އިސްރާއީލުން ޣައްޒާގެ އުތުރުގައި ހުރި އިންޑޮނީސީ ހޮސްޕިޓަލަށް ބޮން އަޅައިފި

އިސްރާއީލުގެ އަނިޔާވެރި ސިފައިން ޣައްޒާގެ އުތުރުގައި ހުރި އިންޑޮނީސީ ހޮސްޕިޓަލަށް ބޮން އަޅައިފިއެވެ.

މި ހަމަލާގައި 12 މީހަކު މަރުވެ ދިހަވަރަކަށް މީހުން ޒަޚަމްވެފައިވާ ކަމަށް ފަލަސްތީނުގެ ހެލްތު މިނިސްޓްރީން އިއުލާންކޮށްފައިވެއެވެ.

"އިސްރާއީލުގެ އޮކިއުޕޭޝަން ފޯސްތަކުން ސީދާ އަދި ތަކުރާރުކޮށް ހަމަލާދެނީ ޒަޚަމްވެފައިވާ ފަރުދުންނާއި މެޑިކަލް ސްޓާފުންނާއި ގެދޮރު ގެއްލިފައިވާ މީހުންނަށް އަމާޒުކޮށްގެން" މިނިސްޓްރީން ބުންޏެވެ.

ފަލަސްތީނުގެ ނިއުސް އެޖެންސީ އެއްކަމުގައިވާ ވަފާ ނިއުސް އެޖެންސީއާ ވާހަކަ ދެއްކި މެޑިކަލް މަސްދަރުތަކުން ބުނާ ގޮތުގައި މިހަމަލާގައި މަދުވެގެން އަށް މީހަކު ޝަހީދުވެފައިވެ އެވެ. އެމީހުން އިތުރަށް ބުނީ އިސްރާއީލުގެ ސްނައިޕަރުން ހޮސްޕިޓަލުން ނިކުންނަން އުޅޭ ކޮންމެ މީހަކަށް ބަޑިޖަހަމުންދާ ކަމަށެވެ.

އެ ހޮސްޕިޓަލުން ގެދޮރު ގެއްލިފައިވާ އެތައް ހާސް މީހުންނަކަށާއި ގާތްގަނޑަކަށް 150 ވަރަކަށް ޒަޚަމްވެފައިވާ މީހުންގެ އިތުރުން 100 މެޑިކަލް މުވައްޒަފުންނާއި ހޮސްޕިޓަލުގެ މަސައްކަތްތެރިންނަށް ހިޔާވަހިކަން ދެމުންދެއެވެ. މަންޒަރު ދުށް މީހުން ބުނާ ގޮތުގައި އިސްރާއީލުން ބޮމުގެ ހަމަލާގެ ސަބަބުން އެ ހޮސްޕިޓަލުގެ ޖަނަރޭޓަރުތައް މަސައްކަތް ހުއްޓުމުން ހޮސްޕިޓަލުން ކަރަންޓް ކެނޑިފައިވެ އެވެ.

އިސްރާއީލުގެ ސިފައިން ހޮސްޕިޓަލްގެ ކިލޯމީޓަރަކަށް ވުރެ ދުރުގައި ވަށާލާފައިވަނީ ދިހަވަރަކަށް ބޮޑެތި އަސްކަރީ ވެހިކަލްތަކާއި އާޓިލަރީތަކުންނެވެ. ކައިރީގައި ހުންނަ ފުރާޅުތަކުގައި ސްނައިޕަރުން ބަހައްޓާފައިވާއިރު، ޒަޚަމްވެފައިވާ މީހުން ގެންދިއުމަށް އެމްބިއުލާންސްތަކަށް ހޮސްޕިޓަލަށް ނުވަދެވޭ ކަމަށް ވެސް ވިދާޅުވި އެވެ. އިންޑޮނޭޝިއާ ހޮސްޕިޓަލަކީ ޣައްޒާގެ އުތުރުގައި  ހިދުމަތް ދެވޭ ފަދަ ހާލަތެއްގައި އޮތް ހަމައެކަނި ހޮސްޕިޓަލެވެ.