އީރާނުގެ ކޯލް މައިނެއްގައި އެއްޗެއް ގޮއްވައި މަރުވި މީހުންގެ އަދަދު 50 އަށް ވުރެ މައްޗަށް

އީރާނުގެ ކޯލް މައިނެއްގައި ގޭސް ލީކުވެ، ހިނގި ހާދިސާގެ ސަބަބުން 51 މީހުން މަރުވެފައިވާ ކަމަށް އެގައުމުގެ ދައުލަތުގެ މީޑިއާއިން ބުނެފިއެވެ.

އީރާނުގެ އިރުމަތީގައި ހުންނަ ޓަބާސް މައިންގައި އެއްޗެއް ގޮވި ހާދިސާގައި މަރުވި މީހުންގެ އަދަދު 51 އަށް އަރާފައިވާ ކަމަށް އިރްނާގެ ރަސްމީ ނޫސް އެޖެންސީން އާދީއްތަ ދުވަހު ވަނީ ބުނެފަ އެވެ. އަދި އިތުރު 20 މީހަކަށް އަނިޔާވެފައިވާ ކަމަށް ވެސް އެ އިދާރާއިން ވަނީ ބުނެފައެވެ.
މީގެ ކުރިން އާދީއްތަ ދުވަހު ދައުލަތުގެ މީޑިއާއިން ވަނީ 30 މީހުން މަރުވެ 17 މީހުން ޒަޚަމްވެފައިވާ ކަމަށް ރިޕޯޓްކޮށްފައެވެ. އޭރު އިތުރު 24 މައިނަރުން އެތެރޭގައި ތާށިވެފައިވާ ކަމަށް ވަނީ ލަފާކޮށްފައެވެ.

އިރްނާ އިން ބުނީ ހޮނިހިރު ދުވަހުގެ ރޭ 9:00 އެހާކަންހާއިރު ގޮވުންތަކެއްގެ އަޑުއިވުނުއިރު، ދެކުނު ޚުރާސާން ޕްރޮވިންސްގެ އެ ސަރަހައްދުގައި ގާތްގަނޑަކަށް 70 ވަރަކަށް މަސައްކަތްތެރިން ތިބިކަމަށެވެ.

ޒަހަމްވި މީހުން ހޮސްޕިޓަލަށް ގެންދިއުމަށް އެމްބިއުލާންސާއި ހެލިކޮޕްޓަރުތައް ޓަބާސްއަށް އަންނަ މަންޒަރު ދައުލަތުގެ ޓީވީން ވަނީ ބްރޯޑްކާސްޓްކޮށްފަ އެވެ.