ސަރުކާރު ބަދަލުވާއިރު ކުންފުނިތަކުގެ ވެރިން ބަދަލުވާކަށް ނުޖެހޭ: އަސްލަމް
ސަރުކާރު ބަދަލުވާ ކޮންމެ ފަހަރަކު ސަރުކާރުގެ ކުންފުނިތަކުގެ މުވައްޒަފުން ބަދަލުވާން ނުޖެހޭކަމަށް އެމްޑީޕީގެ ޕާލަމަންޓްރީ ގްރޫޕްގެ ލީޑަރު އަދި ރައްޔިތުންގެ މަޖިލިހުގެ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެއެވެ.
މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ، ހުށައަޅުއްވާފައިވާ އިންތިހާބުތަކުގައި ސަރުކާރުން ނަޖާއިޒު ނުފޫޒާއި، ބާރު ފޯރުވަމުންދާތީ، އިންތިހާބުތައް އިންސާފުވެރިކުރުމަށާއި، މިނިވަންކުރުމަށް ވެފައިވާ ވައުދާ އެއްގޮތަށް ސަރުކާރުން ކަންކަން ތަންފީޒްކޮށް މަގުފަހިކުރުމަށް ގޮވާލާ ހުށައަޅާފައިވާ ގަރާރުގެ ބަހުސްގެ މަރުހަލާގައި ވާހަކަދައްކަވަމުން އަސްލަމް ވިދާޅުވީ ސަރުކާރުގެ ކުންފުނިތައް ހަރުދަނާ ކުރަން ޖެހޭނެ ކަމަށް އޭނާވެސް ދެކެވަޑައިގަންނަވާ ކަމަށެވެ.
އެހެންނަމަވެސް، ކޮންމެ ފަހަރަކު ސަރުކާރު ބަދަލުވާއިރު، ސަރުކާރުގެ ކުންފުނިތަކުގެ ވެރިންނާއި މަސައްކަތް ކުރަމުންދާ މީހުން ބަދަލުވާން ނުޖެހޭ ކަމަށް އޭނާ ވިދާޅުވި އެވެ.
"އަޅުގަނޑު ވެސް ގަބޫލު ކުރަން ސަރުކާރުގެ ކުންފުނިތައް ހަރުދަނާ ކުރަން ޖެހޭކަން. ކޮންމެ ސަރުކާރެއް ބަދަލުވެގެން އަންނައިރު އެ ސަރުކާރެއްގެ ކުންފުނިތަކުގައި މަސައްކަތް ކުރަމުންދާ އެންމެން ބަދަލުވާކަށް ނުޖެހޭނެ. ސަރުކާރު ކުންފުނިތަކަކީ އެހެން ހިންގަން ޖެހޭނެ ކުންފުނިތަކެއް ނޫން. ސަރުކާރު ކުންފުނިތައް ހިންގަން ޖެހޭނީ އެކުންފުނިތައް ހިންގޭ ހަރުދަނާ ގާބިލު މީހުން،"
މުހައްމަދު އަސްލަމް
މިއާއެކު އަސްލަމް ވަނީ ކޮންމެ ފަސް އަހަރަކުން ސަރުކާރު ބަދަލުވެ މިނިވަން މުވައްސަސާތަކުގެ ބޭފުޅުންވެސް ބަދަލުވާނަމަ ގައުމު ހަރުދަނާވާނީ ކޮން ގޮތަކުންތޯ ސުވާލު ކުރައްވާފައެވެ. އަދި އެކަން ކަމަށް އެންމެން ވިސްނައިގެން ހައްލެއް ހޯދަން ޖެހޭ ކަމަށް އަސްލަމް ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
