ރިޔާސީ އިންތިޚާބަށް 3 މަހަށް ވީމަ ތޯ އެނގުނީ ވައުދު ނުފުއްދާކަން؟: ޣަފޫރު

ސަރުކާރު ހިންގާ މައިޕާޓީ އެމްޑީޕީން ވަކިވެގެން ދިޔަ މެމްބަރުންނަށް ސަރުކާރުން ވީ ވައުދުތައް ނުފުއްދާކަން އެނގުނީ ރިޔާސީ އިންތިޚާބަށް 3 މަހަށް ވީމަ ތޯ އައްސަވާ ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ ސުވާލުކުރައްވައިފި އެވެ.

ރައްޔިތުންގެ މަޖިލީހުގެ ތޮއްޑޫ ދާއިރާގެ މެމްބަރު ޙަސަން ޝިޔާނު ހުށައަޅުއްވާފައިވާ އެމްޑީޕީގެ ފުރަތަމަ ވެރިކަމުގައި ރާއްޖޭގެ ދަނޑުވެރިންނަށް ދޫކުރި ދަނޑުވެރިންގެ ސަބްސިޑީ އަލުން އަނބުރާ އިޔާދަކޮށް ދަނޑުވެރި މީހާއަށް ދިނުމަށް ގޮވާލާ ހުށައެޅި ޤަރާރަށް ބަހުސްކުރައްވަމުން އެމްޑީޕީން ވަކިވެގެން ދިޔަ ގިން މެމްބަރުން ވަނީ ދަނޑުވެރިންނަށް ވީ ވައުދުތައް ފުއްދުމަށް ސަރުކާރު ފެއިލްވެފައިވާކަމަށް ވިދާޅުވެ ސަރުކާރަށް ގިނަ ފާޑުކިޔުންތަކެއް އަމާޒުކުރައްވާފަ އެވެ.

އެ ޤަރާރު ހުށައެޅުއްވި މެމްބަރު ޝިޔާނު، ވާހަކަ ފައްޓަވަމުން ވެސް ވިދާޅުވީ އެމްޑީޕީ ސަރުކާރުން ދަނޑުވެރިންނަށް ވީ ވައުދުތައް ފުއްދާދީފައި ނުވާކަމަށެވެ. އަދި ކުރިއަށް އޮތް ރިޔާސީ އިންތިޚާބުގައި ދަނޑުވެރިން އޭގެ ޖަވާބު ވޯޓުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ދެއްވާނެ ކަމަށެވެ.

ރައްޔިތުންގެ މަޖިލީހުގެ މަޑަވެލި ދާއިރާގެ މެމްބަރު ހުސެއިން ފިރުޝާނުވެސް ވަނީ އެ ވާހަކަތައް ހަމަ އެ މޭރުމުން ތަކުރާރުކުރައްވާފަ އެވެ.

އޭގެ އިތުރުން އޭނާ ވިދާޅުވީ އެގްރޯނެޓް ކިޔާ ކުންފުންޏެއް ހަދައިގެން ސަރުކާރުން ވައްކަން ކުރަމުންދާކަމަށެވެ. އެ ކުންފުނި މެދުވެރިކޮށް ދަނޑުވެރިންގެ އުފެއްދުންތައް މާކެޓުކުރުމުގެ ބަދަލުގައި އެކި ރަށްރަށުގައި ވަޒީފާތައް އުފައްދައިގެން ކުރާ ހަމައެކަނި ކަމަކީ އިންތިޚާބުތަކަށް ނުފޫޒު ފޯރުވުންކަމަށް ފިރުޝާނު ތުހުމަތުކުރެއްވި އެވެ.

އެމްޑީޕީން ވަކިވެގެން ދިޔަ މެމްބަރުންނަށް ހަނިމާދޫ ދާއިރާގެ މެމްބަރު ޣަފޫރު ވަނީ ރައްދުދެއްވާފަ އެވެ.

އެގޮތުން އޭނާ ވިދާޅުވީ ސަރުކާރުން ވައްކަން ކުރާކަމަށާއި، ސަރުކާރަށް ވައުދު ނުފުއްދޭ ވާހަކަ މިހާ ދުވަސް ވަންދެން އެ މެމްބަރުން ދައްކާފައި ނުވާކަމަށެވެ. އަދި އޭރު އެ މެމްބަރުން އެ ވާހަކަތަށް ނުދައްކަވާ ތިއްބެވުމަށްފަހު ކުއްލިއަކަށް ސަރުކާރު ގޯސްވީ ރިޔާސީ އިންތިޚާބު ބޯމަތިވުމުންކަމަށް ޣަފޫރު ވިދާޅުވި އެވެ.

އޭގެ އިތުރުން އޭނާ ވަނީ ސަރުކާރުން ވައުދު ނުފުއްދާކަން، ނުވަތަ ރައްޔިތުންނަކީ ތިބިބައެއްކަން އެމްޑީޕީން ވަކިވި މެމްބަރުންނަށް އެނގިވަޑައިގަތީ ރިޔާސީ އިންތިޚާބު ބޯމަތިވުމުން ތޯ އައްސަވާފަ އެވެ.

"4 އަަހަރު ވެގެން ދިޔައިރުގައި ރާއްޖޭގައި ރައްޔިތުން ނޫޅެނީ ތޯ؟ އެބޭފުޅުންގެ ވާހަކަ މިބޭފުޅުންނަށް ކީއްވެ ތޯ ނުދެއްކުނީ؟ އިންތިޚާބަކަށް 3 މަސް ދުވަހަށް ވީމަތޯ ރާއްޖޭގެ ރައްޔިތުން އުޅޭކަން މިބޭފުޅުންނަށް އެނގިގެން މި އުޅެނީ؟"

ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ

ޣަފޫރު ވިދާޅުވީ މި ސަރުކާރުން ރައްޔިތުންނަށް ވީ ވައުދުތައް ވަރަށް ފުރިހަމަޔަށް ފުއްދަމުންދާ ކަމަށެވެ.

ސަރުކާރު ފަޅީގައި 4 އަހަރު ތިއްބެވުމަށްފަހު ރިޔާސީ އިންތިޚާބަށް ކުޑަތަންވުމުން، ސަރުކާރާއި ދެކޮޅަށް ނިކުމެ މަސައްކަތް ކުރަން ފެށި ސަބަބު ރައްޔިތުންނަށް ސާފުވާނެކަމަށް އޭނާ ވިދާޅުވި އެވެ.

އަދި ހަމައެހެންމެ، މިއަދު ސަރުކާރު ބަދުނާމުކުރަން އެމްޑީޕީން ނިކުތް ފަރާތްތަކުން ވާހަކަދައްކަމުންދަނީ ނިޔަތުގައި އިޚްލާސްތެރިކަމެއް އޮވެގެން ނޫންކަން ވެސް ރައްޔިތުންނަށް ސާފުވާނެކަމަށް އޭނާ ވިދާޅުވި އެވެ.