އިދިކޮޅުން މިއަދު ޒުވާނުންގެ ސައިކަލު ބުރެއް ބާއްވަނީ

ޕްރޮގްރެސިވް ކޮންގްރެސް ކޯލިޝަން (އިދިކޮޅު) ގެ ޒުވާނުން އިސް ނަގައިގެން މިއަދު ފުރަމާލޭގައި ސައިކަލުބުރެއް ބާއްވަން ނިންމައިފި އެވެ.

މި ސައުކަލު ބުރަކީ ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމިން އަބްދުލްގައްޔޫމު މިނިވަންކުރުމަށް ގޮވާލާ ކުރިއަށް ގެންދާ ސައިކަލު ބުރެކެވެ.

"ޔޫތު ރައިޑު" ގެ ނަމުގައި ކުރިއަށް ގެންދާ މި ސައިކަލު ބުރު ފަށާނީ މިއަދު ހަވީރު 4:00 ގައި ޕީޕީއެމް އޮފީސް ކުރިމަތިން ނެވެ.

އިދިކޮޅުން ވަނީ މި ސައިކަލު ބުރުގައި ދެ ޖިންސުގެ ގިނަ ޒުވާނުން ބައިވެރިވުމަށް ގޮވާލާފަ އެވެ.

އިދިކޮޅު ޒުވާނުން އިސް ނަގައިގެން މިއަދު ހަވީރު ސައިކަލު ބުރެއް ބޭއްވުމަށް ނިންމާފައިވާއިރު، "ދިވެހީންގެ ސުލުހަވެރި ހިނގާލުން" ނަމުގައި އިއްޔެ ހިނގާލުމެއް ބާއްވަން އޮތީ ހަމަޖެހިފަ އެވެ.

އެހެން ނަމަވެސް މޫސުން ގޯސްވެ ބޯކޮށް ވާރޭ ވެހުމުގެ ސަބަބުން އެ ހަރަކާތް ވަނީ ފަހުގެ ތާރީހަކަށް ފަސްކުރެވިފަ އެވެ.

މިއަހަރުގެ ސެޕްޓެމްބަރު މަހުގެ 9ގައި ބާއްވާ ރިޔާސީ އިންތިޚާބުގައި ޕީޕީއެމްގެ ފަރާތުން ވާދަކުރައްވާ، އެ ޕާޓީގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމު މިވަގުތު ޖަލު ހުކުމެއް ތަންފީޒު ކުރައްވަމުން ގެންދިއުމަކީ އެ ޕާޓީން ވަރަށް ބޮޑަށް ކަންބޮޑުވާ ކަމެއްކަމަށް އަންނަނީ ފާހަގަކުރަމުން ނެވެ.

އެގޮތުން ރައީސް ޔާމިނުގެ މައްޗަށް މިދިޔަ ޑިސެމްބަރު މަހުގެ 25 ގައި ކްރިމިނަލް ކޯޓުން އިއްވި ހުކުމަކީ ސިޔާސީ ނުފޫޒު ފޯރުވާ ފަނޑިޔާރަށް ރިޝްވަތު ހުށައަޅައިގެން އިއްވި ހުކުމެއްކަމަށް އިދިކޮޅުން ދަނީ ބުނަމުންނެވެ.

އެމަނިކުފާނުގެ ފަރާތްޕުޅުން އެ ހުކުމް ހައިކޯޓުގައި އިސްތިއުނާފު ކޮށްފައިވާއިރު، އެ މައްސަލައަށް ވެސް ސަރުކާރުން ނުފޫޒު ފޯރުވާ ލަސްކުރަމުންދާކަމަށް އިދިކޮޅުން ތުހުމަތު ކުރެއެވެ.

މި ކަންބޮޑުވުންތައް އިދިކޮޅުން ފާހަގަކުރަމުންދާއިރު، އެ ޕާޓީން ބުނަމުންދަނީ ކުރިއަށް އޮތް ރިޔާސީ އިންތިޚާބު ރައީސް ޔާމިނާއި ނުލާ ސައްހަ ނުވާނެ ކަމަށެވެ. އަދި ރައީސް ޔާމިނުގެ ނަންފުޅު އިލެކްޝަންސް ކޮމިޝަނުން ޤަބޫލުނުކޮށްފިނަމަ ސުޕްރިމް ކޯޓަށް ދާނެ ކަމަށެވެ.