ރީ ރެޖިސްޓްރޭޝަން އަށް ސާފު ނޫން ފޮޓޯއާއި މުއްދަތު ހަމަވެފައިވާ އައިޑީ ކާޑުވެސް ހުށަހެޅި: އީސީ

މި މަހުގެ 30 ވަނަ ދުވަހު ބޭއްވުމަށް ހަމަ ޖެހިފައިވާ ރިޔާސީ އިންތިހާބުގެ ދެވަނަ ބުރަށް ރީ ރަޖިސްޓްރީކުރުމަށް ހުޅުވާލި ފުރުސަތުގައި ރީ ރެޖިސްޓަރ ކުރުމަށް ހުށަހެޅި ފޯމުތަކާއެކު ސާާފު ނޫން ފޮޓާތަކާއި މުއްދަތު ހަމަވެފައި ހުރި އައިޑީ ކާޑުވެސް ހުށަހަޅާފައި ހުރި ކަމަށް އިލެކްޝަންސް ކޮމިޝަން (އީސީ) އިން ވިދާޅުވެއްޖެއެވެ.

މިއަދު އިލެކްޝަންސް ކޮމިޝަންގެ އިންތިހާބީ މަރުކަޒުގައި ކުރިއަށްދިޔަ ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ކޮމިޝަންގެ ނައިބު ރައީށް އިސްމާއީލް ހަބީބު ވިދާޅުވީ ރި ރެޖިސްޓަރ ކުރުމަށް ހުޅުވާލި ފުރުސަތުގައި އެކަމަށް އެދި ޖުމުލަ 50،047 ފޯމު ހުށަހެޅި ކަމަށާއި ނަމަވެސް ސައްހަކަން ކަށަވަރު ނުވާތީ 11،000 ފޯމު ބާތިލިކޮށް ރަޖިސްޓްރީކޮށްދިނީ 38،763 ފޯމު ކަމުގައި ހަބީބް ވިދާޅުވިއެވެ.

އެގޮތުން ބައެއް ފޯމުތައް ބާތިލްކުރަން ޖެހުނު ސަބަބެއްގެ ގޮތުގައި އެ ފޯމާއެކު ހުށަހަޅާއިފައިވާ ލައިވް ފޮޓޯ ސާފުނުވުން ހިމެނޭކަމުގައިވެސް ހަބީބް ވަނީ ވިދާޅުވެފައެވެ.

އޮންލައިންކޮށް ފޮޓޯ ހުށަހަޅާއިރު ވަރަށް ބޮޑަށް ބަލާކަމެއް އެއީ ލައިވް ފޮޓޯ އިންނަނީ ކިހިނެއްތޯ. އަސްލު ހަމަ ލައިވްކޮށް ނެގި ފޮޓޯއެއްތޯ. އެ ފޮޓޯ އަޕްލޯޑްކުރީ ކިތައް މިނެޓުގެ ތެރޭގައިތޯ. އެގޮތަށް ވެސް ބަލާނެ. އޭގެ ސައްހަކަން ކަށަވަރުކުރަން އޭގެ މުހިންމު އެއްޗެއްގެ ގޮތުގައި އަޅުގަނޑުމެން މި ބަލަނީ ފޮޓޯ. އެހެންވީމާ ފޮޓޯ ރަނގަޅު ނޫނިއްޔާ ހަމަ ރިޖެކްޓްވާނެ

އިސްމާއިލް ހަބީބް

މީގެ އިތުރުން ހަބީބް ވިދާާޅުވީ ރީ ރަޖިސްޓްރީ ކުރަން ހުށަހެޅި އައިޑީ ކާޑުތަކުގައި ވެސް މައްސަލަތައް އުޅޭ ކަމަށާއި އެގޮތުން އައިޑީ ކާޑުގެ އެއް ފުށުގެ ކޮޕީގެ އިތުރުން މުއްދަތު ހަމަވެފައި ހުރި ޑޮކިއުމަންޓްވެސް ހުށަހަޅާފައި ހުރި ކަމަށް އޭނާ ވިދާޅުވިއެވެ.

މީގެ އިތުރުން 18 އަހަރުވެފައިވާ ކޮންމެ ރަށްޔިތަކުވެސް ފަރުދީ ޒިންމާ އަދާކުރައްވައި ކޮންމެ ބޭފުޅަކުވެސް ވޯޓު ލާން ރީ ރަޖިސްޓްރީ ކުރެވިފައި އޮތީ ހަމަ އެދިވަޑައިގެންނެވި ތަނަށްތޯ ކަށަވަަރުކުރުމަށް ވެސް މިއަދުގެ ނޫސްވެރިންގެ ބައްދަލުވުމުގައި ހަބީބް ވަނީ އިލްތިމާސްކުރައްވާފައެވެ.

ރީ ރަޖިސްޓްރޭޝަނަށް ޝަކުވާ ހުށަހަޅަން ދީފައިވަނީ 48 ގަޑިއިރުގެ މުއްދަތެކެވެ.

އަޅުގަނޑުމެން މި އަރުވާ 48 ގަޑިއިރަށް ފަހުގައި އިތުރު ވަގުތެއް ނުއެއް ދެވޭނެ. އަޅުގަނޑުމެން ޖެހޭނީ ލިބުނު ޝަކުވާތަކަށް ރިއާޔަތްކޮށްފައި ލިސްޓު ފައިނަލް ކުރަން.

އިސްމާއިލް ހަބީބް

ރިޔާސީ އިންތިހާބުގެ ދެވަނަ ބުރު އޮންނާނީ މި މަހުގެ 30 ވަނަ ދުވަހު، އަންނަ ހޮނިހިރު ދުވަހުއެެވެ.