މިހާތަނަށް 1546 ރީ ރެޖިސްޓަރީ ފޯމު ރިޖެކްޓް ކުރެވިފައިވޭ: އީސީ

ރިޔާސީ އިންތިހާބު 2023 ގެ ދެވަނަބުރުގެ ރީ-ރެޖިސްޓްރޭޝަން ހުޅުވާލެވުނުފަހުން، މިހާތަނަށް 25,000 އަށްވުރެ ގިނަ މީހުން ވޯޓުލާން ރީ-ރެޖިސްޓާރ ކޮށްފައިވާ ކަމަށް އިލެކްޝަންސް ކޮމިޝަނުން ބުނެފިއެވެ.

އިލެކްޝަންސް ކޮމިޝަންގެ ނާއިބު ރައީސް އިސްމާއީލް ހަބީބު ކުރެއްވި ޓްވީޓެއްގައި ވިދާޅުވީ، ދެވަނަ ބުރުގެ ރީ-ރެޖިސްޓްރޭޝަން އަށް ހުޅުވާލުމާއެކު، ފުރަތަމަ ދުވަހު 9206 މީހުން ރީ-ރަޖިސްޓަރީ ކުރަން ފޯމު ހުށަހެޅި ކަމަށާ، އަދި ދެވަނަ ދުވަހު 16287 ފޯމު ހުށަހަޅާފައިވާ ކަމަށެވެ.

"މިހާތަނަށް ޖުމްލަ 25493 ރީ-ރަޖިސްޓަރީ ކުރަން ހުށަހަޅާފައިވޭ." ހަބީބު ވިދާޅުވި އެވެ.

މިއާއެކު ހަބީބު ވިދާޅުވީ، އޮންލައިންކޮށް ފުރަތަމަ ދުވަހު 7267 މީހުން ރީ-ރެޖިސްޓްރޭޝަން އަށް ހުށަހެޅިއިރު، ދެވަނަ ދުވަހު 11082 މީހުން ހުށަހަޅާފައިވާ ކަމަށާ، އެކު ޖުމްލަ 18،349 މީހުން އޮންލައިންކޮށް ރީ ރެޖިސްޓާ ކުރަން ހުށަހަޅާފައިވާ ކަމަށެވެ.

އެ އެންމެންގެ ތެރެއިން މިހާތަނަށް، ދެވަނަބުރުގައި ރީ-ރެޖިސްޓާރ ކޮށްދެވިފައިވަނީ 10271 މީހުން ކަމަށްވެސް ހަބީބު ވިދާޅުވި އެވެ.

އަދި ރީ-ރަޖިސްޓަރީ ކުރަން، ދެވަނަބުރުގައި ހުށަހެޅި ފޯމުތަކުން، އެކިއެކި ސަބަބުތަކާ ހުރެ، މިހާތަނަށް 1546 ފޯމު ރިޖެކްޓް ވެފައިވާ ކަމަށާ، ފޯމުތައް ރިޖެކްޓް ވަނީ، ހުށަހަޅަންޖެހޭ ހުރިހާ މަޢުލޫމާތު ފުރިހަމަ ނުވާތީ ކަމަށްވެސް ހަބީބު ވިދާޅުވި އެވެ.

ހަބީބު އިތުރަށް ވިދާޅުވީ، އޮންލައިންކޮށް ހުށަހަޅާފައިވާ ފޯމުތަކުން، ޕެންޑިންގ ކަމަށް ދައްކަނީ، އެ ފޯމުތަކުގެ ވެރިފިކޭޝަން މަރުޙަލާ މުޅިން ނުނިމޭތީ ކަމަށާ، ފޯމުތަކުގެ ސައްހަކަން ކަށަވަރުވިހާ އަވަހަކަށް، ރީ-ރަޖިސްޓަރީ ކުރެވުނުކަމުގެ މެސެޖް ލިބޭނެ ކަމަށެވެ.

އަދި މިއަދުގެ ހަވީރު 4:00 ގެ ކުރިން، ރީ-ރަޖިސްޓަރީ ކުރަން ހުށަނާޅައިފިނަމަ، ރިޔާސީ އިންތިހާބު 2023 ގައި، ދެން އެފުރުސަތު ލިބުމަކީ ނާދިރުކަމެއް ކަމަށްވެސް ހަބީބް ވިދާޅުވި އެވެ.

މިއާއެކު ހަބީބް ވިދާޅުވީ އެމީހަކު ވޯޓުލާން ރަޖިސްޓަރީ ވެފައިވަނީ ކޮންތަކަށްތޯ މިހާރުން މިހާރަށްވެސް، ޗެކް ކުރުމަކީ ވަރަށް މުހިންމު ކަމެއް ކަމަށާ، ވޯޓާއި ގުޅޭ އިތުރު މައުލޫމާތު 1414 އިން ލިބޭނެ ކަމަށެވެ.