ޕީޕީއެމް ނޫނީ މެދުނުކެނޑި 5 މަސް ދުވަހު މުޒާހަރާ ކުރެވުނު އެއްވެސް ޕާޓީއެއް ނެތް: އަބްދުއްރަހީމް

ޕްރޮގްރެސިވް ޕާޓީ އޮތް މޯލްޑިވްސް (ޕީޕީއެމް) ނޫނީ ވިދިވިދިގެން 5 މަސް ދުވަހު މެދުކެނޑުމެއް ނެތި މަގުމަތީ މުޒާހަރާތައް ކުރިއަށް ގެންދެވުނު އެއްވެސް ސިޔާސީ ޕާޓީއެއް ރާއްޖޭގެ ސިޔާސީ މަޝްރަހުގައި ނެގްކަމަށް އިދިކޮޅު އިއްތިހާދު (ޕީޕީއެމް-ޕީއެންސީ ކޯލިޝަން) ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ.

ޕީޕީއެމް އޮފީހުގައި ބޭއްވި ޖަލްސާއެއްގައި ވާހަކަދައްކަވަމުން އަބްދުއްރަހީމް ވިދާޅުވީ ޕާޓީގެ ލީޑަރުގެ ހައްގުގައި އެންމެ ގިނަ މަސައްކަތްތަކެއް ކުރި ޕާޓީއަކަށް ޕީޕީއެމް-ޕީއެންސީ ކޯލިޝަން ވާނެ ކަމަށެވެ. ޕީޕީއެމްގެ ސަޕޯޓަރުން ރައީސް ޔާމީންގެ ހައްޤުގައި އެ ވެވަޑައިގަންނަވާ ގުރުބާނީއަކީ މިހާތަނަށް އެއްވެސް ސިޔާސީ ޕާޓީއަކުން އެމީހުންގެ ލީޑަރެއް ދިފާއުކުރުމަށް ވީ ގުރުބާނީއެއް ނޫންކަމަށް އޭނާ ފާހަގަކުރެއްވި އެވެ.

އެވާހަކައާއި ގުޅުވާ އަބްދުއްރަހީމް ވަނީ ރައީސް ޔާމިންގެ ހައްގުގައި މަސައްކަތް ކުރައްވާ ހުރިހާ ފަރާތްތަކަށް ވަކިން ޚާއްސަކޮށް ޕީޕީއެމްގެ މުޒާހަރާތަކުގައި ހަރަކާތްތެރިވާ އަންހެނުންނަށް ޝުކުރު އަދާކުރައްވާފަ އެވެ.

"ރައީސް ޔާމިންގެ ހައްޤުގައި ރައީސް ޔާމިންގެ ސަޕޯޓަރުން ކުރައްވަމުން ގެންދަވާ މަސައްކަތަކީ ދިވެހިރާއްޖޭގެ އެއްވެސް ސިޔާސީ ޕާޓީތަކަށް ކުރެވުނު މަސައްކަތެއް ނޫން. މެދުކެނޑުމެއް ނެތި 5 މަސް ދުވަހު މުޒާހަރާކުރެވުނު އެއްވެސް ސިޔާސީ ޕާޓީއެއް މި ރާއްޖެއަކު ނެތް. މިކަމުގެ އެންމެ ބޮޑު ޝުކުރެއް އަޅުގަނޑު އަދާކުރާނީ ރައީސް ޔާމިނަށްޓަކައި ޖާނާ މާލުން ގުރުބާން ވަމުންދާ އަންހެން ކަނބަލުންނަށް"

ޕީއެންސީގެ ރައީސް އަބްދުއްރަހީމް އަބްދުالله

އަބްދުއްރަހީމް ވިދާޅުވީ ރައީސް ޔާމިންގެ ޤާނޫނީ ޓީމަށް ފުރިހަމައަށް އިތުބާރު ކުރައްވާ ކަމަށެވެ. އަދި ކޯޓުން އެމަނިކުފާނު މިނިވަންވެވަޑައިގަންނަވާނެ ކަމުގެ ފުރިހަމަ ޔަގީންކަން ވެސް އޮތް ކަމަށެވެ.

މިހާރު އެމަނިކުފާނުގެ ސަޕޯޓަރުން ކުރައްވަންވީ ކަމަކީ ރައީސް ޔާމިންގެ ރިޔާސީ ކެމްޕޭނުގެ މަސައްކަތްކަމަށް އަބްދުއްރަހީމް ވިދާޅުވި އެވެ.

އެގޮތުން އެމަނިކުފާނު މިނިވަންވެ ވަޑައިގެން ސިޔާސީ މަސައްކަތާއި ގުޅިވަޑައިގަންނަވަންދެން މަޑުނުކޮށް، ރަށްރަށުގައި ކެމްޕޭނު ހަރަކާތްތައް ފެށުމަށް އަބްދުއްރަހީމް ވަނީ އެދިވަޑައިގަންނަވާފަ އެވެ.

އެއާއެކު އޭނާ ވިދާޅުވީ އަންނަ ހަފްތާއިން ފެށިގެން ޕީޕީއެމް-ޕީއެންސީގެ ލީޑަޝިޕްގެ ބޭފުޅުން ރަށްތަކަށް ކެމްޕޭނު ދަތުރުތައް ފައްޓަވާނެކަމަށެވެ.

އެންމެން ގުޅިގެން ކުރެވޭ މަސައްކަތުން ރައީސް ޔާމިން އަނބުރާ ވެރިކަމަށް ގެނެވޭނެ ކަމަށާއި، ރައީސް ޔާމީންގެ ސަޕޯޓަރުންގެ ހިތްވަރު އެލުވާނުލާ މިހާރަށްވުރެ އަޒުމު ވަރުގަދަކޮށް އަންނަ ރިޔާސީ އިންތިޚާބު އެމަނިކުފާނަށް ކާމިޔާބުކޮށްދިނުމަށް މަސައްކަތްކޮށްދެއްވުމަށް އަބްދުއްރަހީމް ވަނީ އެދިވަޑައިގެންފަ އެވެ.