"އެމްޑީޕީއާ އެހެން ޕާޓީތަކުގެ މެންބަރުންވެސް އަަޅުގަނޑުމެންނާއެކު މަސައްކަތްކުރަން ބޭނުންވޭ"

ރައްޔިތުންގެ މަޖިލީހުގެ މެންބަރުންގެ ތެރެއިން އެމްޑީޕީ އަދި އެހެނިހެން ޕާޓީތަކުގެ މެންބަރުންވެސް، ދަ ޑިމޮކްރެޓްސް އާއި އެކު މަސައްކަތް ކުރުމުގެ ޝައުގުވެރިކަން ފާޅުކުރައްވަމުން ގެންދަވާކަމަށް އެ ޕާޓީން ބުނެފި އެވެ.

ދަ ޑިމޮކްރެޓްސް އިން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ މަޖިލީހުގައި މިވަގުތު ތިބި މެންބަރުންގެ ތެރެއިން ފިކުރެއްގެ ދިރުން ފެކްޝަނުގެ މެންބަރުން ފިޔަވައި އެހެން ޕާޓީތަކަށް ނިސްބަތްވާ ކިތައް މެންބަރުން ދަ ޑިމޮކްރެޓްސް އާއި ގުޅެން ތައްޔާރަށް ތިބިތޯ ސުވާލު ކޮށްފައެވެ. އަދި އޭގެ ތެރޭގައި އެމްޑީޕީގެ މެންބަރުން ހިމެނޭތޯވެސް ވަނީ ސުވާލު ކޮށްފައެވެ.

އެ ސުވާލަށް ޖަވާބުދެއްވަމުން، ދަ ޑިމޮކްރެޓްސް ގެ ތަރުޖަމާނު އަދި އެލްޖީއޭގެ ކުރީގެ ސީއީއޯ އަފްޝަން ލަތީފު ވިދާޅުވީ، އެމްޑީޕީގެ މެންބަރުންގެ އިތުރުން އެހެން ޕާޓީތަކުގެ މެންބަރުންވެސް އެ ޕާޓީއާއެކު ސިޔާސީ މަސައްކަތް ކުރުމުގެ ޝައުގުވެރިކަން ފާޅުކުރައްވަމުން ގެންދަވާ ކަމަށެވެ.

"ވަރަށް ގިނަ މެންބަރުން، ހަމައެކަނި އެމްޑީޕީގެ މެންބަރުންނެއް ނޫން، އެހެން ޕާޓީތަކުގެ މެންބަރުންވެސް އަޅުގަނޑުމެންނާ ވާހަކަދައްކަވަމުން ގެންދަވާ. އެއީ ހަމައެކަނި ޕާޓީއަށް ސޮއި ކުރުމުގެ މަގުސަދުގައެއް ނޫން. ޕާޓީއާއި އެކީގައި ސިޔާސީ މަސައްކަތް ކުރުމުގެ ޝައުގުވެރިކަން އެ ބޭފުޅުންގެ ހުރީމާ. އެމްޑީޕީގެ މެންބަރުންވެސް އެހެން ޕާޓީގެ މެންބަރުންވެސް އަޅުގަނޑުމެންނާ ވާހަކަދައްކަވަމުން ގެންދަވާ. އަދި ޕާޓީގެ ލީޑަރޝިޕްއެއް އުފެދުނީމާ އެ ބޭފުޅުން އަދި އެވާހަކަތައް އިތުރަށް ކުރިއަށް ގެންދަވާނެ ކަމަށް އަޅުގަނޑަށް ގަބޫލުކުރެވޭ."

ދަ ޑިމޮކްރެޓްސް ގެ ތަރުޖަމާނު އަފްޝަން

އެމްޑީޕީ އާއި އެހެން ޕާޓީތަކުގެ މަޖިލިސް މެންބަރުން ދަ ޑިމޮކްރެޓްސް އާއި ވާހަކަދައްކަވާ ކަމަށް އަފްޝަން ވިދާޅުވި ނަމަވެސް އެއީ ކޮން މެންބަރުން ކަމެއް، ނުވަތަ އެ ވާހަކަ ދައްކަވަނީ ކިތައް މެންބަރުން ކަމެއް އަދި ދަންނަވަން ދަތި ކަމަށް އޭނާ ވިދާޅުވި އެވެ.