލާފައިވާ ދައުވާތަކުގައި، އެމަނިކުފާނާއި ދެކޮޅަށް އެމްއެމްޕީއާރުސީގެ ޚިޔާނާތް ސާބިތުވެފައިވާ ކުރީގެ ނައިބު ރައީސް އަހުމަދު އަދީބާއި، އެމްއެމްޕީއާރުސީގެ ކުރީގެ މެނޭޖިން ޑިރެކްޓާ އަބްދުالله ޒިޔަތުގެ ހެކިބަސް ބަލައިގަންނަން އެއްވެސް ކޯޓަކަށް ނޭންގޭނެކަމަށް ރައީސް ޔާމިންގެ އިސް ޤާނޫނީ ވަކީލު އަދި ކުރީގެ ނައިބު ރައީސް ޑރ މުޙައްމަދު ޖަމީލު އަހުމަދު ވިދާޅުވެއްޖެ އެވެ.

ޕީޕީއެމްގެ ޖަގަހަ ޖަލްސާގައި ވާހަކަދައްކަވަމުން ޑރ ޖަމީލު މިފަދައިން ވިދާޅުވެފައިވަނީ އަދީބާއި ޒިޔަތުގެ ހެކިބަސް ބަލައިގަތުމާއި ގުޅޭގޮތުން ސުޕްރިމް ކޯޓުގައި ކުރިއަށް ދިޔަ ފުއްގިރި މައްސަލައިގައި ނިންމާފައިވާ ނިންމުން ސާފުކޮށްދެއްވަމުން ނެވެ.

އެގޮތުން ޑރ ޖަމީލު ވިދާޅުވީ އެއް ކުށަކަށް ތުހުމަތު ކުރެވޭ މީހުންގެ ހެކިބަސް އެކަކު އަނެއްކަމުގެ މައްޗަށް ނެގުމާއި، އަދާވަތްތެރިންގެ ހެކިބަސް ޤަބޫލުކޮށްގެން ނުވާނެކަމަށް ނުވަތަ ޖާއިޒެއް ނުވާނެކަމަށް އިސްލާމީ ޝަރީއަތުގައި ވަރަށް ސާފުކޮށް ބަޔާންކޮށްފައިވާ ކަމަށެވެ. އަދި ދިވެހިރާއްޖޭގެ ޤާނޫނު އަސާސީގެ 10 ވަނަ މާއްދާގައި ވެސް އެކަން ވަރަށް ސާފުކޮށް ބަޔާންކޮށްފއިވާކަމަށް ޑރ ޖަމީލު ވިދާޅުވި އެވެ.

"އަޅުގަނޑުމެން ސުޕްރިމް ކޯޓާއި ހަމަޔަށް ދިޔައީ އެމީހުންގެ ހެކިބަސް ބަލައިގަނެދާނެތީއެއް ނޫން،.. އެމީހުންގެ ހެކިބަސް ބަލައެއް ނުގަނެވޭނެ. ސުޕްރިމް ކޯޓަށް ކަނޑައެޅޭ ކަމެއް ނޫން. ދިވެހިރާއްޖޭގެ ޤާނޫނު އަސާސީ ބުނަނީ ދިވެހިރާއްޖޭގެ ޝަރީއަތް ކުރާ ޤާނޫނުގެ މަސްދަރަކީ އިސްލާމީ ޝަރީއަތޭ"

ރައީސް ޔާމިންގެ އިސް ޤާނޫނީ ވަކީލު ޑރ މުހައްމަދު ޖަމީލު އަހުމަދު

ޑރ ޖަމީލުގެ ވާހަކައިގައި ވަނީ އަދީބާއި ޒިޔަތުގެ ހެކި ބަލައިނުގަތުމަށް ސުޕްރިމް ކޯޓަށް ހުށައެޅި ސަބަބަށް އަލިއަޅުވާލައްވާފަ އެވެ.

އެކަމަށް އަލިއަޅުވާލައްވާ ޑރ ޖަމީލު ވިދާޅުވީ އަލަށް ވުޖޫދުވެގެން އައި ހެއްކާއި ބެހޭ ޤާނޫނުގައި އެއްގޮތަކަށް ވެސް ކޯޓަށް ބަލައިގަނެގެން ނުވާނެ ހެކިތަކެއް ސާފުކޮށް ބަޔާންކޮށްފައިވާއިރު، އެ ހެކިތަކުގެ ތެރޭގައި އަދާވާތްތެރިކަން އޮތް ފަރާތްތަކުގެ ހެކިތައްވެސް ހިމެނޭކަމަށެވެ.

އެހެންކަމުން މީގެ ކުރިން އަމަލުކުރެވެމުން ދިޔަ ގަޮތާއި ޚިލާފަށް، ހެއްކާއި ބެހޭ ޤާނޫނުން އެކަން ކަނޑައަޅާފައި ވުމުން، އެކަމުގައި އަމަލުކުރަންވީ ގޮތުގެ ޤާނޫނީ ޙައްލެއް ލިބެން ޖެހޭތީ މައްސަލަ އިސްތިއުނާފުކުރީ އެ ޙައްލު ހޯދުމަށްކަމަށް ޑރ ޖަމީލު ވިދާޅުވި އެވެ.

އެއާއެކު ޑރ ޖަމީލު ވިދާޅުވީ ސުޕްރިމް ކޯޓުން ރައީސް ޔާމިންގެ ފަރާތުން ހުށައެޅުއްވި ކަންކަމަށް ޙައްލު ލިބިގެން ގޮސްފައިވާކަމަށެވެ. ސުޕްރިމް ކޯޓުން ފަހަރެއްގައިވެސް އަދީބާއި ޒިޔަތުގެ ހެކިބަސް ބަލައިގަންނަން ނިންމާފައި ނުވާކަނަށް ޑރ ޖަމީލު ފާހަގަކުރެއްވި އެވެ.

ޑރ ޖަމީލު ވިދާޅުވީ މި މައްސަލަ ކުރިއަށް ދާއިރު އަދިބާއި ޒިޔަތުގެ ހެކިބަސް ބަލައިގަނެވޭނެ އެއްވެސް ގޮތެއް ނޯންނާނެ ކަމަށެވެ. އަދި އެ މީހުންގެ ހެކިބަހާއި ނުލާ ރައީސް ޔާމިނަށް ދާދި ފަސޭހައިން ފުއްގިރި މައްސަލަ ކާމިޔާބުކުރެވިގެންދާނެ ކަމަށް ޑރ ޖަމީލު ވިދާޅުވި އެވެ.