ތިމާވެއްޓަށް ގެއްލުންދިން އިރު ހަނުހުރި ސަބްރާ ހުނުފެނަށް!

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ނިމެމުންމިދާ ވެރިކަމުގައި ރާއްޖޭގެ ނާޒުކު ތިމާވެއްޓަށް ގެއްލުންވާނެ އެތައް ކަމެއް ހިނގާފައި ވީ ނަމަވެސް، "ސްޕެޝަލް އެންވޯއީ ފޮރ ކްލައިމެޓް ޗޭންޖް" ގެ މަޤާމުގައި ހުންނަވާ، އެކަންކަން ފާހަގަކޮށް އެއްވެސް އެއްޗެއް ވިދާޅުނުވެ ހަނު ހުންނެވުމަށްފަހު، އިންތިޚާބީ ރައީސް ޑރ މުހައްމަދު މުއިއްޒު ދެއްކެވި ވާހަކަފުޅެއް ނުބައިކޮށް ތަރުޖަމާކުރައްވާ ސަބްރާ ނޫރައްދީން ކުރި ޓްވީޓަކާއި ގުޅިގެން އާންމުންގެ ބޮޑެތި ފާޑުކިޔުންތަކެއް އަމާޒުވެއްޖެ އެވެ.

އަލްޖަޒީރާ އިންޓަވިއުގައި އިންތިޚާބީ ރައީސް ޑރ.މުޢިއްޒު ވިދާޅުވެފައިވަނީ، މޫސުމީ މައްސަލަތަކުގެ ސަބަބުން 2050 ގައި ރާއްޖެ ނެތިދާނެ ވާހައަކައީ ޙަޤީޤަތެއްކަމަށް ޤަބޫލުނުކުރައްވާ ކަމަށެވެ.

ނަމަވެސް މޫސުމީ ބަދަލުތަކާއެކު ކުރިމަތިވާ ގޮންޖެހުންތަކާ ގުޅިގެން އެކަންކަމުގެ އަސަރު ކުޑަކުރުމަށް މަސައްކަތްތަކެއް ކުރަންޖެހޭކަމަށް ޑރ މުއިއްޒު ވިދާޅުވި އެވެ. އެހެން ނަމަވެސް އެ ވާހަކަތައް ނުބައިކޮށް ތަރުޖަމާކޮށް ބައެއް ފަރާތްތަކުން ފާޑުކިޔުން އަމާޒުކުރަމުންދާއިރު، އޭގެ އެއްބޭފުޅަކީ ސަބްރާއެވެ.

އެހެން ނަމަވެސް ޑރ މުއިއްޒުގެ އެ ވާހަކަފުޅަށް ފާޑުކިޔުން އަމާޒުކޮށް ސަބްރާ ކުރެއްވި ޓްވީޓަށް އެތައް ބައެއްގެ ނުރުހުން ވަނީ އަމާޒުވެފައެވެ. ގިނަ ބަޔަކު ބުނެފައިވަނީ މި ހިނގަމުންދާ ފަސް އަހަރު ރާއްޖޭގެ ނާޒުކު ތިމާވެއްޓަށް ބޮޑެތި ގެއްލުންތަކެއް ލިބޭގޮތަށް އެތައް ކަމެއް ހިނގާފައިވާއިރު، އެއިން ކަމަކަށް ބަހެއް ބުނަން ކެރިވަޑައިނުގެން ހުންނެވުމަށްފަހު ޑރ މުއިއްޒަށް ފާޑުކިޔަންވީމަ "ތިމާވެށީގެ ޗެމްޕިއަނުންނަށް" ނިދިން ހޭފުޅުލެވިއްޖެ ކަމަށެވެ.

ސަބްރާއަށް ރައްދުދިން މީހަކު ބުނެފައިވަނީ 2050 ގެ ނިޔަލަށް ދިވެހިރާއްޖެ އަޑިއަށް ދާނެކަމަށް ޤަބޫލުނުކުރަނީ ހަމައެކަނި ޑރ މުއިއްޒު ނޫން ކަމަށެވެ. ޚުދު އެމީހާ ވެސް އެކަން ޤަބޫލު ނުކުރާ ކަމަށާއި، 2050 ގެ ނިޔަލަށް ދިވެހިރާއްޖެ އަޑިއަށް ދާނެ ނަމަ ރާއްޖޭގެ ޓުއަރިޒަމަށް އަދި ރިސޯޓުތަކަށް އިންވެސްޓުކުރުމުގެ ބޭނުމެއް ވެސް ނެތް ކަމަށެވެ.

"ތިމާވެއްޓަކީ ތިމާމެންގެ ޖީބު ބޮޑުކުރަން ލިބޭ ރަނުގެ ފުރުސަތަކަށް ހަދައިގެން ނުވާނެ"

ފާޑުކީ މީހަކު ވަނީ މި ފަސް އަހަރު ރާއްޖޭގެ ރީތި ފަރުތަކަށް އިޔާދަނުކުރެވޭ ވަރުގެ ބޮޑެތި ގެއްލުންތައް ދިންއިރު "ސްޕެޝަލް އެންވޯއީ ފޮރ ކްލައިމެޓް ޗޭންޖް" ސަބްރާ ހުންނެވީ ކޮންތަނަކު ތޯ ސުވާލުކުރައްވާފަ އެވެ. އަދި އެ ދުވަހު ހަނު ހުންނެވުމށްފަހު ކުއްލިއަށް ރާއްޖޭގެ ތިމާވެއްޓާއި ދޭތެރޭ އެހާ ބޮޑަށް ކަންބޮޑުވާން ޖެހުނު ސަބަބީ ކޮބައިތޯވެސް އޭނާ ވަނީ ސުވާލުކޮށްފަ އެވެ.

ސަބްރާއަށް ފާޑުކީ އާންމު ރައްޔިތަކު ބުނީ ތިމާވެށީގެ ނަން ބޭނުންކޮށްގެން ސަބްރާއާއި އޭނާގެ އާއިލާއިން މާލީގޮތުން ބޮޑެތި މަންފާތައް ނަގާފައިވާ ކަމަށެވެ.

އޭގެ އިތުރުން މީހަކު ވަނީ ތިމާވެށި ވިއްކައިގެން މިލިއަނުން ހޯދި ފައިސާއަށް ވީ ނުވީވެސް އަދިވެސް ނޭނގޭ ކަމަށާއި، ދޫނި ހިމާޔަތްކުރުމުގެ ނަމުގައި ބަޖެޓުގައި ޖެހި 200 އެތައް މިލިއަނެއް ޚަރަދުކުރި ގޮތް ސާފުކޮށްދީފައި ނުވާކަން ހަނދާންކޮށްދީފައެވެ. އޭނާ ބުނީ ތިމާވެއްޓަކީ ތިމޭމެންގެ ޖީބު ބޮޑުކުރަން ލިބޭ ރަނުގެ ފުރުސަތަކަށް ހަދައިގެން ނުވާނެ ކަމަށެވެ.

"ސާބަހޭ ސަބްރާ!"

ފާޑުކީ އިތުރު މީހަކު ބުނީ ސަބްރާފަދަ މީހުންނަށް ތިމާވެށީގެ ވާހަކަ ދެއްކެނީ އިދިކޮޅުގައި އޮންނައިރު އެކަނި ކަމަށެވެ. ވެރިކަމުގައި ތިބޭއިރު މޫސުމަށް އަންނަ ބަދަލުގެ ނަންގަނެލަންވެސް ނުކެރޭކަން އެމީހާ ފާހަގަކުރިއެވެ.

ބައެއް މީހުން ބުނީ ފަސް އަހަރު ހަނު ހުންނެވުމަށްފަހު ކުއްލިއަކަށް ތިމާވެށީގެ ވާހަކަ ދައްކަން ފެށުމުން ހިތާމަކުރާ ކަމަށެވެ. އަދި މިހާތަނަށް ރާއްޖޭގެ ތިމާވެއްޓަށް ނުލިބޭ ބޮޑެތި ގެއްލުންތައް މި ފަސްއަހަރު ވަމުން ދިޔައިރު "ސްޕެޝަލް އެންވޯއީ ފޮރ ކްލައިމެޓް ޗޭންޖް" ގެ މަގާމުގައި ހުންނަވާ އެއްވެސް އެއްޗެއް ވިދާޅުނުވެ ހުންނެވި ގޮތަށް ދެން ވެސް ހަނު ހުންނެވުމަށް ބައެއް ފަރާތްތަކުން ވަނީ ސަބްރާއަށް ނަސޭހަތްތެރިވެފަ އެވެ.

"ކްލައިމެޓް ޗޭންޖު ބަހަނާއަކަށް ހަދައިގެން ސަރުކާރާއި އެންޖީއޯތަކަށް ލިބުނު ފަންޑުތަކަށް ވީގޮތެއް ބަލަން ޖެހޭ. ރާއްޖޭގެ ހުރިހާ ރަށެއްގެ ފަރުތައް ވަނީ ވީރާނާކޮށްފަ، ކްލައިމެޓް އެންވޯއީ ތި ހުންނަނީ ބޮޑު މުސާރަ ނަންގަވައިގެން އަޅާވެސް ނުވާ"

ސަބްރާއަށް ފާޑުކީ އާންމު ރައްޔިތެއް

ސަބްރާއަަށް ފާޑުކީ ގިނަ ފަރާތްތަކެއް އެންމެ ބޮޑަށް ނުރުހުން ފާޅުކުރި ކަމަކީ މި ފަސް އަހަރު ރާއްޖޭގެ ނާޒުކު ތިމާވެއްޓަށް ބޮޑެތި ގެއްލުންތަކެއް ލިބެމުން ދިޔައިރު އެއްވެސް އެއްޗެއް ވިދާޅުނުވެ ސަބްރާ ހަނު ހުންނެވުމެވެ. ސަބްރާއަކީ ރާއްޖޭގެ ނާޒުކު ތިމާވެށި ރައްކާތެރިކުރުމުގެ ޒިންމާ އޮތް ބޭފުޅަކަށް ވާއިރު، އެ ޒިންމާ އެންމެ ފުރިހަމައަށް އަދާކުރައްވާފައި ނުވާކަން ގިނަ ބަޔަކު ފާހަގަކޮށްފައި ވެއެވެ.

ރައީސް އިބްރާހިމް މުހައްމަދު ޞާލިހުގެ ސަރުކާރުގައި ފެށި ތިލަމާލެ ބްރިޖުގެ މަސައްކަތް ކުރުމަށް ގެންގުޅުނު ބާޖުތަކަށް ވިލިމާލެ ފަރަށް އުރި ދެފަހަރު މަތިން އެ ފަރަށް އިޔާދަ ނުކުރެވޭ ބޮޑެތި ގެއްލުންތައް ލިބިގެން ގޮސްފައިވުމާއި، އޭގެ އިތުރުންވެސް އެތައް ފަރަކަށް ލިބުނު ގެއްލުންތަކުގެ މަތިން އާންމުން ވަނީ ހަނދާން އާކޮށްދީފަ އެވެ.

އޭގެ އިތުރުން ސަބްރާމެން ފަދަ ބޭބޭފުޅުން މާޒީގައި ހަނުތިއްބެވި ގޮތަށް، ތިމާވެށީގެ ވާހަކަ އިތުރަށް ނުދައްކަވާ ހަނު ތިއްބެވުން މާ ރަނގަޅުވާނެ ކަމަށް އެތައް ބަޔަކު ވަނީ ބުނެފައެވެ.