ރައީސް ޞާލިހަށް ނިސްބަތްވާ 34 ކޮރަޕްޝަންގެ މައްސަލަ އޭސީސީއަށް ހުށައަޅައިފި!

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ނިސްބަތްވާ ކޮރަޕްޝަންގެ 34 މައްސަލައެއް އިދިކޮޅު ކޯލިޝަނުން އޭސީސީއަށް ހުށައަޅައިފި އެވެ.

އިދިކޮޅު ކޯލިޝަންގެ ޤާނޫނީ ވަކީލުންގެ ޓީމުން މިއަދު ބޭއްވި ނޫސްވެރިންގެ ބައްދަލުވުމުގައި ބުނީ 2018 އިން ފެށިގެން މިހާތަނަށް ސަރުކާރުގެ ތެރެއިން ހިންގާފައިވާ ކޮރަޕްޝަންތަކާއި ގުޅޭ މައްލަތައް އެ ޓީމުން ހޯދާފައިވައިވާނެ ކަމަށެވެ. އަދި އެ މައްސަލަތައް އޭސީސީއަށް ވެސް ހުށައަޅާފައިވާނެ ކަމަށެވެ.

އޭގެ ތަފްސީލުތައް އެ ޓީމުން ވަނީ މީޑިއާއާއި ހިއްސާކޮށްފަ އެވެ.

އެގޮތުން އިދިކޮޅުން ހިއްސާކޮށްފައިވާ ތަފާސް ހިސާބުތަކަށް ބަލާއިރު، މިހާތަނަށް ރައީސް ޞާލިހާއި ގުޅުންހުރި 34 މައްސަލައެއް އިދިކޮޅުން ވަނީ އޭސީސީއަށް ހުށައަޅާފަ އެވެ.

އޭގެ އިތުރުން މިނިސްޓްރީ އޮފް ފިނޭންސްއަށް ނިސްބަތްވާ 10 މައްސަލައަކާއި، ސަރުކާރު ހިންގާ މައި ޕާޓީ އެމްޑީޕީއަށް ނިސްބަތްވާ 6 މައްސަލައިގެ އިތުރުން ހެލްތު މިނިސްޓްރީގެ 4 މައްސަލައަކާއި، ސަރުކާރު ފެން ކުންފުނި، ފެނަކަ ކޯރަޕޭޝަނުގެ ކޮރަޕްޝަންގެ 4 މައްސަލައަކާއި، އެސްޓޯއޭގެ 3 މައްސަލައަކާއި، ޕްލޭނިން މިނިސްޓްރީގެ 3 މައްސަލައަކާއި އަދި ރައީސް އޮފީހުގެ 2 މައްސަލައާއި، އާރުޑީސީގެ 2 މައްސަލައެއް އިދިކޮޅުން ވަނީ އޭސީސީއަށް ހުށައަޅާފަ އެވެ.

އިދިކޮޅު ކޯލިޝަނުން ހާމަކޮށްފައިވާ ތަފާސް ހިސާބުތަކަށް ބަލާއިރު، ސްޓެލްކޯއާއި، މޯލްޑިވްސް ގޭސް އާއި، ޖޭއެސްސީއާއި، ޕަބްލިކް ސާވިސް މީޑިއާ، އެންވަޔަރުމަންޓު މިނިސްޓްރީ، ކުޅުދުއްފުށީ ސިޓީ ކައުންސިލް އިދާރާ، މޯލްޑިވްސް ކަސްޓަމްސް ސާވިސް، ޕީޖީ އޮފީސް، އޭސީސީ، ރައްޔިތުންގެ މަޖިލީހުގެ މެމްބަރު މުޙައްމަދު ރަޝީދު، ރައްޔިތުންގެ މަޖިލީހުގެ މެމްބަރު އަބްދުﷲ ޖާބިރު، އެސް.އެމް.އީ ޑިވެލޮޕްމަންޓު ފަންޑު، ފޮރިން މިނިސްޓްރީގެ އިތުރުން ވެމްކޯ އާއި މޯލްޑިވްސް ޕޯޓްސްއަށް ނިސްބަތްވާ ކޮރަޕްޝަންގެ މައްސަލަތައް ވެސް ވަނީ އޭސީސީއަށް ހުށައަޅާފަ އެވެ.

އިދިކޮޅުން ހާމަކުރި ގޮތުގައި މިއީ 2018 ވަނަ އަހަރުން 2023 ގެ މިހާތަނަށް އެ ކޯލިޝަނަށް ފާހަގަކުރެވުނު ކޮރަޕްޝަންގެ މައްސަލަތަކެވެ. އަދި އެ ފަރާތުން ހާމަކޮށްފައިވާ ތަފާސް ހިސާބަށް ބަލާއިރު އެންމެ ގިނަ މައްސަލަ ހުށައަޅާފައިވަނީ 2022 ވަނަ އަހަރުގަ އެވެ.

އިދިކޮޅުން ބުނީ ސަރުކާރާއި ގުޅުންހުރި ކޮރަޕްޝަންގެ ގިނަ މައްސަލަތަކެއް އޭސީސީއަށް ހުށައެޅި ނަމަވެސް އެކަށީގެންވާ ގޮތެއްގައި އެ މައްސަލަތައް ބަލަމުން ނުދާކަމަށެވެ.

އަދި ޕީޕީއެމްގެ ވެރިކަމެއްގައި ސަރުކާރުގެ ތެރެއިން ހިންގާފައިވާ ކޮރަޕްޝަންގެ މައްސަލަތައް ބަލައި ފިޔަވަޅު އަޅާނެކަމަށް އިދިކޮޅުން ވަނީ ބުނެފަ އެވެ.