ވައިފުޅި އަޅައިގެން އެންދަމާ ކޮންމެ އުޅަނދެއްގައި ރެސްކިއު ޑައިވަރެއް ތަމްރީން ކުރަނީ

ވައިފުޅި އަޅައިގެން އެންދަމާ ކޮންމެ އުޅަނދެއްގައި އެއް ފަޅުވެރިއަކު ރެސްކިއު ޑައިވަރ ފެންވަރަށް ތަމްރީން ކުރުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ނިންމެވީ އިއްޔެ ބޭއްވި ވަޒީރުންގެ މަޖިލީހުގައި މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ވަޒީރުންގެ މަޖިލީހަށް ހުށައެޅި ކަރުދާހަށް ވަޒީރުންގެ މަޖިލީހުގައި މަޝްވަރާ ކުރެއްވުމަށްފަހުއެވެ.

އެ ވުޒާރާއިން ހުށައެޅި ކަރުދާހުގައި ވަނީ  ވައިފުޅި އަޅައިގެން ފީނައިގެން އެންދަމާ މަސް ދޯނިފަހަރުގައި ރެސްކިއު ޑައިވަރ ފެންވަރަށް ތަމްރީން ލިބިފައިވާ މަދުވެގެން އެއްފަޅުވެރިޔަކު ބެހެއްޓުމަށް މަސް ދޯނިފަހަރަށް އަމާޒުކޮށް ޑައިވިންގ ތަމްރީން ޕްރޮގްރާމެއް ހިންގުމަށެވެ.

މި ބައްދަލުވުމުގައި ނިންމި މުހިންމު ނިންމުން ތައް ހިއްސާކުރުމަށް މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަހަކަދައްކަވަމުން ރައީސުލްޖުމްހޫރިއްޔާގެ އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ ޢަބްދުالله ނާޡިމް އިބްރާހީމް ވިދާޅުވީ، މިއީ ކުރިއަށްއޮތް 5 އަހަރަށް ބަހާލައިގެން ހިންގޭ ޕްރޮގްރާމެއް ކަމަށާއި މި ޕްރޮގްރާމް ކުރިއަށް ދާނީ ދައުލަތުން ސަރުކާރު ގަބޫލުކުރާ ޓްރެއިނިން ދޭ ސެންޓަރުތަކުގައި ކަމަށާއި މިކަމަށް ހަރަދު ކުރާނީ ސަރުކާރުން ކަމަށެވެ.

ވައިފުޅި އަޅައިގެން ފީނާއިރު ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް ނޭޅުމުގެ ސަބަބުން ހިތާމަވެރި ހާދިސާތައް ހިނގާކަން  ނާޡިމް ފާހަގަ ކުރެއްވިއެވެ.

މަސްވެރިކަމުގެ ސިނާއަތް ކުރިއެރުވުމަށްޓަކައި މި ސަރުކާރުން ދަނީ ވަރަށް ގިނަ މަސައްކަތް ތަކެއް ކުރަމުންނެވެ. މިގޮތުން މަސްވެރިކަމުގެ ދާއިރާއިން ބޭނުންވާ ތަޢުލީމާއި، ތަމްރީންތައް ސަރުކާރުން ފަހިކޮށްދެއްވާނެ ކަމަށްވެސް ވަނީ ރައީސް ޑރ.މުޢިއްޒު ވަނީ ވިދާޅުވެފައެވެ.