އަޅުގަނޑުގެ ވެރިކަމުގައި ފަރުވާއަށް ބޭރަށްދާ މީހުންގެ ހުރިހާ ހަރަދެއް ސަރުކާރުން ކޮށްދޭނަން: ގާސިމް

ޖުމްހޫރީ ޕާޓީގެ ރިޔާސީ ކެންޑިޑޭޓް އަދި މާމިގިލީ ދާއިރާގެ މެންބަރު ގާސިމް އިބްރާހިމްގެ ވެރިކަމެއްގައި، ބޭސްފަރުވާއަށް ރާއްޖޭން ބޭރަށްދާ މީހުންގެ ހުރިހާ ޚަރަދެއް ސަރުކާރުން ހަމަޖައްސައިދޭނެ ކަމަށް ވިދާޅުވެއްޖެއެވެ.

މާލޭ ދާއިރާގެ ޒުވާނުންނަށް ހާއްސަ ކޮށްގެން "35-18" ނަމުގައި ރޭ ބްރިޖް ޕްލެޓްފޯމްގައި ބޭއްވި ހަރަކާތަށް ފޮނުއްވި ވީޑިއޯ މެސެޖެއްގައި ގާސިމް ވިދާޅުވީ އެމަނިކުފާނުގެ ވެރިކަމެއްގައި ބޮޑެތި ބަލިތައް ދިމާވާ ޒުވާންނާއި އެނޫންވެސް ދިވެހިންނަށް ފުރިހަމަ ސިއްހީ ފަރުވާ ލިބޭނެ ކަމަަށެވެ.

އެގޮތުން، ބޭސްފަރުވާއަށް ރާއްޖޭން ބޭރަށް ދަތުރުކުރާ މީހުން މަދުކުރުމަށްޓަކައި ރާއްޖޭގެ ތިން ސަރަހައްދެއްގައި ބަލި ބައްޔަށް ބޭސްފަރުވާ ކުރެވޭނެ ނިޒާމު ހަމަޖައްސަވާނެ ކަމަށެވެ. އަދި އެމަނިކުފާނުގެ ވެރިކަމުގެ ތިންވަނަ ނުވަތަ ދެވަނަ އަހަރު ފެށިގެންދާއިރު ސިއްހީ ފަރުވާ ހޯދޭނެ ފުރިހަމަ ވަސީލަތްތައް ގާއިމްކޮށް ރާއްޖޭން ބޭރަށް ދިޔުމުގެ ދަތި އުނދަގުލުން ދިވެހީން ސަލާމަތް ކޮށްދެއްވާނެ ކަމަަށް ގާސިމް ވިދާޅުވި އެވެ.

މީގެ އިތުރުން ގާސިމް ވިދާޅުވީ، ބަލި ބައްޔަށް ފަރުވާ ކުރުމަށް ރާއްޖެއިން ބޭރަށްދާ މީހުންގެ ހުރިހާ ހަރަދެއް އެމަނިކުފާނުގެ ސަރުކާރުން ހަމަޖައްސަވަައިދެެއްވާނެ ކަމަށެވެ.

"ރާއްޖޭން ބޭރަށް ދާނަމަ ހުރިހާ ހަރަދެއް އެހީތެރިއަކަށް ދާނެ ހަރަދާއި ތިބުމުގެ ހަރަދާއި ޑޮކްޓަރަށް ދެއްކުމުގެ ހަރަދާއި ގޭގެ ހަރަދާއި ކޭންބުއިމުގެ ހަރަދާއި ހުރިހާ އެއްޗެއް އަޅުގަނޑުމެންގެ ސަރުކާރުން ފޯރުކޮށްދޭނެ،"

ގާސިމް އިބްރާހިމް

މީގެ އިތުރުން ގާސިމް ވިދާޅުވީ ޖޭޕީގެ ވެރިކަމެއްގައި ވަޒީފާ އަދާކުރަންކެރޭ ހުރިހާ އެންމެނަށްވެސް، ވަޒީފާ އަދާކުރުމުގެ ފުރުސަތު ލިބިގެންދާނެ ކަމަށެވެ.

އެގޮތުން ޒުވާނުންނަށް ވަޒީފާ އަދާރުކުރެވޭނެ މަގު ތަނަވަސްކޮށްދީ، އެކަމުގެ ހުނަރުހުރި މީހުންނަށް ފައިސާގެ އެހީތެރިކަން ލިބޭނެ މަގު ތަނަވަސްކޮށްދީ ޒުވާނުން ތަނަވަސް މީހުންނަށް ހެދުމަށްޓަކައި ކުރެވެންހުރި ހުރިހާ ކަމެއް ކޮށްދެއްވާނެ ކަމަށްވެސް ގާސިމް ވިދާޅުވި އެވެ.

"މިހެން ދަންވާއިރުވެސް އެންގިވަޑައިގަންވާނެ، ވަޒީފާއަކަށްދާއިރު، އެކުއްޖެއްގެ ސްކިލްހުރި ގޮތަކުން، އެކުއްޖެއްގެ ތައުލީމީ ފެންވަރު ހުރި ގޮތަކުން އެކުއްޖަކަށް ރަނގަޅު ވަޒީފާތައް ލިބުމާއި ނުލިބުން އޮންނާނީ. އެހެންނަމަވެސް ދަންނަވަން މިއުޅޭ ވާހަކައަކީ ޒުވާން އެއްވެސް ކުއްޖަކަށް ވަޒީފާއެއް ނުލިބި ހުންނާކަށް ނުޖެހޭނެއޭ."

ގާސިމް އިބްރާހިމް