މައިދާން ދޫކޮށް ދިޔުމަކީ އަހަރެމެންނަށް އޮތް އިޚްތިޔާރެއް ނޫން: ޣައްޒާގެ ވޮލެންޓިއަރ ޑޮކްޓަރުން
ޚިދްމަތް ހޯދުމަށް އައިސް ތިބި ބަލިމީހުން ދޫކޮށް ދިޔުމަކީ އޮތް "އޮޕްޝަނެއް"ނޫން ކަމަށް ޣައްޒާގައި މަސައްކަތް ކުރަމުންދާ ވޮލެންޓިއަރ ޑޮކްޓަރުން ބުނެފިއެވެ.
އަލްޖަޒީރާ އާއި ވާހަކަ ދެއްކި ޑރ މުޙައްމަދު ޢަލީ ސާލިމް ބުނެފައިވަނީ ހޮސްޕިޓަލެއްގައި މަސައްކަތް ކުރުމަކީ ކިހާބޮޑު ރިސްކެއް ކަން އެނގޭ ކަމަށެވެ. ހޮސްޕިޓަލުގެ މަސައްކަތައް ގުޅުނީ އެކަން އެނގިހުރެ ކަމަށެވެ.
"ޢާންމު ގޮތެއްގައިވެސް ހޮސްޕިޓަލެއްގައި މަސައްކަތް ކުރުމަކީ ބުރަ ބޮޑު ކަމެއް، އަދި މިފަދަ ދަނޑިވަޅެއްގައި، ހަނގުރާމައިގެ ތެރޭގައި، ކުރިއައް އޮތް ވަގުތު ކޮޅު މަރުވާނީ ނޫންކަމެއް ވެސް ނޭނގޭ" މުޙައްމަދު ބުނެފައިވެއެވެ.
25 އަހަރުގެ ޑރ މުޙައްމަދަކީ ޣައްޒާގެ އިސްލާމިކް ޔުނިވަރސިޓީ އިން ފިޒިޔޯތެރަޕީގެ ދާއިރާއިން ޚާއްސަ ވެފައިވާ ޑޮކްޓަރެކެވެ. އޮކްޓޫބަރު 19 ވަނަ ދުވަހު އިޒްރާއިލުން ދިން ހަމަލާއެއްގައި އޭނާގެ ޢާއިލާގެ ގެ ހަލާކުވުމާއި އެކު އޭނާ ވަނީ ޣައްޒާގައި ހުންނަ އަލް އަޤްޞާ ޝަހީދުންގެ ހޮސްޕިޓަލުގައި ވޮލެންޓިއަރ ކޮށް މަަސައްކަތް ފަށައިފައެވެ. އޭގެ ފަހުން އޭނާއަށް އޭނާގެ ޢާއިލާ ފެނިފައިވަނީ 2 ފަހަރަށް ކަމަށް އަލްޖަޒީރާގައި ބުނެފައިވެއެވެ.
ޑރ މުޙައްމަދު ފަދަ ކިތަންމެ ޑޮކްޓަރެއް ޣައްޒާގެ ހޮސްޕިޓަލްތަކުގައި ހިލޭ ސާބަހަށް ފުރާނަ އަތްމައްޗަށް ލައިގެން މަސައްކަތް ކުރަމުންއެބަދެއެވެ.
އެ ހުރިހާ ޑޮކްޓަރުންނެއްވެސް ބުނެފައިވަނީ މައިދާން ދޫކޮށް އެމީހުން ނުދާނެ ކަމަށާއި ހަމަލާތަކުގައި ޒަޚަމް ވަމުންދާ މީހުންނަށް ފަރުވާދިނުމުގައި ދެމިތިބޭނެ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
