ފަލަސްޠީން އިޒްރާއިލް ހަނގުރާމަ: ހަމަލާތައް ދިނުމުގައި އިޒްރާއިލުން ބޭނުންކުރަނީ އެންމެ ބާރުގަދަ ހަތިޔާރު

ފަލަސްޠީނަށް ހަމަލާދިނުމަށް އިޒްރާއިލުން ބޭނުން ކުރަމުންދަނީ އެންމެ ނުރައްކާތެރި ބާރުގަދަ ހަތިޔާރުތައް ކަމަށް ފަލަސްޠީނުގެ އިންޓީރިއާ މިނިސްޓްރީ އިން ބުނެފިއެވެ.

އެމިނިސްޓްރީ އިން ބުނެފައިވަނީ ޢިމާރާތްތަކަށް ބޮން އެޅުމަށް ބޭނުންކުރަމުންދަނީ އެންމެ ބޮޑަށް ގެއްލުން ދެނިވި ހަތިޔާރުކަމަށެވެ.

އެގޮތުން ހަމަލާދިނުމަށް ބޭނުންކުރާ ހަތިޔާރުގެ ސަބަބުން އެހަމަލާއަމާޒުވާ މުޅި ސަރަހައްދު އެއްފަހަރުން ހަލާކުކޮށްލާ ކަމަށާއި، އެއްފަހަރާ ގިނަ ބަޔަކު ޝަހީދުވެގެން ދާ ކަމަށް އެމިިނިސްޓްރީ އިން ބުނެފައިވެއެވެ.

އިޒްރާއިލުން ދެމުންދާ މިފަދަ ހަމަލާތަކުގެ ސަބަބުން ފަލަސްޠީނުގެ އެތައް ކުޑަކުއްޖަކު ޝަހީދުވެފައިވާއިރު، ޝަހީދުވި ބައެއް ކުޑަކުދިންގެ ހަށިގަނޑުގެ ބައިތައް ވަކިވަކި ވެގެން ގޮސްފައިވާ ތަން ފެންނަމުންދާއިރު، ހުޅަނގުގެ މީޑީއާތަކުން ދަނީ މިމަންޒަރުތަކާއި އަޑުތައް ދޮގުކުރުމަށް އެތައް މަސައްކަތެއް ކުރަމުންނެވެ. އެގޮތުން ހަމަލާތައް ލިބި އަނިޔާވެރިކަމާއި ބިރުވެރިކަމުގެ ހިޔަލުގައި ތިބީ އިޒްރާއިލްގެ ޔަހޫދީން ކަން ދެއްކުމަށް ދަނީ އެކިއެކި ވާހަކަތައް ފަތުރަމުންނެވެ.

ޣައްޒާއިން މަޢުލޫމާތު ދެއްވި ވޮއިސްގެ މުރާސިލް ވިދާޅުވެފައިވަނީ ޝަހީދުންގެ ޢަދަދު 5087 އަކަށް އަރައިފައިވާ ކަމަށާއި ޒަޚަމްވި މީހުންގެ ޢަދަދު 15273 އަކަށް އަރައިފައިވާ ކަމަށެވެ. އަދި ވީނުވީއެއް ނޭނގޭ 1400 މީހުން ހިމެނޭކަމަށްވެސް އޭނާ ވިދާޅުވިއެވެ. އަދި ވީނުވީ އެއް ނޭނގިފައިވާ ޢަދަދު ގެ ތެރޭގައި ބޮޑު ބައެއް ހިއްސާކުރަނީ ކުޑަކުދިން ކަމަށްވެސް އޭނަ ވިދާޅުވިއެވެ.