އެމްޑީޕީވެސް ދެފަޅި: ނަޝީދަށް ވަފާތެރި މެމްބަރުން ނިކުމެ އާ ޕާޓީއެއް އުފައްދަނީ!
ރާއްޖޭގައި އެންމެ ގިނަ ދުވަސްވީ ސިޔާސީ ޕާޓީ އަދި މިހާރު ވެރިކަން ކުރަމުންދާ މައި ޕާޓީ އެމްޑީޕީގެ ރައީސް މުޙައްމަދު ނަޝީދު އުފައްދަވާފައިވާ ފިކުރެއްގެ ދިރުން ގޮތްޕަށް ނިސްބަތްވެވަޑައިގަންނަވާ މެމްބަރުން ޕާޓީން ވަކިވެ އާ ސިޔާސީ ޕާޓީއެއް އުފައްދާނެކަން އިއުލާނުކޮށްފި އެވެ.
އެކަން އިއުލާނުކޮށްފައިވަނީ އެމްޑީޕީގެ ފިކުރެއްގެ ދިރުމުގެ ގޮފިން ބޭއްވި ނޫސްވެރިންގެ ބައްދަލުވުމުގައި މަޖިލީހުގެ ނައިބު ރައީސް އީވާ އަބްދުالله އެވެ.
މިއަދުގެ އެ ޕްރެސް ކޮންފަރެންސް ފައްޓަވަމުން އީވާ ވަނީ ފިކުރެއްގެ ދިރުމަށް ނިސްބަތްވާ ރައްޔިތުންގެ މަޖިލީހުގެ 12 މެމްބަރުން އެމްޑީޕީން އިސްތިއުފާދެއްވާފައިވާކަން ވެސް ކަށަވަރުކޮށްދީފަ އެވެ. އެ މެމްބަރުންގެ އިތުރުން ވެސް އެމްޑީޕީގައި ގިނަ ދުވަސްތަކެއް މަސައްކަތް ކުރައްވާފައިވާ ގިނަ އަދަދެއްގެ އިސް ބޭފުޅުން ވަނީ ޕާޓީން އިސްތިއުފާދެއްވާފަ އެވެ.
އެގޮތުން އެމްޑީޕީގެ ނައިބުރައީސް އަޙްމަދު ޝިފާޒުގެ އިތުރުން އެ ޕާޓީގެ ސިޔާސަތު ކޮމިޓީގެ މުޤައްރިރުކަން ކުރެއްވި އެމްޑީޕީ މެނިފެސްޓޯ އެކުލަވައިލެއްވުމުގައި އެންމެ އިސްކޮށް މަސައްކަތްކުރެއްވި އެސްޓީއޯގެ ކުރީގެ މެނޭޖިން ޑިރެކްޓާ ހުސައިން އަމްރު ވެސް ވަނީ އިސްތިއުފާދެއްވާފަ އެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން އީވާ ވިދާޅުވީ އެމްޑީޕީން ވަކިވި މެމްބަރުންނާއެކު އާ ސިޔާސީ ޕާޓީއެއް އުފެއްދުމުގެ މަސައްކަތް މިހާރު ފަށާފައިވާ ކަމަށެވެ.
"އަޅުގަނޑުމެންގެ އުންމީދެއް އެބޮތް މި އާޕާޓީ އަޅުގަނޑުމެން އުފައްދައިގެން އަނެއްކާވެސް ދިވެހިރާއްޖޭގެ މުސްތަގުބަލާއި އަޅުގަނޑުމެންގެ ޒުވާނުންގެ މުސްތަގުބަލާއި ދިވެހިރާއްޖޭގެ ސިޔާސީ މުސްތަގުބަލު ބައްޓަންކުރުމުގައި އަޅުގަނޑުމެންގެ އާ ސިޔާސީ ޕާޓީއަށް އަޅުގަނޑުމެންގެ އުންމީދު ބޮޑު"
މަޖިލީހުގެ ނައިބު ރައީސާ އީވާ އަބްދުالله
އީވާ ވިދާޅުވީ އެމްޑީޕީއިން ނިކުމެ ވަޑައިގެން އުފައްދަވާ އެ ސިޔާސީ ޕާޓީއިން ކުރިއަށް އޮތް ރިޔާސީ އިންތިޚާބުގައި ވެސް ވާދަކުރާނެ ކަމަށެވެ.
އެހެން ނަމަވެސް، ވާދަކުރާނެ ގޮތުގެ މާ ބޮޑު ތަފްސީލުތަކެއް މިއަދުގެ ޕްރެސް ކޮންފަރެންސްގައި ހާމަކުރައްވާފައެއް ނުވެއެވެ.
އެމްޑީޕީގެ ފިކުރެއްގެ ދިރުމަށް ތާއީދުކުރައްވާ މެމްބަރުން ޕާޓީން ވަކިވެ އާ ސިޔާސީ ޕާޓީއެއް އުފައްދާނެކަން އިއުލާނުކުރައްވާފައިވާއިރު، އެމްޑީޕީގެ ރައީސް މުޙައްމަދު ނަޝީދު އަދި ޕާޓީން އިސްތިއުފާއެއް ނުދެއްވަ އެވެ.
އެހެން ނަމަވެސް އާ ސިޔާސީ ޕާޓީއެއް އުފެއްދުމުގެ މަސައްކަތަކީ ނަޝީދުގެ ފިކުރެއްގެ ދިރުމުގެ ގޮފި ބޮޑުކޮށް ފުޅާކުރުމުގެ ތެރެއިން ތަރައްގީވަމުން އައި މަސައްކަތެއްކަމަށް މިއަދުގެ ޕްރެސް ކޮންފަރެންސްގައި ވަނީ ސާފުކޮށްދެއްވާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
