ރައީސް ޞާލިހުގެ ކެމްޕޭނު ދަތުރުތައް ފަށާ، ކޮންމެ ރަށެއްގައި އެމްޑީޕީގެ ބޮޑު ދިދަ ނަގަނީ
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން 2023 ވަނަ އަހަރުގެ ރިޔާސީ އިންތިޚާބަށް ނެރޭ މެނިފެސްޓޯ ތައްޔާރުކުރުމަށް ބޭނުންވާ މައުލޫމާތު އެއްކުރުމާއި، ޕާޓީއަށް މެމްބަރުން އިތުރުކޮށް ރިޔާސީ ކެންޕޭނު ދަތުރުތައް ފަށައިފި އެވެ.
އެކަމާއި ގުޅޭ މައުލޫމާތު ދިނުމަށް މިއަދު އެ ޕާޓީއިން ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ޗެއާޕާސަންގެ ނާއިބު އިބްރާހިމް ވަހީދު ވިދާޅުވީ މިއަދާއި ކުރިއަށް އޮތް ހަފްތާ ބަންދުގައި މުޅި ރާއްޖޭގައި އެމްޑީޕީގެ މުހިންމު ހަރަކާތްތަކެއް ކުރިއަށް ދާނެ ކަމަށެވެ.
އެ ހަރަކާތްތައް ހިންގުމަށް މާލެއިން އެމްޑީޕީގެ ޓީމުތައް މިހާރު އަތޮޅުތެރެއަށް ފުރާފައިވާ ކަމަށާއި، އެ ޓީމުތަކުގައި ސަރުކާރުގެ މިނިސްޓަރުންނާއި، ސްޓޭޓް މިނިސްޓަރުންގެ އިތުރުން ސަރުކާރުގެ ސިޔާސީ މަގާމުތަކުގައި ތިއްބެވި ގިނަ ބޭފުޅުން ބައިވެރިވެވަޑައިގަންނަވާނެ ކަމަށެވެ.
އިބްރާހިމް ވަހީދު ވިދާޅުވީ ރިޔާސީ މެނިފެސްޓޯއަށް ބޭނުންވާ މައުލޫމާތުތައް އެއްކުރުމުގެ އިތުރުން، ރިޔާސީ އިންތިޚާބަށް އަތޮޅުތެރޭގެ ހަރަކާތްތައް ފެށުމަށް ކޮންމެ ރަށެއްގައިވެސް އެމްޑީޕީގެ ބޮޑު ދިދަ ނެގުމުގެ ހަރަކާތެއް ކުރިއަށް ގެންދާނެ ކަމަށެވެ.
"މެނިފެސްޓޯއަށް މައުލޫމާތު ހޯދުމުގެ އިތުރުން އެމްޑީޕީގެ ދިދައެއް ނަގާނެ ކޮންމެ ރަށެއްގައި. ދެން ހުރިހާ ރަށެއްގައި ޕޯސްޓާ އިވެންޓެއް ކުރިއަށް ގެންދާނެ"
އެމްޑީޕީގެ ޗެއާ ޕާސަންގެ ނައިބު އިބްރާހިމް ވަހީދު
ރިޔާސީ އިންތިޚާބަށް ތައްޔާރުވުމަށް އެމްޑީޕީން މަސައްކަތް ފަށާފައިވާއިރު، މިއީ ވަރަށް އިންތިޒާމުވެގެން ހިންގޭ ހަރަކާތްތަކެއް ގޮތުގައި އެ ޕާޓީން ވަނީ ބުނެފައެވެ.
އެގޮތުން ކުރިއަށް އޮތް ދުވަސްތަކުގައި އެމްޑީޕީގެ މެނިފެސްޓޯއަށް ބޭނުންވާ މައުލޫމާތުތައް އެއްކޯށް ރަށްތަކުގައި ކެމްޕޭނު ޓީމުތައްވެސް އެކުލަވާލެވިގެން ދާނެކަމަށް އެމްޑީޕީން ވަނީ ބުނެފައެވެ.
އެމްޑީޕީގެ ރިޔާސީ ކެންޑިޑޭޓު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ދެވަނަ ދައުރެއް ހޯދާދިނުމުގެ މަސައްކަތް އެމްޑީޕީން ރަސްމީކޮށް ފަށާފައިވާއިރު، އެމްޑީޕީއަށް ގިނަ ދުވަސްތަކެއް ވަންދެން ޚިދުމަތްކޮށްދެއްވި އަދި އެމްޑީޕީގެ ރައީސް މުޙައްމަދު ނަޝީދަށް ވަފާތެރި ގިނަ މެމްބަރުންތަކެއް ވަނީ ޕާޓީން ވަކިވެފަ އެވެ.
އެހެންކަމުން އެމްޑީޕީން ރިޔާސީ އިންތިޚާބުގެ ކެމްޕޭނު ފަށާފައި މިވަނީ ޕާޓީގެ ތާރީޚުގައި ވެސް ތަޖުރިބާކޮށްފައިވާ އެންމެ ބޮޑު ޚިޔާލުތަފާތުވުންތަކުގައި ޕާޓީ ބައިބައި ވެފައިވާ ދަނޑިވަޅެއްގަ އެވެ.
ޕާޓީން ވަކިވި ފަރާތްތައް އެމްޑީޕީއަށް އިތުރަށް ވެރިކަން ހޯދައިދޭން ޖެހޭ ސަބަބެއް ނެތްކަމަށް ވިދާޅުވަމުން ދިޔަ ނަމަވެސް ޗެއާ ޕާސަން ފައްޔާޒު އިސްމާއިލް އަދި އެމްޑީޕީގައި މިވަގުތު ތިއްބެވި އިސް ބޭފުޅުން ވިދާޅުވަމުން ގެންދަވަނީ ރައީސް ޞާލިހާއެކު އެ ޕާޓީއަށް ވެރިކަމުގެ އާ ދައުރެއް ހޯދޭނެ ކަމަށެވެ. އަދި އެ މަސައްކަތް ވަރަށް ފޯރީގައި ކުރިއަށް ގެންދާނެ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
