އީޕީއޭގެ "ތިމާވެށި" ބޯޓު، އިންޑިއާގެ ކުލަތަކާއި ހިންދޫއިންގެ އަޅުކަމާއިއެކު އިފްތިތާޙް ކޮށްފި

ރާއްޖޭގެ އެންވަޔަރަންމަންޓް ޕްރޮޓެކްޝަން އެޖެންސީ، (އީޕީއޭ) އަށް ބަންނަ، މޮނިޓަރިން އެންޑް ރީިސާޗް އުޅަނދު "ތިމާވެށި"، އިންޑިއާގެ ދިދަތަކާއި، ހިންދޫއިންގެ އަޅުގަކަމާއިއެކު އިފްތިތާޙް ކޮށްފި އެވެ.

އާއްމުކޮށް އިންޑިއާގެ އަޅުކަންތަކުގައިވެސް ބޭނުންކުރާ މަލާއި، އެ ގައުމުގެ ދިދައިގެ ކުލަތައް ހިމެނޭ ފުއްޕާހަންތަކުން ޖަރީކޮށްފައިވާ ރާއްޖޭގެ "ތިމާވެށި" އިފްތިތާހު ކޮށް ދެއްވީ ގޯއާގެ ޗީފްމިނިސްޓަރު ޑރ ޕްރޮމޯދު ސާވަންތެވެ.

މި ބޯޓު އިފްތިތާޙް ކޮށްފައިވަނީ ހިންދޫއިންގެ ދީނީ އަޅުކަމެއްގެ ގޮތުގައި އޮންނަ ގޮތަކަށް ކާށި ފެޅުމަށްފަހުގައެވެ.

ކާށި ފެޅުމަކީ އާއްމުކޮށް ހިންދޫއިންގެ އަލަށް ކަމެއް ފަށާއިރު، ނުވަތަ އިފްތިތާޙް ކުރާއިރު ދީނީ ގޮތުން އެމީހުން ކޮށް އުޅޭ އަޅުކަމެކެވެ. ކާށި ފެޅުމަށްފަހު އެ މީހުންވަނީ އެ މީހުން ކަލާނގެއެއް ކަމަށްބަލައިގެން އުޅޭ ކަލާނގެ އެއްގެ ނަން ކިޔައި، މަތިވެރި ކުރުމަށް ގޮވާގޮވެލިވެސް ގޮވާފައެވެ.

މިފަދަ ގޮތަކަށް މި ދޯނި އިފްތިތާހްކޮށް މޫދަށް ބަލާފައިވާ އިރު، މިއީ ރާއްޖެއަށް ވޯލްޑް ބޭންކުން ދީފައިވާ 15 މިލިއަން ރުފިޔާގެ އެހީގައި ބަނދެފައިވާ އުޅަނދެއްކަން ފާހަގަކޮށްލަންޖެހެއެވެ.

މި މޮނިޓަރިން ރިސާޗް އުޅަނދު ބަނުމުގެ ޕްރޮޖެކްޓް ބިޑް ކާމިޔާބުކޮށް އުޅަނދު ބަނދެފައި ވަނީ އިންޑިއާގެ ގޯއާގެ ވިޖޭ މެރައިން ޝިޕްޔާޑުންނެވެ. މި މަސައްކަތާ ވިޖޭ މެރައިން ހަވާލުވީ 2020 ގައެވެ.

މިކަމާއި ގުޅިގެން އީޕީއޭގެ ޑިރެކްޓަރު ޖެނެރަލް އިބްރާހިމް ނައީމް މިއަދު ވިދާޅުވީ " "ތިމާވެށި" ބާލައި ދިދަ އެލުވައިގެން އިންޑިއާ ގޯއާގެ ނޫސްތަކުގައި ޖަހައިގެން އެބަ އުޅޭ،" ކަމަށާ އީޕީއާއި އޭތި ހަވާލުވާނީ ރާއްޖެ ގެނައުމުން ކަމަށެވެ. އަދި "ރާއްޖެއަށް ގެންނަވަރަށް އެ އުޅަނދު ނުނިމޭތީ" އީޕީއެއަށް ލިބޭނެ ދުވަހެއް ދަންނަވާން ނޭނގޭ ކަމަށްވެސް ވިދާޅުވި އެވެ.