"ރިޔާސީ އިންތިހާބަށް ދި ޑިމޮކްރެޓްސް ގެ ކެންޑިޑޭޓެއް ނުކުންނާނެ؛ ކޯލިޝަން ހަދަން ޖެހިއްޖެ ނަމަ ހަދާނަން"

ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދަށް ތާއީދު ކުރައްވާ މެންބަރުން އަލަށް އުފައްދަވާފައިވާ "ދި ޑިމޮކްރެޓްސް" އިން ކުރިއަށް އޮތް ރިޔާސީ އިންތިޚާބުގައި ކެންޑިޑޭޓެއް ނެރޭނެ ކަމަށް އެ ޕާޓީން ބުނެފި އެވެ.

"ދި ޑިމޮކްރެޓްސް" ޕާޓީ އުފެއްދުމުގެ ހުއްދައަށް އެދި އިލެކްޝަންސް ކޮމިޝަނަށް ފޯމް ހުށަހެޅުއްވުމަށްފަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ މީގެ ކުރިން ފިކުރެއްގެ ދިރުމުން ޖުމްހޫރީ ޕާޓީގެ ފަހަތަށް އެރުމުގެ މަޝްވަރާތަކެއް ކުރިއަށް ގެންގޮސްފައިވާ ކަން ފާހަކޮށް، ރިޔާސީ އިންތިހާބުގައި ވާދަކުރާނީ އެ ޕާޓީގެ ފަހަތުގައި ތޯ ނުވަތަ ދި ޑިމޮކްރެޓްސް އިން ކެންޑިޑޭޓެއް ނެރެގެންތޯ ސުވާލު ކޮށްފައެވެ.

އެ ސުވާލަށް ޖަވާބު ޖަވާބު ދެއްވަމުން އެ ޕާޓީގެ ސްޕޯކްސް ޕާސަން އަފްޝަން ލަތީފް ވިދާޅުވީ، ރިޔާސީ އިންތިހާބުގައި އެ ޕާޓީގެ ކެންޑިޑޭޓެއް ނުކުންނާނެ ކަމަށެވެ. އަދި ކޯލިޝަން ހެދުމާއި އެފަދަ މަޝްވަރާތައްވެސް ކުރިއަށް އޮތް ތަނުގައި ކުރިއަށް ގެންދަވާމެ ކަމަށެވެ.

އަފްޝަންގެ ވާހަކަތަކާއި ގުޅިގެން، ދި ޑިމޮކްރެޓްސް ޕާޓީ އުފެއްދުމުގެ ހުއްދަ އަށް އެދި ހުށަހެޅުއްވި، ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވެސް ވަނީ ރިޔާސީ އިންތިހާބުގައި އެ ޕާޓީގެ ކެންޑިޑޭޓެއް ނުކުންނާނެކަން ކަށަވަރު ކޮށްދެއްވާފައެވެ.

"އަޅުގަނޑުމެންގެ ކެންޑިޑޭޓެއް ހުންނާނެ. އެހެން ނަމަވެސް، އަބަދުވެސް އަޅުގަނޑުމެން މަޝްވަރާތަކެއް ކުރިއަށް ދާނެ. މިދަންނަވާ ވާހަކަ އަކީ ކޯލިޝަން އެއް ހަދަން ޖެހިއްްޖެ ހާލަތެއްގައި ކޯލިޝަން ހަދާނެ. އެހެން ނަމަވެސް، ދި ޑިމޮކްރެޓްސް ގެ ކެންޑިޑޭޓެއް އިރާދަކުރެއްވިޔާ މި އިންތިހާބުގައި ވާދަކުރާނެ"

ހެންވޭރު ހުޅަނގު ދާއިރާގެ މެންބަރު ހަސަން ލަތީފް

ރައީސް ނަޝީދުގެ ފެކްޝަނުން އުފައްދާ ޕާޓީން ކެންޑިޑޭޓަކު ނެރޭނެކަން ކަށަވަރު ކޮށްދީފައިވާއިރު، މީގެ ކުރިން އެ ފެކްޝަނުން މަސައްކަތް ކުރަމުން ދިޔައީ ޖުމްހޫރީ ޕާޓީ އާއި އެކުގައެވެ. އަދި ރިޔާސީ އިންތިޚާބުގައި ވެސް އެ ޕާޓީއާއިއެކު އެ ފެކްޝަނުން ކޯލިޝަން ހެދުމުގެ އަޑުތައް ވަނީ އަރާފައެވެ.