ދުވަސްވީ މީހުން ބަލަހައްޓާ މަރުކަޒެއް ހުޅުމާލޭގައި ގާއިމު ކުރަނީ
ދުވަސްވީ މީހުން ބަލަހައްޓާ މަރުކަޒެއް ހުޅުމާލޭގައި ގާއިމު ކުރަން ހައުސިންގް ޑިވިލޮޕްމެންޓް ކޯރޕަރޭޝަން (އެޗްޑީސީ)އިން ނިންމައިފިއެވެ.
އެ ކޯޕަރޭޝަނުން ކުރި އިއުލާނެއްގައި ބުނީ، އުމުރުން ދުވަސްވީ މީހުންނާއި ނުކުޅެދުންތެރިކަން ހުންނަ ފަރާތަތަކަށް ހާއްސަ މަރުކަޒެއް ހުޅުމާލޭގައި ތަރައްގީކުރުމަށް ޝައުގުވެރިވާ ފަރާތްތަކަށް އެ ފުރުސަތު ހުޅުވާލާފައިވާ ކަމަށެވެ.
އެހެންކަމުން، އެ މަރުކަޒު އެޅުމަށް ޝައުގުވެރިވާ ފަރާތަތަކުން އަންނަ ފެބްރުއަރީ މަހުގެ ހަތް ވަނަ ދުވަހުގެ ކުރިން އީމެއިލްއިން ނުވަތަ ޕްރޮޕޯސަލްއިން އެކަމަށް އެދި ހުށައެޅުމަށް އެޗްޑީސީން ބުންޏެވެ.
އެޗްޑީސީން ބުނީ، މަރުކަޒަށް ބޭނުންވާ ޕާކިންއެއް ހިމެނޭ ގޮތަށް، ހިދުމަތްތައް ދިނުމަށް ބޭނުންވާ ސަރަހައްދުތަކުގެ ޕްލޭނިންއެއް ހުށަހަޅަންޖެހޭ ކަމަށެވެ.
މީގެއިތުރުން، އެންމެނަށް ވަދެނިކުންނަން ފަސޭހަ ގޮތަކަށް ޑިޒައިންކުރުމާއި، މަރުކަޒުގެ ކުނި ނައްތާލަން އިންތިޒާމު ހަމަޖައްސާ ގޮތް އަދި އިމާރާތުގެ ޑިޒައިންއާއި ގުޅޭ މައުލޫމާތު ޕްރޮޕޯސަލްގައި ހުށަހަޅަން ޖެހޭ ކަމަށް އެޗްޑީސީން ބުންޏެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
