ދަ ޑިމޮކްރެޓްސް އުފެއްދުމުގެ ހުރިހާކަމެއް ކުރީ ރައީސް ނަޝީދަށް އެނގިގެން، ފެނިގެން: ހަސަން

މޯލްޑިވިއަން ޑިމޮކްރެޓިކް ޕާޓީ (އެމްޑީޕީން) ވަކިވެ "ދަ ޑިމޮކްރެޓްސް" ގެ ނަމުގައި އާ ސިޔާސީ ޕާޓީއެއް އުފެއްދުމަށް ހުށައެޅުމުގެ ހުރިހާކަމެއް ކުރިއަށް ގެންދިޔައީ ރައީސް މުޙައްމަދު ނަޝީދުގެ ލަފާފުޅު ހޯއްދައިގެން ކަމަށް ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވެއްޖެ އެވެ.

ހަސަން ލަތީފު މިފަދައިން ވިދާޅުވެފައިވަނީ އެމްޑީޕީގައި ތިއްބެވި ރައީސް ނަޝީދަށް ތާއީދުކުރައްވާ އަދި އެމަނިކުފާނައި އަރިސް ގިނަ ބަޔަކު ޕާޓީ ދޫކުރައްވާ ވަޑައިގެންނެވިއިރު ރައީސް ނަޝީދު އެމްޑީޕީގައި މަޑުކުރެއްވީ ކޮން ސަބަބަކާއި ހުރެތޯއާއި، އާ ސިޔާސީ ޕާޓީއެއް އުފެއްދީ ރައީސް ނަޝީދަށް ރިޔާސީ އިންތިޚާބުގައި ވާދަކުރުމުގެ ފުރުސަތު ހޯއްދަވާ ދިނުމުގެ ބޭނުމުގައިތޯ އައްސަވާ ވީ ޓީވީގެ ފަސް މަންޒަރު ޕްރޮގްރާމުގައި ކުރި ސުވާލަކަށް ޖަވާބުދެއްވަމުން ނެވެ.

ހަސަން ލަތީފު ވިދާޅުވީ އެމްޑީޕީއިން ވަކިވި މެމްބަރުންނަކީ ސިޔާސީ ކަންކަމުގައި ރައީސް ނަޝީދުގެ ލަފާފުޅާއި އިރުޝާދު ހޯއްދަވައިގެން މެނުވީ އެއްވެސް ކަމެއް ކުރައްވާ ބޭފުޅުންނެއް ނޫން ކަމަށެވެ.

އެގޮތުން ޕާޓީން އިސްތިއުފާދިނުމާއި، އާ ސިޔާސީ ޕާޓީއެއް އުފެއްދުމުގެ މަސައްކަތް ކުރިއަށް ގެންދަވާކަން ރައީސް ނަޝީދަށް އެނގިވަޑައިގަންނަވާނެ ކަމަށާއި، އެ މަސައްކަތް ކުރައްވާފައިވަނީ ރައީސް ނަޝީދުގެ ލަފާފުޅު ހޯއްދަވައިގެން ކަމަށެވެ.

"އަޅުގަނޑު އަރުވާ ޔަގީންކަމަކީ އަޅުގަނޑުމެން، އެއީ އެމްޑީޕީން ވަކިވި 12 މެމްބަރުން ނަމަވެސް ނުވަތަ ބޮޑުފެންވަޅުގޭގައި އަޅުގަނޑުމެން މި މަސައްކަތްކުރާ ޓީމުކަމުގައި ވީ ނަމަވެސް އަޅުގަނޑުމެން އެކަކުވެސް އަޅުގަނޑުމެންގެ ސިޔާސީ ކުރިމަގު، ސިޔާސީގޮތުން މިހާތަނަށް ކުރެވިފައި ހުރި ކަންކަން ޚާއްސަކޮށް މި ފަހުގެ ތާރީހުގައި، ކުރެވިފައި ހުރި ކަންކަމަކީ ރައީސް ނަޝީދުގެ ފެނިވަޑައިގަތުމާއި، އެނގިވަޑައިގަތުމުގެ ބޭރުން ކުރެވިފައި ހުރި ކަމެއް ނޫން. ހަަމަ އެއްވެސް ކަމެއް ނުކުރަން އަޅުގަނޑުމެންނެއް"

މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު

އޭގެ އިތުރުން ހަސަން ލަތީފު ވިދާޅުވީ އެމްޑީޕީ ދޫކުރައްވާ ނަޝީދު ވަޑައިގެން "ދަ ޑިމޮކްރެޓްސް" އާއި ގުޅިވަޑައިގަންނަވަން ބޭނުންފުޅުވާނަމަ އެއީ އެ މެމްބަރުން ވަރަށް ބޮޑަށް މަރުހަބާ ދަންނަވާނެ ކަމެއްކަމަށެވެ.

އަދި ރިޔާސީ އިންތިޚާބަށް ވާދަކުރުމުގެ ޝައުގުވެރިކަން ނަޝީދު ގެންގުޅުއްވާނަމަ އެ ފުރުސަތުވެސް އޮންނާނެ ކަމަށާއި، އެ ޕާޓީ އުފެއްދުމަށްޓަކައި އިސްކޮށް ހަރަކާތްތެރިވާ ފަރާތްތައް ނަޝީދަށް އެކަމުގައި އެހީތެރިވެ ދެއްވާނެކަމުގެ ޔަގީންކަން ވެސް އޮތްކަމަށް ހަސަން ލަތީފު ވިދާޅުވި އެވެ.

އެހެން ނަމަވެސް ނަޝީދު އެމްޑީޕީގައި ހުންނަވާ ސަބަބު ހަސަން ލަތީފު ހާމަކުރައްވާފައެއް ނުވެއެވެ. އަދި އޭނާ ވަނީ ކަނޑައެޅިގެން ރައީސް ނަޝީދާއި ގުޅުންހުރި ކަންކަން އެމަނިކުފާނުގެ އަރިހުން ސާފުކުރެއްވުމަށް އެދިވަޑައިގެންފަ އެވެ.