އާބަންކޯއިން ކޮންޓެއިނަރ ޕާކުގައި ކޯ-ވޯކިންގ ސްޕޭސް އެއް ހަދަނީ
އާބަންކޯ އިން ހުޅުމާލޭގައި ތަރައްޤީ ކުރަމުންދާ ކޮންޓެއިނަރ ޕާކުގައި ކޯ- ވޯކިންގ ސްޕޭސް އެއް ހެދުމުގެ އެއްބަސްވުމުގައި މިއަދު ސޮއިކޮށްފިއެވެ.
މި ވޯކިންގ ސްޕޭސް އަކީ އާބަންކޯ އަދި މިނިސްޓްރީ އޮފް އިކޮނޮމިކް ޑިވެލޮޕްމަންޓް އަދި ބިޒްނަސް ސެންޓަރ ކޯޕަރޭޝަން (ބީސީސީ) ގުޅިގެން ހަދާ ތަނެއް ކަމަށް އާބަންކޯ އިން ބުނެފައިވެއެވެ.
ކޯ- ވޯކިންގ ސްޕޭސް އަކީ އަލަށް ފަށައި ގަންނަ، ކުދި އަދި މެދު ފަންތީގެ ވިޔަފާރިތަކަށް ޚާއްސަކޮށްގެން ތަރައްޤީ ކުރާ ތަނެކެވެ.
މި ކޯ- ވޯކިންގ ސްޕޭސް ހެދުމުގެ އެއްބަސްވުމުގައި އާބަންކޯގެ ފަރާތުން ސޮއިކުރީ ކުންފުނީގެ މެނޭޖިންގ ޑިރެކްޓަރ އަހުމަދު އާތިފެވެ. އިކޮނިމިކް މިނިސްޓްރީގެ ފަރާތުން ސޮއިކުރީ ސްޓޭޓް މިނިސްޓަރ، ނީޒާ އިމާދެވެ. އަދި ބީސީސީގެ ފަރާތުން ސޮއިކުރީ މެނޭޖިންގ ޑިރެކްޓަރ ފަޒްލީނާ ފާކިރެވެ.
ރެޑްވޭވް މެގަމޯލް ފަހަތުގައި ތަރައްޤީ ކުރަމުން އަންނަ ކޮންޓެއިނަރ ޕާކަކީ ރާއްޖެގައި ތަރައްޤީކުރާ ފުރަތަމަ ކޮންޓެއިނަރ ޕާކު ކަމަށް އާބަންކޯއިން ބުނެއެވެ.
އެތަނުގެ މަސައްކަތް މިހާރު ނިމުމަކާ ގާތްވެފައިވާއިރު، އެތަނުގައި ހަދާ ކޯ ވަރކިންގ ސްޕޭސްއަކީ ރާއްޖޭގައި ހުޅުވާ މިފަދަ ދެވަނަ ތަން ކަމަށް ވެސް އާބަންކޯއިން ބުނެފައި ވެއެވެ. ކޯ-ވަރކިންގް ސްޕޭސެގެ އިތުރަށް މި ކޮންޓެއިނަރ ޕާކުގައި އިތުރަށް ދެ ކެފޭ ވެސް ހިންގުމަށް ވަނީ ނިންމާފައި ވާ ކަމަށް އާބަންކޯއިން ބުނެފައިވެއެވެ.
ފަށައިގަންނަ ވިޔަފާރިތަކަކީ ވަކި އޮފީސް ސްޕޭސްއެއް ހިންގުމުގެ ބުރަތައް އުފުލަން އެންމެ އެކަށީގެންވާ ވަރަށް ތައްޔާރުވެފައި ނުވާނެ ވިޔަފާރިތަކަށް ވާއިރު، އެފަދަ ވިޔަފާރިތައް ކުރިއެރުމަށް ބޭނުންވާ އެންމެ މުހިންމު އެއްކަމަކީ މަސައްކަތްކުރަން އެކަށީގެންވާ މާހައުލެއް ފޯރުކޮށްދިނުން ކަމަށް އާބަންކޯއިން ބުނެއެވެ.
އަދި ހުޅުމާލޭގައި ތަރައްޤޚކުރާ ކޮންޓެއިނަރ ޕާކުގައި މިފަދަ ތަނެއް ހެދުމުގެ މައިގަނޑު މަގްސަދަކީ ހުޅުމާލޭގެ ތަރައްޤީއާއި، ޒުވާނުންގެ ކުރިއެރުމަށްވެސް މަގުފަހިކުރުން ކަމަށް އެކުންފުނިން ބުނެފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
