ސްޓެލްކޯ މަހިބަދޫ އިންޓަ އޮފީސް ވޮލީ މުބާރާތުގެ އަންހެން ޑިވިޝަން: ވޮރިއާޒް އާއި އެލީޓް ކުޅުނު ދެވަނަ މެޗުންވެސް މޮޅުވެއްޖެ

އދ. މަހިބަދޫގައި ފޯރިއާއެކު ކުރިއަށްދާ ސްޓެލްކޯ އިންޓަ އޮފީސް ވޮލީބޯޅަ މުބާރާތުގެ އަންހެން ޑިވިޝަނުގައި މަހިބަދޫ ކައުންސިލްގެ ވޮރިއާޒް އަދި ހޮސްޕިޓަލްގެ އެލީޓް ކުޅުނު ދެވަނަ މެޗުންވެސް މޮޅުވެ، މުބާރާތުގައި ރަނގަޅު ފެށުމެއް ދަމަހައްޓައިފިއެވެ.

މުބާރާތުގެ 11 ވަނަ މެޗުގައި ބައްދަލުކުރީ މަހިބަދޫ ކައުންސިލްގެ ވޮރިއާޒް އަދި ޓީމު ސްކާލެޓެވެ. މި މެޗު ސީދާ ދެ ސެޓުން ކާމިޔާބުކުރީ ވޮރިއާޒް އެވެ. މެޗުގެ ފުރަތަމަ ސެޓު 18-7 އިން ވޮރިއާޒް ގެންދިޔައިރު، ދެވަނަ ސެޓު އެ ޓީމުން ކާމިޔާބުކުރީ 18-4 ގެ ބޮޑު ތަފާތަކުންނެވެ.

މި މެޗުގެ މޮޅު ކުޅުންތެރިޔާގެ މަގާމު ހޯދީ ވޮރިއާޒްގެ ޖާޒީ ނަންބަރު 9 ފާތިމަތު ޝާރަތެވެ. މުބާރާތުގައި ވޮރިއާޒް ކުޅުނު ފުރަތަމަ މެޗުންވެސް އެ ޓީމު ވަނީ މޮޅުވެފައެވެ.

މުބާރާތުގެ 12 ވަނަ މެޗުގައި ބައްދަލުކުރީ ޕޮލިސް ޓީމާއި ހޮސްޕިޓަލްގެ އެލީޓް އެވެ. މި މެޗުވެސް ސީދާ ދެ ސެޓުން ކާމިޔާބުކުރީ އެލީޓް ޓީމެވެ. އެގޮތުން މެޗުގެ ފުރަތަމަ ސެޓު 18-5 އިން އަދި ދެވަނަ ސެޓު 18-8 އިން ގެންދިޔައީ އެލީޓުންނެވެ.

މި މެޗުގެ 'ވުމެން އޮފް ދަ މެޗު' އަކަށް ހޮވިފައިވަނީ އެލީޓް ޓީމުގެ ޖާޒީ ނަންބަރު 7 ހައްވާ ޝާމަތެވެ.

މުބާރާތުގެ އަންހެން ޑިވިޝަންގައި ޕޮލިސް ކުޅުނު ފުރަތަމަ މެޗުންވެސް އެ ޓީމު ބަލިވެފައިވާއިރު، އެލީޓް ވަނީ އެ ޓީމު ކުޅުނު ފުރަތަމަ މެޗުވެސް ކާމިޔާބުކޮށްފައެވެ.

މަހިބަދޫ ސްޓެލްކޯ އިންޖީނުގެއިން އިންތިޒާމުކޮށްގެން ކުރިއަށްގެންދާ މި މުބާރާތަކީ މި މުބާރާތް ބާއްވާ ތިންވަނަ އަހަރެވެ. ވޭތުވެދިޔަ ދެ އަހަރާ ޚިލާފަށް މިއަހަރުގެ މުބާރާތް ކުރިއަށް ގެންދަނީ ފިރިހެން އަދި އަންހެން ޑިވިޝަން ވެސް ހިމަނައިގެންނެވެ. އެގޮތުން މަހިބަދޫގެ 14 މުއައްސަސާއަކުން ޖުމްލަ 19 ޓީމު މި މުބާރާތުގައި ވާދަކުރެއެވެ. އޭގެ ތެރޭގައި ހިމެނެނީ ފިރިހެން 10 ޓީމާއި އަންހެން 9 ޓީމެވެ.

މި މުބާރާތުގައި 222 ކުޅުންތެރިންނާއި 86 އޮފިޝަލުންނާއެކު ޖުމްލަ 308 ފަރާތަކުން ބައިވެރިވެއެވެ. މުޅި މުބާރާތުގައި ޖުމްލަ 42 މެޗު ކުޅުމަށް ވަނީ ތާވަލުކުރެވިފައެވެ.