ހަފްތާ ބަންދަށް ފަހު ރައީސް ޔާމީންގެ ރިޔާސީ ކެމްޕޭނު ދަތުރުތައް ފަށަނީ!
މި ހަފްތާ ބަންދަށްފަހު ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ ކެމްޕޭނު ފަށާ، ލީޑަޝިޕްގެ ބޭފުޅުން އަތޮޅުތެރެއަށް ވަޑައިގަންނަވާނެކަމަށް އިދިކޮޅު އިއްތިހާދުން ހާމަކޮށްފި އެވެ.
އެކަން ހާމަކުރައްވާފައި ވަނީ ޕީޕީއެމް މައި އޮފީހުގައި ރޭ ބޭއްވި ޖަލްސާއެއްގައި، އިދިކޮޅު އިއްތިހާދު ވަގުގީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވާހަކަދައްކަވަމުން ނެވެ.
އަބްދުއްރަހީމް ވިދާޅުވީ މިއަދު އެންމެ އިސްކަމެއް ދީގެން ކުރަން ޖެހިފައިވަނީ ރައީސް ޔާމީންގެ ރިޔާސީ ކެމްޕޭނުގެ މަސައްކަތްތައް ކަމަށެވެ.
އެގޮތުން މި ހަފްތާ ބަންދު ނިންމާ އިދިކޮޅު ލީޑަޝިޕްގެ ބޭފުޅުން އަތޮޅުތެރެއަށް ކެމްޕޭނު ދަތުރުތައް ފައްޓަވާނެކަމަށް އަބްދުއްރަހީމް ވިދާޅުވި އެވެ. އަދި އޭނާ ވިދާޅުވީ ކެމްޕޭނު ދަތުރަށް ކުރިއަށް ގެންދާނެ ގޮތާއި ގުޅޭގޮތުން މިހާރު ލީޑަޝިޕްގެ މެދުގައި މަޝްވަރާތައް ވެސް ކުރެވިފައިވާ ކަމަށެވެ.
"އަޅުގަނޑުމެން ކުރަންވީ ކަމަކީ އެހެން ހުރިހާކަމެއް ހުއްޓާފަ ރައީސް ޔާމީން ވެރިކަމަށް ގެނައުމުގެ މަސައްކަތް ކުރަންވީ. އަޅުގަނޑުމެންގެ ލީޑަޝިޕްގެ މެދުގައި ވާހަކަދައްކާފަ އޮންނާނީ މި ހަފްތާއިން ފެށިގެން ކޮންމެ ހަފްތާއަކު އަޅުގަނޑުމެންގެ ޓީމުތައް އަތޮޅުތެރެއަށް ދަތުރުކުރަމުން ގެންދާގޮތަށް. ރައީސް ޔާމިނުގެ ކެމްޕޭނުގައި"
ޕީއެންސީގެ ރައީސް އަބްދުއްރަހީމް އަބްދުالله
ރައީސް ޔާމިނަކީ ޕީޕީއެމްގެ ރިޔާސީ ކެންޑިޑޭޓުކަމަށް ނިންމާފައިވަނީ އިދިކޮޅު އިއްތިހާދުގެ ޖޮއިންޓް ކައުންސިލްގެ އިއްތިފާގުންނެވެ. އެމަނިކުފާނަށް ރިޔާސީ ޓީކެޓު ރަސްމީކޮށް ހަވާލުކުރައްވާފައިވަނީ އެކަމަށްޓަކައި ބޭއްވި ޚާއްސަ ހަފްލާއެއްގެ ތެރެއިން ނެވެ.
އެހެން ނަމަވެސް މިދިޔަ ޑިސެމްބަރު މަހު ވ އާރަށުގެ މައްސަލައާއި ގުޅުވާ ރައީސް ޔާމިނުގެ މައްޗަށް އިއްވި 11 އަހަރުގެ ޖަލު ހުކުމާއި ގުޅިގެން އެމަނިކުފާނު މިވަގުތު ގެންދަވަނީ ޖަލުހުކުމެއް ތަންފީޒުކުރައްވަމުން ނެވެ.
އާރަށު މައްސަލައާއި ގުޅިގެން ރައީސް ޔާމިނުގެ މައްޗަށް ކޮށްފައިވަނީ ނުހައްގު ހުކުމެއްކަން ފާހަގަކޮށް އެމަނިކުފާނުގެ ފަރާތްޕުޅުން އެ މައްސަލަ ހައިކޯޓުގައި އިސްތިއުނާފުކޮށްފައި ވާއިރު، ވަރަށް އަވަހަށް އެ މައްސަލަ ފެށިގެންދާނެ ކަމަށް އެމަނިކުފާނުގެ ޤާނޫނީ ޓީމުން ވަނީ ވިދާޅުވެފަ އެވެ.
އެ މައްސަލަ ކާމިޔާބުކުރައްވާ ރައީސް ޔާމީން މިނިވަންވެ ވަޑައިގަންނަވާނެކަމުގެ ފުރިހަމަ ޔަގީންކަން އޮތްކަމަށްވެސް ޤާނޫނީ ޓީމުން ގެންދަވަނީ ވިދާޅުވަމުން ނެވެ.
އެ ޔަގީންކަމާއެކު އިދިކޮޅުން ރިޔާސީ ކެމްޕޭނު ފަށާއިރު، މި އިންތިޚާބުގައި ރައީސް ޔާމިން ވާދަކުރައްވާ ބޮޑު ތަފާތަކުން ކާމިޔާބުކުރައްވާނެކަމުގެ ޔަގީންކަން ވެސް އޮތްކަމަށް އިދިކޮޅު ކޯލިޝަނުން ދަނީ ބުނަމުން ނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
