އެއްކޮޅުން އިސްރާއީލަށް ދެނީ ހަތިޔާރު؛ އަނެއްކޮޅުން ބުނަނީ ފަލަސްޠީނުގެ އަސާސީ ހައްގު ކަށަވަރު ކުރާނަމޭ!

ފަލަސްޠީނުގެ ރައްޔިތުންގެ އަތުން ގަދަކަމުން ބިން ފޭރި، އެގައުމުގައި ދިރިއުޅެމުންދާ މުސްލިމުން ހައްގަކާ ނުލައި ގަތުލު ކުރަމުންދާ އިސްރާއީލްގެ ޔަހޫދީންނަށް، ވާގިވެރިވަމުން، ފަލަސްތީނުގެ ރައްޔިތުންގެ އަސާސީ ހައްގުތައް ކަށަވަރު ކުރާނެ ކަމަށް އެމެރިކާގެ ރައީސް ޖޯއީ ބައިޑެން ބުނުމުން ގިނަ ބައެއްގެ ފާޑުކިޔުންތައް އޭނާއަށް އަމާޒުވެއްޖެއެވެ.

ފަލަސްޠީނުގެ މިނިވަންކަމަށްޓަމައި ޖިހާދުކުރަމުންދާ ހަމާސް ޖަމާއަތުން މިމަހު 7 ވަނަ ދުވަހު އިސްރާއީލަށް އަމާޒުކޮށް ދިން ހަމަލާއާއި ގުޅިގެން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ ފަލަސްތީނާ ދެކޮޅަށް ހަނގުރާމަ އިއުލާން ކޮށްފައެވެ. އެއާއެކު، އިސްރާއީލްގެ ޖައްބާރު ސިފައިން، ހުއްޓުމެއްނެތި ފަލަސްޠީނުގެ އާއްމުންނަށް އަމާޒުކޮށް، ހުއްޓުމެއްނެތި ވަރުގަދަ ހަމަލާތައް ދެމުންދާއިރު، އެ ހަމަލާތަކުގައި 5000 އަށްވުރެ ގިނަ މީހުން ވަނީ ޝަހީދުކޮށްލައިފައެވެ. އަދި އެތައް ހާސް ބަޔަކު ވަނީ ޒަހަމްވެސް ކޮށްލައިފައެވެ. އޭގެ ތެރެއިންވެސް އެންމެ ގިނައީ އަންހެނުންނާއި ކުޑަކުދިންނެވެ.

ކަންމިހެން ހުރި އިރު، އިސްރާއީލްގެ، އެ ޓްރަރިސްޓް ހަމަލާތަކަށް ހިތްވަރު ދިނުމަށް ބައިޑަން ވަނީ ފަލަސްޠީނު އަތުން ފޭރިގަނެގެން ވަކި ދައުލަތެއް ހަދައިގެން އުޅޭ އިސްރާއީލަށް ދާދިފަހުން ގޮއްސައެވެ. އަދި އެ ދަތުރުގެ ތެރެއިން އޭނާ ވަނީ އިސްރާއީލުން ކުރަމުންދާ ޢުދުވާނު ތަކަށް ހިތްވަރުދީ، އިސްރާއީލާއެކު އެމެރިކާ ވާ ކަމަށް ބުނެފައެވެ.

ހަމައެހެންމެ، އިސްރާއީލުން ފަލަސްތީނުގެ މުސްލިމުން ޝަހީދުކޮށް، ފަލަސްޠީނުގެ ނަން ދުނިޔެމަތިން ފޮހެލުމަށް ކުރަމުންދާ މަސައްކަތަށް އެހީވުމަށް، އެމެރިކާއިން ވަނީ ހަނގުރާމަ ކުރުމަށް ނުރައްކާތެރި ހަތިޔާރުވެސް ފޮނުވާފައެވެ. މިފަދައިން ކަންކުރަމުން، ރޭ ބައިޑަން ކުރި ޓުވީޓެއްގައި އޭނާ ވަނީ ފަލަސްތީނުގެ ރައްޔިތުންގެ އަސާސީ ހައްގުތައް އެމެރިކާއިން އަބަދުވެސް ކަށަވަރުކުރާނެ ކަމަށް ބުނެފައެވެ.

"ޣައްޒާގެ ރައްޔިތުންނަށް ކާތަކެއްޗާއި، ފެނާއި، ބޭސްފަރުވާ އާއި އެހެން ހައްގުތައް ކަށަވަރު ކޮށްދިނުމަށް އެމެރިކާއިން އަބަދުވެސް މަސައްކަތް ކުރާނަން" ބައިޑަން ބުނެފައިވެއެވެ.

ބައިޑަންގެ އެ ޓުވީޓަށް ގިނަ ބައެއްގެ ފާޑުކިޔުންތައް އަންނަނީ އަމާޒުވަމުންނެވެ.

އެގޮތުން، އެމެރިކާއިން ގަތުލު އާއްމަށް ހިތްވަރުދީ އެކަމަށް ހޭދަކުރަމުންދާ ކަމަށާ، އެމެރިކާއަކީ އިސްރާއީލްގެ ޖަރީމާ ތަކުގެ ބައިވެރިޔާ ކަމަށް މީހުން ބުނެފައިވެއެވެ.

އަދި ޣައްޒާއަށް އެހީ ފޯރުކޮށްދޭކަން ޔަގީން ކުރާނެ ކަމަށް ބައިޑަން ބުނާއިރު، އެކަމަށް ގޮވާލާ އދ އަށް ހުށަހެޅުނު ގަރާރު އެމެރިކާއިން ވީޓޯ ކުރީ ކީއްވެތޯވެސް މީހުން ވަނީ ސުވާލު ކޮށްފައެވެ.

މިނޫންވެސް އެތަކެއް މީހެއްގެ ނުރުހުމާއި ފާޑުކިޔުންތައް ބައިޑަންއަށް އަމާޒުވަމުންދާއިރު، އެކަމުންވެސް އޭނާ އާއި އެމެރިކާގެ މުނާފިގުކަން އެނގިގެން ދާކަމަށް މީހުން ވަނީ ބުނެފައެވެ.