އިންތިޚާބުގެ ދެވަނަ ބުރުގައި އިތުރު 12 ވޯޓް ފޮއްޓެއް ބެހެއްޓޭނެ: އީސީ
ރިޔާސީ އިންތިޚާބުގެ ދެވަނަ ބުރުގައި ފުރަތަމަ ބުރުގައި ބެހެއްޓި ވޯޓު ފޮށީގެ އިތުރުން 12 ވޯޓު ފޮއްޓެއް ބެހެއްޓޭނެ ކަމަށް އިލެކްޝަންސް ކޮމިޝަނުން ބުނެފައިވެއެވެ.
މިއަދު އިލެކްޝަންސް އިން ބޭއްވެވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެކޮމިޝަންގެ ނައިބު ރައީސް އިސްމާއިލް ޙަބީބް ވިދާޅުވީ ފުރަތަމަ ބުރުގައި ޖުމްލަ 574 ފޮއްޓެއް ބެހެއްޓިއިރު އިންތިޚާބުގެ ދެވަނަ ބުރުގައި 586 ފޮށި ބެހެއްޓުމަށް ހަމަޖެހިފައިވާ ކަމަށެވެ.
އިތުރަށް ބެހެއްޓުމަށް ހަމަޖެހިފައިވާ 12 ވޯޓު ފޮށި ތަކަކީ މާލޭގައި ބަހައްޓާ 4 ފޮށި، ހުޅުމާލެ ފުރަތަމަ ފިޔަވަހީގައި 2 ފޮށި، ހުޅުމާލެ ދެވަނަ ފިޔަވަހީގައި 4 ފޮށި، ވިލިމާލޭގައި އެއް ފޮށި އަދި އިންޑިޔާގެ ޓްރިވެންޑްރަމްގައި އެއް ފޮއްޓެވެ.
ޙަބީބް ވިދާޅުވީ ކުރިން ހީކުރި ގޮތަށް ހުޅުމާލޭގަ ވަރަށް ގިނަ ޢަދަދެއްގެ މީހުން، ޚާއްޞަކޮށް ދެވަނަ ފިޔަވަހީގައި ވަރަށް ގިނަ ބަޔަކު ދިރިއުޅެމުންދާއިރު ފުރަތަމަ ބުރުގައި މާލެއަށް ވަރަށް ގިނަ ބަޔަކު ވޯޓުލާންއައި ކަމަށާއި، އޭގެތެރެއިން ވަރަށް ގިނަ ބަޔަކު ހުޅުމާލެއަށް ރީރެޖިސްޓަރ ކުރުމުން ހުޅުމާލެއަށް 6 ފޮއްޓެއް އިތުރުވެފައިވާ ކަމަށެވެ.
އިންތިޚާބުގެ ދެވަނަ ބުރުގައި 282803 މީހުންނަށް ވޯޓު ލުމުގެ ހައްޤު ލިބުގެންވާއިރު ދެވަނަ ބުރުގައި އަލަށް 408 މީހަކަށް ވޯޓު ލެވޭ ކަމަށް އީސީ އިން ހާމަކޮށްފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
