ފަލަސްތީންގެ ރައީސް މަހްމޫދު އައްބާސް މިއަދު ސްޕޭނަށް ވަޑައިގަންނަވަނީ

ފަލަސްތީންގެ ރައީސް މަހުމޫދު އައްބާސް ސްޕެއިން އަށް ވަޑައިގަންނަވާ ކަމަށް އެގައުމުގެ މީޑިއާތަކުން ބުނެފިއެވެ.

ސްޕޭނުން ދެކޭ ގޮތުގައި ފަލަސްތީން ވާން ޖެހޭނީ މިނިވަން ދައުލަތަކަށެވެ. އަދި މިނިވަން ދައުލަތަކާ މެދު ސްޕޭނުން އަމަލުކުރާ ގޮތަށް ފަލަސްތީންއާ މެދު އަމަލުކުރާނެ ކަމަށްވެސް މެޑްރިޑުން އޮތީ ބުނެފަ އެވެ.

އައްބާސްގެ މި ދަތުރުގައި ސްޕޭންގެ ރަސްގެފާން ފެލިޕެ ހަވަނައާ ބައްދަލުކުރައްވައި ފަލަސްތީންގެ ކުރިމަގާ މެދު މަޝްވަރާކުރައްވާނެ އެވެ. އަދި މެދުއިރުމަތި އަމާން ތަނަކަށް ހެދުމަށް ނުފޫޒުގަދަ ސަރުކާރުތަކަށް ޕްރެޝަރުކުރެއްވުމަށް ދަންނަވާނެ އެވެ.

މަހްމޫދު އައްބާސް ވަނީ ސައޫދީ އަރަބިއްޔާ، ޗައިނާ އަދި ރަޝިއާއަށް ވަޑައިގެން މަތީ ފެންވަރުގެ ވެރިންނާ ވެސް މިކަމާ ގުޅިގެން މަޝްވަރާކުރައްވާފަ އެވެ.

މިދިޔަ އަހަރު އޮކްޓޯބަރު މަހުގެ 7 ވަނަ ދުވަހުގައި ޣައްޒާ މިނިވަންކުރުމަށް ޖިހާދުކުރަމުންދާ ހަމާސްގެ މުޖާހިދުން އިޒުރޭލުގެ ބޯޑަރުތައް ހުރަސްކޮށް ޔަހޫދީ އާބާދީތަކަށް ވަދެ، އެމީހުންގެ 1،205 މީހުންމަރާލިއެވެ.

މިކަމާގުޅިގެން ހައްދުފަހަނަ އަޅާފައިވާ އިސްރާއީލުން ޣައްޒާއަށް ދެމުންދާ ނިރުވަބެރި ހަމަލާތަކުގައި ޝަހީދުކޮށްލާފައިވާ މީހުންގެ އަދަދުވަނީ 42،000 އިން މައްޗަށް އަރާފައެވެ.