އެމްޑީޕީ މިހާރު ހިނގަމުން ދަނީ ޕާޓީ އުފެއްދި އަސާސްތަކާއި ދިމާ އިދިކީލަކޮށް: ޝިޔާން

ރާއްޖޭގައި އެންމެ ގިނަ ދުވަސްވީ ސިޔާސީ ޕާޓީ އަދި މިހާރު ވެރިކަން ކުރަމުންދާ މައި ޕާޓީ އެމްޑީޕީ، މިހާރު ހިނގަމުން ދަނީ ޕާޓީ އުފެއްދި އަސާސްތަކާއި ދިމާ އިދިކީލަކޮށް ކަމަށް ތޮއްޑޫ ދާއިރާގެ މެމްބަރު ހަސަން ޝިޔާން ވިދާޅުވެއްޖެއެވެ.

ޝިޔާން މިހެން ވިދާޅުވެފައިވަނީ އެމްޑީޕީއިން ވަކިވެއްޖެކަމަށް އިއުލާންކޮށް އިއްޔެ ކުރެއްވި ޓްވީޓެއްގައެވެ.

އެގޮތުން ޝިޔާން ވަނީ އެމްޑީޕީގައި 16 އަހަރު މެދު ނުކެނޑި އިހްލާސްތެރިކަމާއިއެކު މަސައްކަތް ކުރުމަށްފަހު އެ ޕާޓީއިން ވަކިވެފައިވަނީ ޕާޓީ އުފެއްދި އަސާސްތަކާއި ދިމާ އިދިކީލަކޮށް މިހާރު ޕާޓީ ހިނގަމުން ދާތީ ކަމަށް ވިދާޅުވެފައެވެ.

މިއާއިއެކު ސިޔާސީ މަސައްކަތުގައި އަނެއްކާވެސް ކުރިއަށް ދާނީ އެއަސާސްތައް ނަގަހައްޓާ ދަމަހައްޓާ ބަޔަކާއިއެކު ކަމަށް ވެސް ޝިޔާން ވިދާޅުވިއެވެ. އަދި މި މަސައްކަތް އިރާދަކުރެއްވިއްޔާ ހުއްޓާ ނުލާނެ ކަމަށް ވެސްް ޝިޔާން ވިދާޅުވިއެވެ.

ޝިޔާންގެ އިތުރުންވެސް ފިކުރެއްގެ ދިރުން ގޮތްޕަށް ނިސްބަތްވާ 11 މަޖްލިސް މެމްބަރުން ވަނީ އިއްޔެ އެމްޑީޕީއާއި ވަކިވެ، އާ ސިޔާސީ ޕާޓީއެއް އުފައްދާނެ ކަމަށް އިއުލާންކޮށް ނޫސްވެރިންގެ ބައްދަލުވުމެއް ބާއްވާފައެވެ.

މި މެމްބަރުންނާއިއެކު އެމްޑީޕީގައި ގިނަ ދުވަސްތަކެއް މަސައްކަތް ކުރައްވާފައިވާ ގިނަ އަދަދެއްގެ އިސް ބޭފުޅުން ވަނީ ޕާޓީން އިސްތިއުފާދެއްވާފަ އެވެ.

އެގޮތުން އެމްޑީޕީގެ ނައިބު ރައީސް އަޙްމަދު ޝިފާޒުގެ އިތުރުން އެ ޕާޓީގެ ސިޔާސަތު ކޮމިޓީގެ މުޤައްރިރުކަން ކުރެއްވި އެމްޑީޕީ މެނިފެސްޓޯ އެކުލަވައިލެއްވުމުގައި އެންމެ އިސްކޮށް މަސައްކަތްކުރެއްވި އެސްޓީއޯގެ ކުރީގެ މެނޭޖިން ޑިރެކްޓާ ހުސައިން އަމްރު ވެސް ވަނީ އިސްތިއުފާދެއްވާފަ އެވެ.

އިއްޔެގެ ނޫސްވެރިންގެ ބައްދަލުވުމުގައި، އެމްޑީޕީއިން ނިކުމެ ވަޑައިގެން އުފައްދަވާ އެ ސިޔާސީ ޕާޓީއިން ކުރިއަށް އޮތް ރިޔާސީ އިންތިޚާބުގައި ވާދަކުރާނެ ކަމަށްވެސް ވަނީ އިއުލާން ކޮށްފައެވެ.