ޝާހިދު ތައުރީފު އޮއްސާލައިފި: ހިތްތިރި، ކެތްތެރި، އޯގާތެރި، ހެޔޮލަފާ ނަމޫނާ ވެރިއެއް!

ފޮރިން މިނިސްޓަރު އަބްދުالله ޝާހިދުގެ ތައުރީފު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ބަންޑުންކޮށްލައިފި އެވެ.

2023 ވަނަ އަހަރަށް ސަރުކާރު ހިންގާ މައި ޕާޓީ، އެމްޑީޕީއިން ނެރޭ މެނިފެސްޓޯ އެކުލަލާލުމަށް ބޭނުންވާ މަސައްކަތް ފަށައި، ރިޔާސީ އިންތިޚާބުގެ ކެމްޕޭނު ފެށުމަށް އަތޮޅުތެެރޭގެ ހަރަކާތްތައް ވަރުގަދަ ކުރުމުގެ މަސައްކަތް ވަނީ ފަށާފަ އެވެ.

އެ ހަރަކާތްތައް ފެށުމަށް ކޮންމެ ރަށެއްގައި ވެސް އެމްޑީޕީގެ ބޮޑު ދިދައެއް ވަނީ ނަގާފަ އެވެ.

އެމްޑީޕީގެ މި ހަރަކާތްތައް ފެށިގެން ކުރިއަށްދާ މި ދަނޑިވަޅުގައި ޝާހިދު ކުރެއްވި ޓްވީޓެއްގައި ވަނީ ރައީސުލްޖުމްހޫރިއް އިބްރާހިމް މުޙައްމަދު ޞާލިހަށް ވަރަށް ބޮޑަށް ތައުރީފު ކުރައްވާފަ އެވެ.

މިނިސްޓަރު ޝާހިދު ވިދާޅުވީ ރައީސް ޞާލިހަކީ ހިތްތެރިކަމާއި، ކެތްތެރިކަމާއި، އޯގާތެރިކަމުގެ އެފަދަ ދެވަނައެއް ނުވާ ނަމޫނާ ލީޑަރެއް ކަމަށެވެ.

އޭގެ އިތުރުން އެމަނިކުފާނަކީ ހެޔޮލަފާ ވެރިއެއްކަމަށާއި، އެމަނިކުފާނުގެ ކިބައިގައި ހުރި ރީތި އާދަތަކަށް ރާއްޖޭގެ ތާރީޚު ހެކިވާނެކަމަށް ޝާހިދު ވިދާޅުވި އެވެ.

"ހިތްތިރި، ކެތްތެރި، އޯގާތެރި، ހެޔޮލަފާ، ރައްޔިތުން ދެކެ ލޯބިވާ ވެރިއެއް! ރައީސް އިބްރާހީމް މުޙައްމަދު ޞާލިޙް އަކީ ދިވެހިރާއްޖޭގެ ތާރީޚު އެކަމަށް ހެކިވާނެ ފަދަ ނަމޫނާ ވެރިއެއް"

ފޮރިން މިނިސްޓަރު އަބްދުﷲ ޝާހިދު

އެމްޑީޕީން ރިޔާސީ އިންތިޚާބުގެ ކެމްޕޭނު ފަށާފައިވަނީ، އެ ޕާޓީއަށް ގިނަ ދުވަސްތަކެއް ވަންދެން މަސައްކަތް ކުރައްވާފައިވާ، އަދި އެމްޑީޕީގެ ރައީސް މުޙައްމަދު ނަޝީދަށް ތާއީދުކުރައްވާ ގިނަ މެމްބަރުންތަކެއް ޕާޓީން ވަކިވެފައިވާ ދަނޑިވަޅެއްގަ އެވެ.

ވަކިވި މެމްބަރުން ވަނީ ރައީސް ޞާލިހާއި، މި ސަރުކާރަށް ވައްކަމާއި ކޮރަޕްޝަންގެ ގިނަ ތުހުމަތުތަކެއް ވެސް ކުރައްވާފަ އެވެ.

އެހެން ނަމަވެސް ޕާޓީން މެމްބަރުންތަކެއް ވަކިވެގެން ދިޔަ ދިއުމާއި ގުޅިގެން ރައީސް ޞާލިހު މިހާތަނަށް އެއްޗެއް ވިދާޅުވެފައެއް ނުވެއެވެ. އެމްޑީޕީން ބުނަމުން ދަނީ މިވަގުތު ޕާޓީގައި ތިއްބެވި އިސް ފަރާތްތަކާއި އެއްކޮށް މަސައްކަތްކޮށް ކުރިއަށް އޮތް ރިޔާސީ އިންތިޚާބު ކާމިޔާބު ކުރައްވާނެ ކަމަށެވެ.

އަދި ރައީސް ޞާލިހު ރިޔާސީ އިންތިޚާބު އެއްބުރުން ކާމިޔާބު ކުރައްވާނެކަމުގެ ޔަގީންކަން އޮތްކަމަށް ވެސް އެމްޑީޕީގެ އިސްވެރިން ދަނީ ވިދާޅުވަމުން ނެވެ.