ސިޔާސީ ޕާޓީއެއް ނޫން، ގޭ ބަދިގޭ ޕާޓީ އުފެއްދޭނީ: ރޮޒައިނާ

އެމްޑީޕީގެ ރައީސް މުޙައްމަދު ނަޝީދަށް ތާއީދުކުރައްވާ ގިނަ މެމްބަރުންތަކެއް އެމްޑީޕީން ވަކިވެވަޑައިގެން އައު ސިޔާސީ ޕާޓީއެއް އުފައްދާނެކަން އިއުލާނުކުރުމުން އެމްޑީޕީގެ ޕާލަމެންޓްރީ ގުރޫޕުގައި ހިމެނިވަޑައިގަންނަވާ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ފާޑުވިދާޅުވެއްޖެ އެވެ.

ރައީސް ނަޝީދަށް ތާއީދުކުރައްވާ ރައްޔިތުންެގ މަޖިލީހުގެ 12 މެމްބަރުންނާއެކު، އެމްޑީޕީގައި އިސްކޮށް ހަރަކާތްތެރިވަމުން އައި ގިނަ ބަޔަކު ޕާޓީން ވަކިވެ އާ ސިޔާސީ ޕާޓީއެއް އުފައްދާ، އެ ޕާޓީން އަންނަ ރިޔާސީ އިންތިޚާބުގައި ވާދަކުރާނެކަން ވަނީ އިއުލާނުކޮށްފަ އެވެ.

އެކަން އިއުލާނުކުރުމަށް މިއަދު ބޭއްވި ޕްރެސް ކޮންފަރެންސްގައި ޕާޓީން ވަކިވި ފަރާތްތައް ވަނީ މިހާރު އެމްޑީޕީގެ ކަންކަން ހިންގެވުމުގައި އިސްކޮށް ތިއްބެވި ފަރާތްތަކާއި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ގިނަ ފާޑުކިޔުންތަކެއް އަމާޒުކުރައްވާ ވައްކަމާއި ކޮރަޕްޝަނާއި ގުޅޭ ގިނަ ތުހުމަތުތަކެއް ވެސް ކުރައްވާފަ އެވެ.

އެމްޑީޕީން ނިކުމެ އާ ސިޔާސީ ޕާޓީއެއް އުފައްދާނެކަން އިއުލާނުކުރުމާއެކު، މެމްބަރުންގެ ތަރުހީބު ލިބެމުން އަންނަ ކަމަށާއި، އަލަށް އުފައްދާ ޕާޓީ ވެގެންދާނީ އެމްޑީޕީގެ އަސާސުތައް ނަގަހައްޓާ، ރައްޔިތުންގެ ލާބަޔާއި މަންފާ އިސްކޮށްގެން މަސައްކަތް ކުރާ ޕާޓީއަކަށް ކަމަށް އެމްޑީޕީންގެ ވަކިވި މެމްބަރުން ވަނީ ވިދާޅުވެފަ އެވެ.

އެމްޑީޕީން ކެނޑުނު ފަރާތްތައް އާ ސިޔާސީ ޕާޓީއެއް އުފައްދާ ވާހަކަ ދެއްކެވުމާއި ގުޅިގެން މަލާމާތް ކުރައްވާ ރޮޒައިނާ ކުރެއްވި ޓްވީޓެއްގައި ވިދާޅުވީ ޕާޓީން ވަކިވެވަޑައިގެންނެވި ފަރާތްތައް ވަކިވެވަޑައިގަތީ އެމްޑީޕީގައި ރައީސް ނަޝީދު ނޫން ބޭފުޅަކު ނެތްކަމަށް ދެކިވަޑައިގެން އަމިއްލަ ގެކޮޅުގެ ބަދިގެކޮޅުގައި ޕާޓީ ހިންގަވާގޮތަށް ހިންގެވުމަށް ފަހުގައި ކަމަށެވެ.

އަދި ހަގީގަތުގައި އެ ފަރާތްތައް ޕާޓީން ވަކިވެވަޑައިގަތީ ވާދަވެރިކަމާއެކު ކުރިއަށް ދިޔަ އެމްޑީޕީގެ ރިޔާސީ ޕްރައިމަރީއިން ރައީސް ނަޝީދަށް ނާކާމިޔާބީއާއި ކުރިމަތިލައްވަން ޖެހިވަޑައިގަތުމުން، އެކަން ހަޖަމު ނުކުރެވިގެން ކަމަށްވެސް އޭނާ ވިދާޅުވި އެވެ.

އެމްޑީޕީން ވަކިވެވަޑައިގެން ބޭފުޅުންނަށް ސިޔާސީ ޕާޓީއެއް ނުއުފެއްދޭނެކަމަށާއި، ދެން ވެސް އެބޭފުޅުންނަށް އުފެއްދޭނީ އަމިއްލަފުޅު ގެކޮޅުގައި ހިންގަވާފަދަ ޕާޓީއެއްކަމަށް ރޮޒައިނާ ވިދާޅުވި އެވެ.

"ޕާޓީގައި ރައީސް ނަޝީދު ނޫން މީހަކު ނެތްކަމަށް ބަލައިގެން އަމިއްލަ ގޭ ބަދިގެ ތެރެއިން ޕާޓީ ހިންގަވާފަ، ވާދަވެރި އިންތިޚާބެއްގައި ޕާޓީން އަލަށް ކުރިމަތިލި ފަހަރު ބަލިވީމަ އެކަން ހަޖަމު ނުވި ބަޔަކަށް ކޮން ޑިމޮކްރެޓިކް ޕާޓީއެއްތޯ ހެދޭނީ؟ (ފޮޓޯއިން ތި ފެންނަ) ގޭ ބަދިގޭ ޕާޓީ ދެން ވެސް ހެދޭނީ"

މަޖިލީހުގެ މީދޫ ދާއިރާގެ މެމްބަރު ރޮޒައިނާ އާދަމް

ރޮޒައިނާ އިތުރަށް ވިދާޅުވީ ޕާޓީ ބައިކޮށް ފުނޑާލީ ރައީސް ނަޝީދަށް ވެރިކަން ހޯދައިދޭން ކަމަށެވެ. 2018 ވަނަ އަހަރުވެސް މަސައްކަތް ކުރީ ރައީސް ނަޝީދަށް ކުރިމަތި ނުލެވޭކަމަށް ވާނަމަ ޕާޓީން ކެންޑިޑޭޓެއް ނެރުނަ ނުދިނުމަށްކަމަށް ރޮޒައިނާ ވިދާޅުވި އެވެ.

ނަޝީދު ވެރިކަމަށް ގެނައުމަކީ، ނުވަތަ ނަޝީދު ނޫން މީހަކަށް އެމްޑީޕީގެ ފަރާތުން ރިޔާސީ އިންތިޚާބުގައި ވާދަނުކުރެވުމަކީ އެމްޑީޕީގެ އަސާސްތޯ ރޮޒެއިނާ ސުވާލުކުރައްވާފަ އެވެ.

އެމްޑީޕީގެ ރިޔާސީ ޕްރައިމަރީއަށްފަހު އެޕާޓީގެ ދެ ރައީސުންގެ ދެމެދުގައި އުފެދިފައިވާ ނުތަނަވަސްކަން ބޮޑުވެ މިހާރު ވަނީ ޕާޓީ ދެބައިވެފަ އެވެ. އެކަމުގެ ސަބަބުން ކުރިއަށް އޮތް ރިޔާސީ އިންތިޚާބަށް ބޮޑެތި އަސަރުތަކެއް ކުރާނެކަމަށް ސިޔާސީ މަޝްރަހު ދިރާސާ ކުރައްވާ ފަރާތްތައް ގެންދަވަނީ ވިދާޅުވަމުން ނެވެ.

ނަޝީދު ފަޅީގެ ބޭފުޅުން ވަކި ޕާޓީއެއް ހަދައި މަސައްކަތް ކުރަން ފައްޓާ ހިސާބުން ސަރުކާރަށް މިހާރަށްވުރެ ބޮޑު ޕްރެޝަރެއް ކުރިމަތިވެގެންދާނެކަމަށް އެބޭފުޅުން ދަނީ ވިދާޅުވަމުންނެވެ.