ދުވާފަރު ޓީމުން އެދެނީ ގިނަ ސްޕޯޓަރުން ދަނޑަށް އައިސް ކުޅިވަރުގެ ރޫހާއެއްގޮތަށް ސަޕޯޓް ކުރަން

ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2023 ގެ، ރ. އަތޮޅު ލީގު ބުރުގެ ފައިނަލްގައި އިނގުރައިދޫއާއި ދުވާފަރު ބައްދަލު މެޗަށް ވޭހާވެސް ގިނަ ސްޕޯޓަރުން ދަނޑަށް އައުމަށް ދުވާފަރު ޓީމުން އެދިއްޖެއެވެ.

ދުވާފަރު ޓީމުން ބުނީ، ފައިނަލް މެޗުގައި އެ ޓީމާއި އިނގުރައިދޫ ބައްދަލުކުރާ މެޗަށް ވޭހާވެސް ގިނަ ސްޕޯޓަރުން ދަނޑަށް އައިސް ކުޅިވަރުގެ ރޫހާއި އެއްގޮތަށް އިދިކޮޅު ޓީމަށް އިހްތިރާމާއިއެކު ސަޕޯޓް ކުރުމަކީ އެ ޓީމުގެ ކުޅުންތެރިންނާއި މެނޭޖްމަންޓްގެ ވަރަށް ބޮޑު އެދުމެއް ކަމަށެވެ.

މި ދެ ޓީމު، ލީގު ބުރުގެ ފަހު މެޗުގައި ބައްދަލު ކުރި މެޗު 5-1 ގެ ނަތީއްޖާއަކުން ކާމިޔާބު ކުރީ އިނގުރައިދޫ ޓީމެވެ. އެ މެޗަށް ނުކުތުމުގެ ކުރިން ދެޓީމަށް ވެސް އަތޮޅު ބުރު ފައިނަލްގެ ޖާގަ ކަށަވަރުވެފައި އޮތުމުން ދެ ޓީމުން ވެސް ނުކުތީ ބަދަލުތަކަކާއި އެކުގައެވެ. ހާއްސަކޮށް ދުވާފަރު ޓީމުން މި މެޗުގައި ބޭނުންކުރީ އެޓީމުގެ ބެންޗު ޓީމެވެ.

އެ މެޗަށް ފަހު ވޮއިސް އަށް މައުލޫމާތް ދެމުން އިނގުރައިދޫ ޓީމުގެ ކޯޗު އަހުމަދު ވިސާލް (އަންދު) ވެސް ވަނީ އެ މެޗަކީ ދެޓީމަށް ވެސް އެހާ މުހިންމު މެޗެއް ނޫންކަމަށެވެ. އަދި ފައިނަލުގައި ދުވާފަރާއި ދެކޮޅަށް ކުޅޭ މެޗަކީ ވަރަށް އުނދަގޫ މެޗަކަށް ވާނެކަމަށްވެސް އޭނާ ބުނެފައި ވެއެވެ.

ދުވާފަރު ޓީމުގެ މެނޭޖަރ އިބްރާހިމް ޖަލީލް ވޮއިސް އަށް މައުލޫމާތް ދެމުން ބުނީ ފުޓްސަލްގައި މި ދެޓީމަކީ ވަރަށް ވާދަވެރި ދެޓީމު ކަމަށާއި ފަހު މެޗަށް ޓީމަށް ބޮޑެތި ބަދަލުތަކެއްގެނައީ ފައިނަލުގެ ޖާގަ ޔަގީންވެފައި އޮތުމުންކަމަށެވެ. އަދި ދުވާފަރު ޓީމު އަންނަނީ ފައިނަލް މެޗަށް ވަރަށް ރަގަޅަށް ތައްޔާރުވަމުން ކަމަށްވެސް ބުނެފައިވެއެވެ.

ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2023 ގެ، ރ. އަތޮޅު ލީގު ބުރުގެ ފައިނަލްގައި އިނގުރައިދޫއާއި ދުވާފަރު ވާދަކުރާ ފައިނަލް މެޗު ކުޅަމަށް ހަމަޖެހިފައިވަނީ ފެބުރުއަރީ 25 ވާ ހޮނިހިރު ދުވަހު ހަވީރު އެވެ.