އަހަރެއްކުރިން ހަވާލުކުރި ޕޮލިސް ސްޓޭޝަންތައް އަޅަން އަދިވެސް ފައިސާ ހަމަނުޖެހޭ!
މީގެ އަހަރެއްހާ ދުވަސްކުރިން އިއުލާނުކުރި ރަށްރަށުގައި ޕޮލިސް ސްޓޭޝަންތައް އެޅުމުގެ ޕްރޮޖެކްޓަށް ބޭނުންވާ ފައިނޭންސިން އަދިވެސް ހަމަނުޖެހޭކަމަށް ހޯމް މިނިސްޓަރު އިމްރާން އަބްދުالله ހާމަކުރައްވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް މިނިސްޓަރު ހާޒިރުކުރައްވާ މަޖިލީހުގެ ތިމަރަފުށީ ދާއިރާގެ މެމްބަރު އަބްދުالله ރިޔާޒު ވަނީ ސަރުކާރުން އަޅާނެކަމަށް އިއުލާނުކުރި ޕޮލިސް ސްޓޭޝަންތަކާއި ގުޅޭގޮތުން ސުވާލުކުރައްވާފަ އެވެ.
ރިޔާޒު ކުރެއްވި ސުވާލުގައި ވަނީ ސަރުކާރުން މީހުން ދިރިއުޅޭ 61 ރަށުގައި ޕޮލިސް ސްޓޭޝަން އިމާރާތް ކުރަން ނިންމާފައިވާކަމާއި އޭގެ ތެރޭގައި ތ. ތިމަރަފުށީ އަދި ތ. ވޭމަންދޫ ޕޮލިސް ސްޓޭޝަން ހިމެނޭކަމަށް މިނިސްޓަރު 2022 ވަނަ އަހަރުގެ މާޗު މަހު ވިދާޅުވި ނަމަވެސް މިހާތަނަށް އެ ދެ ރަށުގެ ޕޮލިސް ސްޓޭޝަންގެ މަސައްކަތް ފަށާފައި ނުވާކަމަށެވެ.
އެ ދެ ރަށުގެ ޕޮލިސް ސްޓޭޝަން މަސައްކަތް އަދި ވެސް ފެށިފައި ނުވާކަމަށާއި އެ ދެ މަޝްރޫއު މި އަހަރު ފެށުމަށް ހަމަޖެހިފައި ވޭތޯއާއި އެ ޕޮލިސް ސްޓޭޝަންތަކުގެ މަސައްކަތް ފެށޭނެ ތާރީޚެއް ވިދާޅުވެދެއްވުމަށް މެމްބަރު ރިޔާޒު ވަނީ މިނިސްޓަރު އިމްރާނު އަރިހުން އެދިވަޑައިގަންނަވާފަ އެވެ.
އެ ސުވާލުގެ ޖަވާބުގައި މިނިސްޓަރު ވިދާޅުވީ 61 ޕޮލިސް ސްޓޭޝަން އެޅުމުގެ ޕްރޮޖެކްޓަކީ ކޮންޓެރެކްޓާ ފައިނޭންސްގެ ދަށުން އިންޑިއަން އެގްޒިމް ބޭންކުން ފައިނޭންސް ކޮށްގެން ހިންގުމަށް ރޭވިފައިވާ ޕްރޮޖެކްޓެއްކަމަށާއި އެ ޕްރޮޖެކްޓްގެ މަސައްކަތް ފަށައިގަތުމަށް ރާއްޖޭގެ ފަރާތުން ކުރަން ޖެހޭ ކަންކަން 7 މާޗް 2023 ގައިކޮށް ނިމިފައިވާކަމަށެވެ.
ފައިނޭންސް ކަންކަން ހަމަޖެހުމާއެކު އެ މަޝްރޫއުގެ ދަށުން އަޅާ ޕޮލިސް ސްޓޭޝަންތަކުގެ މަސައްކަތް ފައްޓާނެކަމަށް މިނިސްޓަރު ވިދާޅުވި އެވެ.
"ފައިނޭންސްގެ ކަންކަން ހަމަ ޖެހުމާއެކު މި އަހަރުވެސް އެ މަސައްކަތް ފެށިގެން ދާނެކަމަށް އުންމީދުކުރަނީ"
ހޯމް މިނިސްޓަރު އިމްރާނު އަބްދުالله
މިނިސްޓަރު ވިދާޅުވި ގޮތުގައި މަސައްކަތަށް ކުރަން ޖެހޭ އިދާރީ ހުރިހާ ކަމެއް ވަނީ ފުރިހަމަ ކުރެވިފައެވެ. އަދި އެ މަޝްރޫއު ކުރިއަށް ނުދަނީ އެގްޒިމް ބޭންކުގެ ފައިނޭންސް ހަމަނުޖެހި އޮތުމުގެ ސަބަބުން ނެވެ.
އެ ފަންޑު ހޯދުމަށް މަސައްކަތްތައް ކުރައްވާ ކަމަށާއި، ފައިސާ ހަމަޖެހުނުހާ އަވަހަކަށް މަސައްކަތް ފައްޓާނެކަމަށް މިނިސްޓަރު ވިދާޅުވި އެވެ. އެހެން ނަމަވެސް ފަންޑު ލިބޭނެ ތާރީހެއް މިނިސްޓަރު ވިދާޅުވެފައެއް ނުވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
