ވާދަވެރި ކުޅުމަކަށްފަހު ކެލާ ކައުންސިލްގެ ޓީމު ބަލިކޮށް، ފައިނަލްގެ ދެވަނަ ޖާގަ ޓީމް ޕާމް އިން ހޯދައިފި

ކުލަބު ޖީއެސްގެ ފަރާތުން އިންތިޒާމްކޮށްގެން ހއ.ހޯރަފުށީގައި މިހާރު ކުރިއަށްދާ "2 ވަނަ ޖީއެސް ވޮލީބޯޅަ ޓޯނަމަންޓް" ގެ ސެމީ ފައިނަލުގައި އާދީއްތަ ދުވަހުގެ ރޭ ޓީމް ޕާމް އާއި ކެލާ ކައުންސިލްގެ ޓީމު ކުޅުނު މެޗު ވާދަވެރި ކުޅުމަކަށްފަހު 3 ސެޓް 2 ސެޓުން ކާމިޔާބުކޮށް މުބާރާތުގެ ފައިނަލުގެ ދެވަނަ ޖާގަ ޓީމް ޕާމް އިން ހޯދައިފި އެވެ.

ޗެންޕިއަން ޓީމަށް 25000 ރުފިޔާ އަދި ރަނައަޕް ޓީމަށް 10000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި މިއަހަރު ހަތަރު ޓީމު ބައިވެރިވިއިރު، މުބާރާތް ކުރިއަށް ގެންގޮސްފައިވަނީ ބައިވެރިވި ހަތަރު ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއް މެޗު ކުޅެ އެންމެ ގިނަ ޕޮއިންޓް ހޯދާ ޓީމަކަށް ފައިނަލުގެ ޖާގައެއް ލިބޭގޮތަށެވެ. އަދި ލީގު ބުރުގެ ދެވަނަ އަދި ތިންވަނަ ޓީމުގެ މެދުގައި ސެމީ ފައިނަލް މެޗެއް ކުޅެ އެމެޗުން މޮޅުވާ ޓީމަކަށް ފައިނަލުގެ ދެވަނަ ޖާގަ ލިބޭގޮތަށެވެ.

އެގޮތުން މުބާރާތުގެ ލީގު ބުރުގެ އެއްވަަނަ ޓީމުގެ ގޮތުގައި ފައިނަލުގެ ފުރަތަަމަ ޖާގަ ހޯދީ ޓީމު ހިޔާ އެވެ. އަދި ލީގު ބުރުގެ ދެވަނަ ޓީމް ޕާމް ހޯދި އިރު، ތިންވަނަ ލިބުނީ ކެލާ ކައުންސިލްގެ ޓީމަށެވެ. އަދި ލީގު ބުރުގައި ކެލާ ކައުންސިލްގެ ޓީމާއި ޓީމް ޕާމް ވާދަކުރި މެޗު 3 ސެޓް އެއް ސެޓުން ކާމިޔާބުކޮށްފައިވަނީ ޓީމް ޕާމް އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ ސެމީފައިނަލް މެޗުގެ ފުރަތަަމަ ސެޓް 22-25 އިން ކާމިޔާބުކުރީ ކެލާ ކައުންސިލްގެ ޓީމެވެ. ނަމަވެސް ޖެހިގެން އައި ދެސެޓް ޓީމް ޕަމް އިން ވަނީ 25-21 އިން ކާމިޔާބުކޮށްފައެވެ. މިއާއެކު މެޗުގެ ފޯރި އިތުރަށް ގަދަވެގެން ދިޔައީ ހަތަރުވަނަ ސެޓު ވަރަށް ވާދަވެރި ކުޅުމަކަށްފަހު 29-31 އިން ކެލާ ކައުންސިލްގެ ޓީމު ކާމިޔާބުކޮށް މެޗުގެ ނަތީޖާ އެއްވަރުކުރުމުންނެވެ. އަދި ނަތީޖާ ނެރުމަށްޓަކައި ކުޅެވުނު ފަސްވަނަ ސެޓް 12-15 އިން ކާމިޔާބުކޮށް ޓީމް ޕާމް އިން ވަނީ ތިން ސެޓް ދެ ސެޓުން މެޗު ކާމިޔާބުކޮށް ފައިނަލުގެ ދެވަނަ ޖާގަ ކަށަވަރުކޮށްފައެވެ. އަދި މިމެޗުގެ މޮޅު ކުޅުންތެރިޔަކަށް ހޮވުނީ ޓީމް ޕާމްގެ ލަަޝިންދު އެވެ.

މި މުބާރާތުގެ ފައިނަލް މެޗުގައި ޓީމް ޕާމް އާއި ޓީމު ހިޔާ ވާދަކުރާ މެޗު ކުޅުމަށް ހަމަޖެހިފައިވަނީ މިމަހުގެ 19 ވަނަ ދުވަހުގެ ރޭ 20:30 ގައެވެ.

މި މުބާރާތަކީ ހޯރަފުށީގައި ވޮލީބޯޅަ ދިރުވައި އާލާކުރުމުގެ އިތުރުން ރަށުގެ ޒުވާނުންގެ މެދުގައި އެކުވެރިކަމާއި އެއްބައިވަންތަކަން އާލާކުރުމުގެ މަގުސަދުގައި 2021 ވަނަ އަހަރު ހއ.ހޯރަފުށީގައި ހަރަކާތެރިވާ ކުލަބު ޖަމިއްޔާތަކާއި ސަރުކާރުގެ އޮފީސްތަކާއި، ސަރުކާރު ހިއްސާވާ ކުންފުނިތަކުގެ އިތުރުން އަމިއްލަ ކުންފުނިތަކާއި އަމިއްލަ ވިޔަފާރިތަކަށް ބައިވެރިވުމުގެ ފުރުސަތު ހުޅުވާލައިގެން ކުލަބު ޖީއެސް އިން ބާއްވަން ފެށި މުބާރާތެކެވެ.