ތ. އަތޮޅުގެ ފަޅުރަށެއްގެ ގޮނޑުދޮށުން ”އިންސާނެއްގެ ކަތުރު ކަށިގަނޑެއް“ ފެނިއްޖެ

ތ. އަތޮޅު ފަޅުރަށެއް ކަމަށްވާ ކަނޑުފުށީގެ ގޮނޑުދޮށަށް ލައްގާފައި އޮތް ކަތުރު ކަށިގަނޑެއް ފެނިއްޖެއެވެ.

މި ތަކެތި ފެނުނު މީހަކު ފޭސްބުކްގައި ކޮށްފައިވާ ޕޯސްޓެއްގައި ބުނެފައިވަނީ، ކަނޑުފުށީ ގޮނޑުދޮށުން ރާޅު އަރާ ހިސާބުގައި އޮއްވައި އިއްޔެ ފެނުނީ އިންސާނެއްގެ ދަތްޕިލަ ނުވަތަ ކަތުރު ކަށިގަނޑެއް ކަމަށެވެ.

އަދި މި މައުލޫމާތު ފުލުހުންނަށް ހިއްސާކުރުމުން، ފުލުހުން އެ ރަށަށް ގޮސް މިހާރު އެ ކަށިގަނޑު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ވެސް އޭނާ ބުންޏެވެ.

މިކަމާ ގުޅިގެން ފުލުހުން ބުނީ، ދަތުރު ގޮސް އުޅުނު ބަޔަކަށް ކަނޑުފުށިން ކަށިގަނޑެއް ކަމަށް ބެލެވޭ އެއްޗެއް ފެނިގެން ރިޕޯޓު ކޮށްފައިވާ ކަމަށެވެ.

ނަމަވެސް، މިހާތަނަށް ބެލިބެލުމުން އެއީ އިންސާނެއްގެ ނުވަތަ ޖަނަވާރެއްގެ ކަށިގަނޑެއްކަން އަދި ކަށަވަރު ކުރެވިފައި ނުވާ ކަމަށާއި، މި މައްސަލައާ ގުޅިގެން ބަލަންޖެހޭ އިތުރު ކަންކަން ފުލުހުން ދަނީ ތަހުގީގު ކުރަމުން ކަމަށް ވެސް ފުލުހުން މައުލޫމާތު ދެއެވެ.

ތ. އަތޮޅުން އެންމެ ފަހުން ގެއްލިގެން ރިޕޯޓްކުރީ މިދިޔަ އަހަރުގެ އޭޕްރީލް މަހުގެ ތެރޭގައި ތ. އަތޮޅާއި ލ. އަތޮޅުގެ ރަށްތަކަށް މުދާ އުފުލާ "ހޮޅުދޫ ބޯޓު" ގައި އަލިފާނުގެ ހާދިސާއެއް ހިނގައި، އެ ދޯނިން މޫދަށް ފުންމާލި އަލީ މުޝްފިގު މުހައްމަދެވެ. މުޝްފިގު ހޯދުމަށް ސިފައިން ވަނީ ކަނޑުގެ ބޮޑު ސަރަހައްދެއް ބަލައި ފާސްކޮށްފައެވެ. ނަމަވެސް މިއަދާ ހަމައަށް ވެސް އޭނާގެ އެއްވެސް ޚަބަރެއް ވެފައެއް ނުވެއެވެ.

ފަޅުރަށެއްގެ ގޮނޑުދޮށުން މި ފެނުނު ކަތުރު ކަށިގަނޑަކީ ގެއްލިގެން ހޯދަމުންދާ މުޝްފިގާ އެއްވެސް ގުޅުމެއް އޮތް އެއްޗެއް ކަމެއް އަދި ސާފެއް ނުވެއެވެ.