އަޅުކަން ކުރުމަކީ ވަކި މޫސުމަކާއި ގުޅިފައި އޮންނަންވާނެ ކަމެއް ނޫން: ހުކުރު ޚުޠުބާ

އަޅުކަން ކުރުމަކީ ވަކި މޫސުމަކާއި ގުޅިފައި އޮންނަންވާނެ ކަމެއް ނޫން ކަމަށް މިއަދުގެ ހުކުރު ޚުޠުބާގައި ބުނެފިއެވެ.

ޚުތުބާގައި ބުނެފައިވަނީ އަޅުކަން ކުރުމަކީ ވަކި މޫސުމަކާއި ގުޅިފައި އޮންނަންވާނެ ކަމެއް ނޫން ކަމަށާއި އެހެނީ ރަމަޟާން މަހުގެ ވެރި ،الله އަކީ އެހެން މަސްމަތަކުގެވެސް ވެރި الله ކަމަށެވެ. އަދި މުއުމިނުންނަކީ، ވަކި މަހެއްގައި، ނުވަތަ ވަކި މޫސުމެއްގައި، الله އަށް އަޅުކަން ކުރަންޖެހޭ ބައެއް ނޫން ކަމަށާއި، މުއުމިނުންގެ މުޅި ހަޔާތުގައިވެސް އަޅުކަން ކުރަންޖެހޭކަމަށެވެ.

"މުއުމިނުންގެ މުޅި ހަޔާތުގައިވެސް އަޅުކަން ކުރަންޖެހޭ، ބައެއް މޫސުންތަކުގައި އަޅުކަން ކުރުން ގިނަވޭ، ރަމަޟާން މަހަކީ އެފަދަ މޫސުމެއް، އެއީ އެމޫސުމުގެ ބޭނުން ހެޔޮގޮތުގައި ހިފުމަށް، އަދި އެމަސްނިމުނީމާވެސް މުސްލިމުން އަޅުކަމުގައި ދެމިތިބޭނެ"

ހުކުރު ޚުތުބާ

ރަމަޟާން މަސް އަހަރެމެންނާއި އަލްވަދާޢު ކިޔައިފި ކަމަށާއި، ނަމަވެސް އެމަހުގެ ވެރި الله ދިރި ދޮމިވޮޑިގެންވާ ކަމަށް ޚުތުބާގައި ބުނެފައިވެއެވެ. އަދި ފުރިހަމަ މުއުމިނަކު، ދުވަހުކުވެސް ހެޔޮ ޢަމަލު ކުރުމަށް އަލްވަދާޢެއް ނުކިޔާނެ ކަމަށްވެސް މިއަދުގެ ޚުތުބާގައި ބުނެފައިވެއެވެ. އެހެންކަމުން އަހަރެމެންނަށް އޮތީ ހެޔޮ ޢަމަލުކުރުން މަތީ ދެމިތިބުން ކަމަށާއި، ޔަޤީންވެގެންވާ މަރު އަހަރެމެންނާއި ބައްދަލުކޮށްފުމަށް ދާންދެނެއެވެ. އަޅުކަން ކުރުމަކީ އަހަރެމެން ޚަލްޤުކުރައްވާ، އަހަރެމެންގެ މައްޗަށް ވާޖިބު ކުރައްވާފައިވާ ކަމެއް ކަމަށް ޚުތުބާ އިއްވަމުން ޚަތީބު ބުނެފައެވެ.

މުސްލިމަކު ހެޔޮ ޢަމަލުކުރުމަށް ފަހު، އެންމެ މުހިންމުކަމަކީ، އެ ޢަމަލު ޤަބޫލުކުރައްވާތޯ ދެންނެވުމާއި، އެކުރެވުނު ހެޔޮޢަމަލުތައް ކުރުންމަތީ ދެމިހުރުމުގެ ތައުފީޤަށް އެދި ދުޢާ ދެންނެވުން ކަމަށްވެސް ޚުތުބާގައި ބުނެފައިވެއެވެ.

ރަމަޟާންމަސް އަހަރެމެންނާއި ވަކިވެގެންދިޔައީ، ޝައްވާލު މަހުގެ ހަރޯދައިގެ ނިޢުމަތަށް މަގު ފަހިކޮށްދީފައި ކަމަށާއި، އެހެންކަމުން  ހެޔޮކަމަށް އެދޭމީހަކަށް ވުމަށް ޚުތުބާގައި ގޮވާލައިފައިވެއެވެ. އަދި ދީލަތިވަންތަ الله ދެއްވި މި ނިޢުމަތުގެ ބޭނުންހިފުމަށާއި މުޅި އަހަރު ދުވަހު ރޯދަހިފިކަމުގެ ޘަވާބު ލިބިގަތުމަށް ވެސް ޚުތުބާގައި ނަސޭހަތް ތެރވިވެފައި ވެއެވެ.

ނިމިދިޔަ ރަމަޟާން މަހު، އަޅުކަމުގައި ފަރުވާ ކުޑަކުރެވިފައިވާނަމަ މިއީ ރަނުގެ ފުރުސަތެއް ކަމަށާއި ތައުބާގެ ހިތަކާއި އެކު، الله ގެ ހަޟްރަތަށް ރުޖޫޢަވުމުގެ ރަނގަޅު ފުރުސަތެއް ކަމަށާއި އެހެނީ ހެޔޮ ޢަމަލުތަކަކީ ނުބައިކަންތައް ފޮހެލާ ކައްފާރާއެއް ކަމަށް ޚުތުބާގައި ބުނެފައިވެއެވެ.

"ގިނަގިނައިން ތައުބާވެ، މާތް الله އަށް އިސްތިޣްފާރް ކުރާށެ، އިސްތިޣްފާރު ކުރުމަކީ اللهގެ ހަޟްރަތުގައި ފާފަފުއްސެވުމަށް އެދި ދެންނެވުން، އެކަނލާންގެ އެއީ ތައުބާވާ މީހުންގެ ތައުބާ ޤަބޫލު ކުރައްވާ ފާފަފުއްސަވާ ރަސްކަނލާންގެ، އެކަނލާންގެ އެއި އެކަނލާންގެ ކޯފާއަށްވުރެ ރަޙްމަތް ތަނަވަސް، އެކަނލާންގެ ޒާތުފުޅަށް ރަޙްމަތް ލާޒިމް ކުރައްވާފައިވާ ރަސްކަނލާންގެ" ޚުތުބާގައި ބުނެފައިވެއެވެ.

އަދި ހެޔޮކަމަށް އެދޭމީހާ އެކަމަށް އަވަސްވެގަތުމަށާއި އެކަނލާންގެ ރަޙްމަތުގެ ދޮރުކޮޅަކީ އެދޮރުކޮޅުން ވަންނަން ބޭނުން ކޮންމެ މީހަކަށް ހުޅުވާލެވިފައިވާ ދޮރުކޮޅެއް ކަމަށް ޚުތުބާގައި ގޮވާލައިފައިވެއެވެ.