ގިނަ އަދަދެއްގެ ޒުވާނުންނާއެކު އިދިކޮޅުގެ ބޮޑު ސައިކަލު ބުރު ބާއްވައިފި
ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމް މިނިވަންކުރުމަށް ގޮވާލާ ޒުވާނުން އިސް ނަގައިގެން މާލޭގައި "ޔޫތު ރައިޑު" ގެ ނަމުގައި ސައިކަލު ބުރެއް ބާއްވައިފި އެވެ.
ހޮނިހިރު ދުވަހުގެ ހަވީރު ޕީޕީއެމް އޮފީސް ދޮރުމަތިން ފެށުނު މި ސައިކަލު ބުރުގައި ގިނަ އަދަދެއްގެ ޒުވާނުން ވަނީ ބައިވެރިވެފައެވެ.
އެގޮތުން މި ސައިކަލު ބުރުގައި ރައީސް ޔާމީން މިނިވަންކުރުމަށް ގޮވާލާ އަޑުއުފުލާފައިވެއެވެ. އަދި މިއީ ޒުވާނުން އިސްގަނައިގެން ކުރިއަށް ގެންދިޔަ ހަރަކާތެކެވެ. އަދި މި ހަރަކާތަކީ އެމަނިކުފާނުގެ ކެމްޕޭނު ހަރަކާތެއް ކަމަށް ވެސް އިދިކޮޅުން ވަނީ ބުނެފަ އެވެ.
މިއީ ރައީސް ޔާމިނަށް ނުހައްގުން ދެމުންދާ އަނިޔާތަކާއި ޒުވާނުން ދެކޮޅުކަމަށާއި، ޒުވާނުން އެމަނިކުފާނާއެކު ތިބިކަން ސަރުކާރަށް ދެއްކުމަށް ކުރިއަށްގެންދެވުނު ޚާއްސަ ހަރަކާތެއް ކަމަށް އިދިކޮޅުން ވަނީ ބުނެފައެވެ.މީގެ ކުރިންވެސް ޒުވާނުން ވަނީ މިފަދަ ސައިކަލު ބުރުތައް ފުރަމާލޭގައި ބާއްވާފަ އެވެ.
މި ސައިކަލު ބުރަކީ ސުލްހަވެރިކަމާއެކު ކުރިޔަށް ގެންދެވުނު ހަރަކާތެއްކަންވެސް ފާހަގަކޮށްލެވެއެވެ.
ސައިކަލު ބުރަށްފަހު އިދިކޮޅުގެ ލީޑަރޝިޕް އިސްވެ ތިއްބަވާ މަޖީދީ މަގުގައި ވަނީ ހިނގާލުމެއް ވެސް ކުރިޔަށްގެންގޮސްފަ އެވެ.
މި ހިނގާލުމަށް ފުލުހުން ވަނީ ހުރަސްއަޅާފަ އެވެ. އަދި ވަކި ހިސާބުން ފުލުހުން ވަނީ ހިނގާލުން ރޫޅާލާ، ހިނގާލުމުގެ ތެރެއިން ގިނަ ޒުވާނުން ހައްޔަރުކޮށްފަ އެވެ.
މިއަހަރުގެ ސެޕްޓެމްބަރ 9 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި އިދިކޮޅުގެ ސްލޯގަން އަކީ ދިވެހީންގެރާއްޖެ އެވެ. މިހާރު މުޅި ރާއްޖޭގައި ވަނީ އެމަނިކުފާނުގެ ރިޔާސީ ކެމްޕޭނު ފައްޓަވާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
