މަޖިލީހުގެ ނައިބު ރައީސްކަމުން އީވާ ވަކިކުރަން އެމްޑީޕީގެ ޕީޖީން ފާސްކޮށްފި
ރައްޔިތުންގެ މަޖިލީހުގެ ނައިބު ރައީސްގެ މަޤާމުން އީވާ އަބްދުالله ވަކިކުރުމަށް މަޖިލީހުގެ މެޖޯރިޓީ އަދި ސަރުކާރު ހިންގާ މައި ޕާޓީ އެމްޑީޕީގެ ޕާލަމެންޓްރީ ގުރޫޕުން ނިންމައިފި އެވެ.
އީވާ މަޖިލީހުގެ ނައިބު ރައީސް ކަމުން ވަކިކުރަން މަޖިލީހަށް ހުށަހަޅަން ނިންމީ މިއަދު ބޭއްވި އެމްޑީޕީ ޕީޖީ ގްރޫޕްގެ ބައްދަލުވުމެއްގަ އެވެ.
ނައިބު ރައީސްކަމުން އީވާ ވަކިކުރުމަށް ނިންމާފައިވަނީ އެކަމާއި ގުޅޭގޮތުން ބޭއްވި އެމްޑީޕީގެ ޕީޖީ ބައްދަލުވުމުގައި ބައިވެރިވި ހުރިހާ މެމްބަރުންގެ އިއްތިފާގުންނެވެ.
މަޖިލީހުގެ ނައިބުރައީސްކަމުން އީވާ ވަކިކުރުމުގެ މަސައްކަތް ފަށާފައިވަނީ އޭނާ އެމްޑީޕީން ވަކިވެވަޑައިގަތުމާއި ގުޅިގެންނެވެ.
އީވާގެ އިތުރުން ރައްޔިތުންގެ މަޖިލީހުގެ އެމްޑީޕީއަށް ނިސްބަތްވާ 12 މެމްބަރުން ވަނީ އިއްޔެ އެމްޑީޕީން އިސްތިއުފާދެއްވާފަ އެވެ. އަދި އެ މެމްބަރުންގެ އިތުރުން އެމްޑީޕީގައި ތިއްބެވި ރައީސް މުޙައްމަދު ނަޝީދަށް އިޚްލާސްތެރި މެމްބަރުންތަކެއް ވަނީ ޕާޓީން ވަކިވެ އާ ސިޔާސީ ޕާޓީއެއް ހަދާނެކަން އިއުލާނުކޮށްފަ އެވެ.
އެކަމާއި ގުޅޭގޮތުން އިއްޔެ އެ މެމްބަރުން ބޭއްވި ނޫސްވެރިންގެ ބައްދަލުވުމުގައި މީޑިއާއިން ކުރި ސުވާލަކަށް ޖަވާބުދެއްވަމުން އީވާ ވިދާޅުވީ މަޖިލީހުގެ ނައިބު ރައީސްގެ މަޤާމު ދިފާއުކުރުމުގެ ބޭނުމުގައި، ނުވަތަ އެ މަޤާމުގައި އިންނެވުމަށް އޭނާ ގަބޫލުކުރާ އަސާސްތައް ދޫކޮށްލާ ފިތިގެން އިންނަވާނެ ބޭފުޅަކަށް ވެވަޑައިނުގަންނަވާނެ ކަމަށެވެ.
އެމްޑީޕީން ނިކުމެވަޑައިގަތީ ޕާޓީގެ އަސާސްތައް ދޫކޮށްލާ، ކޮރަޕްޝަންގެ ހާއްޔަކަށް ހަދާފައިވާތީކަމަށް އީވާ ވިދާޅުވި އެވެ. އަދި ރައީސް ޞާލިހު ދިފާއުކުރަން މުޅި އެމްޑީޕީ ފުނޑާލާފައިވާކަމަށް އީވާ ވިދާޅުވި އެވެ.
އެހެންކަމުން މަޖިލީހުގެ ނައިބުރައީސްގެ މަގާމުން ވަކިކޮށްފާނެތީ ޖެހިލުންވެވަޑައި ނުގަންނަވާ ކަމަށާއި، އެހެން ނަމަވެސް އަމިއްލަފުޅަށް އިސްތިއުފާ ނުދެއްވާނެކަމަށް އީވާ ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
