ސިޚް ލީޑަރު މަރާލުމުގައި އިންޑިޔާގެ އަތެއް ވާކަމަށް ބުނި ބުނުމަށް އެމެރިކާއިން ތާއީދުކޮށްފި

ކެނެޑާގެ ރައްޔިތެއް ކަމަށްވާ ހަރްދީޕް ސިންހް ނިއްޖާރު މަރާލުމުގައި އިންޑިޔާގެ އަތެއްވާ ކަމަށް ބުނި ބުނުމަށް އެމެރިކާއިންވެސް ތާއީދު ކޮށްފިއެވެ.

ކެނެޑާއިން ކުރި ތުހުމަތަށް އެމެރިކާއިން ތާއީދު ކޮށްފައިވާއިރު އިނގިރޭސި ވިލާތުން ބުނެފައިވަނީ ކެނެޑާއިން ކޮށްފައިވާ އެ ތުހުމަތުތަކުގެ ސަބަބުން އެކަން ކައިރިން ބަލަމުން އަންނަ ކަމަށެވެ.

އޮސްޓްރޭލިޔާ އިން މިކަމާއި މެދު ބުނެފައިވަނީ ނިއްޖާރް މަރާލުމުގައި އިންޑިޔާގެ އަތެއް ވާކަމަށް ބުނަމުންދާ ބުނުމާއި މެދު އިންތިހާއަށް ކަންބޮޑު ވާ ކަމަށެވެ.

ކެނެޑާގެ ބޮޑު ވަޒީރު ޖަސްޓިން ޓްރޫޑޯ ހޯމަ ދުވަހު އެޤައުމުގެ ޕާލިމެންޓްގައި ވާހަކަ ދައްކަވަމުން ވިދާޅުވެފައިވަނީ ޖީ20 ސަމިޓްގެ ތެރެއިން އިންޑިޔާގެ ބޮޑު ވަޒީރް ނަރެންދްރަ މޯދީ އާއި ބައްދަލުކޮށް ނިއްޖާރުގެ މައްސަލައިގައި ކަންބޮޑުވުން ފާޅު ކޮށްފައި ވާނެ ކަމަށެވެ. އަދި ކެނެޑާގެ ރައްޔިތަކު އެހެން ޤައުމެއްގެ ސަރުކާރުން ކެނެޑާގެ ބިމުގައި މަރާލުމަކީ ބަލައިގަނެވޭނެ ކަމެއް ނޫން ކަމަށާއި، އެއީ އެޤައުމުގެ ސިޔާދަތައް އަރައިގަތުން ކަމަށެވެ.

އަދި އިންޑިޔާގެ ސަރުކާރަށް ޓްރޫޑޯ ގޮވައިލައްވައިފައިވަނީ އެކަން ތަހްޤީޤު ކުރުމަށް ކެނެޑާގެ ސަރުކާރަށް ދެވެން އޮތް އެއްބާރުލެއްވުމެއް އެންމެ ބޮޑަކަށް ދެއްވުމަށެވެ.

އިންޑިޔާގެ ފޮރިން މިނިސްޓްރީ އިން ވަނީ ކެނެޑާގެ ސަރުކާރުން ކުރާ ތުހުމަތުތައް ދޮގު ކޮށްފައެވެ. އަދި އެވާހަކަތަކަކީ އެއްވެސް އަސްލެއް ނެތް ހަދައިގެން ދައްކާ ވާހަކަ ތަކެއް ކަމަށް ބުނެފައެވެ.

ކެނެޑާގެ މި ތުހުމަތުތަކާއި ގުޅިގެން އިންޑިޔާގައި ހުންނަ ކެނެޑާގެ ޑިޕްލޮމޭޓް ވަނީ ޤައުމުން ބޭރުކޮށްފައެވެ. ހަމަ އެއާއި އެކު ކެނެޑާއިންވެސް ވަނީ އެޤައުމުގައި ހުރި އިންޑިޔާގެ އިސް ޑިޕްލޮމޭޓެއް އެޤައުމުން ބޭރުކޮށްފައެވެ.

ހަރްދީޕް ސިންހް ނިއްޖާރަކީ ޚާލިސްޠާނުގެ ނަމުގައި ސިޚުންނަށް ވަކި ދައުލަތެއް ޤާއިމް ކުރުމަށް ގޮވާލަމުން ދިޔަ އެކްޓިވިސްޓުންގެ ލީޑަރެކެވެ. އޭނާގެ މަރުގެ ފަހަތުގައި އިންޑިޔާ ސަރުކާރުގެ އަތެއް ވާ ކަމަށް ބުނަމުން ދާއިރު، އިންޑިޔާއިން 2020 ވަނަ އަހަރުގެ ޖުލައި މަހު އޭނާ އަކީ ޓެރަރިސްޓެއް ކަމަށް ވަނީ ނިންމައިފައެވެ.

ނިއްޖާރު މަރާލައިފައިވަނީ މިދިޔަ ޖޫން މަހުގެ 18 ވަނަ ދުވަހު، ބްރިޓިޝް ކޮލަމްބިއާގެ ސަރީގައި ހުންނަ ސިޚް ޓެމްޕަލްއެއްގެ ބޭރުގައި ހުއްޓައެވެ.